اتىراۋ وبلىسىندا ەرلى-زايىپتىلاردى ءولتىردى دەگەن كۇدىكتىلەر يندونەزيادان ەلگە ناۋرىز ايىندا جەتكىزىلەدى. بۇل تۋرالى ىشكى ىستەر ءمينيسترىنىڭ ورىنباسارى سانجار ءادىلوۆ ايتتى، دەپ حابارلايدى «ادىرنا» ءتىلشىسى.
ونىڭ سوزىنشە، قازىرگى ۋاقىتتا قىلمىستىق ءىس بويىنشا ەكى كۇدىكتىنى قازاقستانعا ەكستراديتسيالاۋ ماسەلەسى شەشىلگەن.
«جاقىن ارادا ەكى كۇدىكتى يندونەزيادان قازاقستانعا جەتكىزىلەدى. جۇمىس اتقارىپ جاتىرمىز. وسى ايدا الىپ كەلەمىز. باسقا ەلدەردەن كەلگەن ارىپتەستەرىمىزبەن كەلۋ باعىتتارىن پىسىقتادىق جانە قىلمىستىق پروتسەسسۋالدىق كودەكس بويىنشا جۇمىسىمىزدى جالعاستىرامىز»،-دەدى ءادىلوۆ.
جۋرناليستەر ىشكى ىستەر ءمينيسترىنىڭ ورىنباسارىنان ىستە باسقا كۇدىكتىلەردىڭ بار-جوعىن سۇرادى.
«قازىرگى ۋاقىتتا ءىستى ەكى كۇدىكتىگە قاتىستى جۇرگىزىپ جاتىرمىز. اتىراۋ وبلىسىندا ارنايى تەرگەۋ توبى قۇرىلىپ، جۇمىس ىستەپ جاتىر»،– دەپ جاۋاپ بەردى ول.
ەسكە سالايىق، بىلتىر اتىراۋ وبلىسى جانگەلدين اۋىلىندا تۇراتىن ەرلى-زايىپتىلاردىڭ جوعالعانى تۋرالى اقپارات تاراعان ەدى. 25 جەلتوقساندا تۋىستارى پوليتسياعا ارىزدانعاننان كەيىن ىزدەستىرۋ جۇمىستارى باستالدى. كەيىنىرەك ءۇي اۋلاسىنداعى شارۋاشىلىق نىسانىنان ەرلى-زايىپتىلاردىڭ مايىتتەرى تابىلدى.
