نوعاي ارۋى

2310
Adyrna.kz Telegram

(بەلگىلى عالىم، ءسوز زەرگەرى ءنəسىپحان ءسۇيىنوۆا مەرەيلى جاسقا تولدى)

نوعايدىڭ قىزى. جاي قىزى ەمەس، əيگىلى عالىم قىزى. Əلەۋەتتى əدەبيەتتانۋشى. ۇلتىن سۇيگەن ۇلاعاتتى پەرزەنت. قارىمدى قايراتكەر. تۇركى دۇنيەسىن تۇگەلدەۋشى. Əدەبيەتتانۋشى رەتىندە ىلگەرىدەگى ابدۋل-حاميد جəنىبەكوۆ، ءسۇيىن قاپاەۆ، ءƏشىم سيكاليەۆ سىندى ءسوز ساردارلارىنىڭ جولىن جالعاپ، بيىك بەلەسكە شىقتى. جيىرماسىنشى عاسىرداعى نوعاي پوەزياسىن ۇلتتىق جəنە جالپىتۇركىلىك تاريحي-مəدەني كونتەكستە قاراستىرىپ، فيلولوگيا عىلىمدارىنىڭ دوكتورى اتاندى. ۇلت پەرزەنتى رەتىندە ءوز حالقىنىڭ مۇراسىن التىننىڭ سىنىعىنداي قاستەرلەپ ساقتاپ، كوزگە تۇسكەنىن جينايدى دا جۇرەدى. قايراتكەر رەتىندە دە قابىلەت-قارىمىن كورسەتىپ، انا ءبىر جىلداردا قاراشاي-چەركەس رەسپۋبليكاسىنىڭ ۇلتتار ىستەرى، بۇقارالىق كوممۋنيكاتسيا جəنە ءباسپاسوز ءمينيسترى بولدى. بۇل قىزمەتىندە دە نوعايدىڭ ءسوز ونەرىن دامىتۋعا ۇشان-تەڭىز پايدا كەلتىردى. تۇركى دۇنيەسىن تۇگەلدەۋشى رەتىندە بارلىق ەڭبەگىندە ءتۇبى ءبىر، ءتۇرى ۇقساس اعايىن ەلدەرگە ورتاق مۇراتتاردى العا تارتادى.

ال وسى ءنəسىپحان قىزدىڭ قازاق دەگەنگە جانى بولەك. ءبىزدىڭ عالىمدارمەن بايلانىسى بەرىك. Əرىپتەستەرىن ءتۇرلى عىلىمي جيىندارعا شاقىرادى. ءوزى دە ءجيى كەلەدى. قۇر قول كەلمەيدى. قالىڭ-قالىڭ كىتاپتاردى الا جەتەدى. نوعاي ءسوزىنىڭ قازاق جۇرتىنا قاپىسىز جەتكەنىن قالايدى. قايتاردا دا بوس قايتپايدى. قازاق كىتاپتارىن قورجىنىنا تولتىرىپ الىپ اتتانادى. نۇر ديدارلى ءنəسىپحاننىڭ نوعاي-قازاق əدەبي بايلانىستارىن دامىتۋمەن جالعىز ءوزى تىنباي اينالىسىپ جۇرگەنىنە بىرنەشە جىلدىڭ ءجۇزى بولدى. ەڭبەگى جەمىسسىز دە ەمەس.

امان ءجۇرىڭىز، عىلىمنىڭ باعىن جاندىرعان نوعاي ارۋى!

ءبىز، قازاق جۇرتىنداعى əرىپتەستەرى، ءنəسىپحان حانىمدى مەرەيلى جاسىمەن قۇتتىقتايمىز! مىقتى دەنساۋلىق، زور تابىس تىلەيمىز! مىنا əلەمدى جايلاعان ىندەتتەن تەزىرەك قۇتىلىپ، اسان قايعى اتاسى سەكىلدى "بۇلۇت بولعان ايدى اشقان، مۇنار بولعان كۇندى اشقان" دەپ، جارقىلداپ كۇلىپ، ورتامىزعا ورالاتىن كەزىن اسىعا كۇتەمىز!

باۋىرجان ومارۇلى

پىكىرلەر