يسپانيا اقش پرەزيدەنتى دونالد ترامپ مادريدكە ساۋدا قاتىناستارىن توقتاتۋ تۋرالى ەسكەرتۋ جاساعاننان كەيىن امەريكالىق اسكەري كۇشتەرمەن ىنتىماقتاسۋعا كەلىسىم بەردى. بۇل تۋرالى اق ءۇي وكىلى كەرولاين لەۆيتت ايتتى، دەپ حابارلايدى «ادىرنا» ءتىلشىسى.
«ولار پرەزيدەنتتىڭ ءسوزىن انىق ەستىدى. مەنىڭ تۇسىنۋىمشە، سوڭعى بىرنەشە ساعات ىشىندە ولار اقش-تىڭ اسكەري كۇشتەرىمەن ىنتىماقتاسۋعا كەلىسىم بەردى،- دەدى لەۆيتت ۆاشينگتونداعى بريفينگتە.
اق ءۇي وكىلى ىنتىماقتاستىقتىڭ ناقتى قالاي جۇزەگە اساتىنىن ناقتىلامادى.
الايدا يسپانيا سىرتقى ىستەر مينيسترلىگىنىڭ باسشىسى حوسە مانۋەل بۇل مالىمدەمەنى جوققا شىعاردى. ايتۋىنشا، ەل اقش پەن ءيزرايلدىڭ يرانعا قارسى اسكەري وپەراتسياسى بويىنشا ءوز پوزيتسياسىن وزگەرتپەگەن.
«يسپانيا ۇكىمەتىنىڭ تاياۋ شىعىستاعى سوعىسقا، يرانعا بومبالاۋ شارالارىنا جانە ءبىزدىڭ بازالاردى پايدالانۋعا قاتىستى پوزيتسياسى مۇلدەم وزگەرگەن جوق. اقش-پەن ەكىجاقتى كەلىسىمىمىز بار. ال وسى كەلىسىمدە قاراستىرىلماعان ماقساتتا يسپانيا اسكەري بازالارىن قولدانۋعا جول بەرىلمەيدى. كەز كەلگەن اسكەري وپەراتسيالار بۇۇ رۇقساتىمەن جۇزەگە اسىرىلۋى ءتيىس»،- دەدى ول.
