قالا اكىمىنىڭ شالعاي ەلدىمەكەندەردەگى ينفراقۇرىلىم ماسەلەلەرىن جۇيەلەۋ جونىندەگى تاپسىرماسىنا سايكەس، قاراتاۋ اۋدانىنىڭ اكىمى ابزال الىقۇلوۆ اۋدان اۋماعىنداعى «اسار-2» شاعىناۋدانى تۇرعىندارىمەن كەزدەستى. كەزدەسۋدە تۇرعىنداردىڭ شاعىناۋدانداعى اۋىز سۋ، تابيعي گاز، كارىز جۇيەسى، ساپالى ەلەكتر جارىعىمەن قامتۋ جانە شاعال تاس توسەۋ بويىنشا ماسەلەلەرىنە تولىققاندى جاۋاپ بەرىلدى.
اۋدان اكىمى «اسار-2» شاعىناۋدانىنىڭ ينفراقۇرىلىم ماسەلەسىن جۇيەلەۋ ماقساتىندا اتقارىلىپ جاتقان جانە الداعى ۋاقىتتا جوسپارلانعان جوبالار مەن جۇمىستارعا كەڭىنەن توقتالىپ ءوتتى. شاعىناۋداندى اۋىز سۋمەن قامتاماسىز ەتۋ بويىنشا 156,1 شاقىرىم ىشكى ورامدىق جۇيەلەرىنىڭ قۇرىلىس جۇمىستارى 2020 جىلدىڭ مامىرىندا باستالدى. جەرگىلىكتى بيۋدجەتتەن قارجى ءبولىنىپ، قۇرىلىس جۇمىستارى مەردىگەر مەكەمە «سارىاعاش-امان» جشس تاراپىنان جۇرگىزىلۋدە. قامتىلاتىن جالپى ابونەنت سانى – 2 765.
«رەمستروي الماتى» جشس شاعىناۋداندى ەلەكتر جارىعىمەن قامتۋ بويىنشا جۇمىستار اتقارۋدا. قامتىلاتىن جالپى ابونەنت سانى – 2 723. ال تابيعي گازبەن قامتاماسىز ەتۋ بويىنشا 50,4 شاقىرىم ىشكى ورامدىق جۇيلەرىنىڭ قۇرىلىس جۇمىستارى 2020 جىلى باستالدى. قۇرىلىسقا جاۋاپتى مەردىگەر مەكەمە – «وتاۋ ستروي» جشس.
سونداي-اق، «اسار-2» شاعىناۋدانىن كارىز جۇيەلەرىمەن قامتۋ بويىنشا «مونوليت – ديزاين - 2030» جشس تاراپىنان قۇرىلىس جۇمىستارى جۇرگىزىلۋدە. قۇرىلىستى كەلەر جىلى اياقتاۋ جوسپارلانۋدا.
شاعىناۋداندا 48,6 شاقىرىم 38 كوشە بار. ونىڭ ىشىندە 4,9 شاقىرىم جولدى اسفالتتاۋ بويىنشا «سەۆەر-يۋگ» جشس قۇرىلىس جۇمىستارىن اتقارۋ ۇستىندە.
شىمكەنت قالاسى اكىمدىگىنىڭ ءباسپاسوز قىزمەتى
