Bekjan TURYS: Qudaıdy qubyladan emes, ishimdik qumyrasynan izdedik!

3314
Adyrna.kz Telegram

Akter, QR Eńbek sińirgen qaıratkeri  Bekjan Turys «Eýrazııa» birinshi arnasyna bergen suhbatynda ótken ómirindegi qatelikteri men ókinishteri jaıly ashyp aıtty.

Bala kúninen ánge áýes, kúıge qumar bolyp ósken akter, teatr sahnasynda 20 jyl úzdiksiz  shaldyń rólin somdaǵan.  Áskerge baryp, Qıyr shyǵystyń «Úzdik soldaty» atanǵan.  Sahnadan qorqamyn jáne oǵan essiz ǵashyqpyn degen akter alǵashqy mahabbatyna nelikten qoly jetpeı qalǵanyn aıtty.

«Mektepte oqyp júrgen jyldary «Ulan» degen ansambl boldy. Sol toptyń Gúlzıra degen ánshi qyzyna ǵashyq boldym. Onyń qurbysy Banýdan talaı hattar berip jibergem, biraq bári jaýapsyz qaldy. Ózim qasyna baryp sezimimdi jetkizýge batylym barmady. Keıde  jazǵan hattarym jetpeı qalyp jatty. Áskerge ketken kezde de hat jazýdy toqtatqan emespin. Ol kezde men aýyldan kelgen qara bala edim. Qalanyń názik qyzy meni mensinbedi. Áskerden kelgen kezde de alǵashqy mahabbatymdy izdedim. Biraq ol turmysqa shyǵyp ketken eken. Men bul habarǵa senbedim. Kózimmen kórmesem senbeımin dep izdep bardym. Gúlzıranyń turmysta ekenin kózimmen kórip, kóńil sýyttym»,-dedi akter.  

«Ol kezde maǵan keletin hattar kóp edi. Men kóbine  jaýap jazbaıtynmyn. Ózi kelip, sezimin ashyq bildire almady. Maǵan eshqashan ashyq aıtqan emes. Bir kúni meniń týǵan kúnime gúl alyp kelgen kezde uıalǵanymnan tyǵylyp qaldym. Ákeme meni úıde joq dep aıtshy degenim esimde...»,-dep akterdyń alǵashqy mahabbaty Gúzıra Qasymjanova esine aldy.  

5 jasynda ákesinen aıyrylyp, atasy men aǵasynyń tárbıesimen ósip, anasynyń qamqorlyǵynda bolǵan akterdiń ata-anasyna degen saǵynyshy eshqashan basylmaǵan. Burynǵy men búgingi zamandy salystyryp, eki kezeńdegi artyqshylyqtar men kemshilikterdi bylaı dep baıandady...

«Ol kezde bizde barlyǵy da shynaıy edi. Qazir ǵoı ol, izgilikti joǵaltyp, mahabbatqa quldyqtyń qamytyn kıgizip qoıdyq. Aqshanyń qolyn súıgizip, oısyz ben muńsyzdyń aldynda mańdaıyn jerge tıgizip, bardyń qoljaýlyǵy, joqtyń qobyzdy muńy etip  qoıdyq.  Mahabbatty umytqan qoǵam baqytsyz urpaq tárbıeleıdi degen sóz bar ǵoı, men sonymen tolyq kelisemin. Sol sebepti qazirgi jastar oısyz úılenip, muńsyz ajyrasady. Olardyń balalary narkoman, nemereleri nervnyı bolady!»,-dep tárbıege toqtalsa...

«Al Sovet kezeńin kórgen adamdardyń barlyǵy desem qatelespeıtin shyǵarmyn, tipti  90 paıyzy ishimdikti aınalyp óte almady. Bul sol zamannyń kem tusy.  Onyń ishinde men de barmyn. Jumysqa aýzymnan ishimdiktiń ıisi shyǵyp barǵan kezder de boldy. Qudaıdy Qubyladan emes ishimdik qumyrasynan izdedik.  Moınymyzǵa azaptyń shynjyryn taqqaly, taǵdyrdyń talaı taýqymetin tartqaly, shaıtanmen jyn qaqqaly, kápirstan-zymystan dinniń jolyn japqaly ne istemedik deısiz, bárin istedik.  Bizge qarap boı túzep kele jatqan urpaqqa qatelikterimizdi aıtyp,  bizde bolǵan ókinishterimizdi jasamaýlaryna jón siltep otyrý durys dep oılaımyn»,- dedi Bekjan Turys.

Pikirler