Noǵaı arýy

2313
Adyrna.kz Telegram

(Belgili ǵalym, sóz zergeri Nəsiphan Súıinova mereıli jasqa toldy)

Noǵaıdyń qyzy. Jaı qyzy emes, əıgili ǵalym qyzy. Əleýetti ədebıettanýshy. Ultyn súıgen ulaǵatty perzent. Qarymdy qaıratker. Túrki dúnıesin túgeldeýshi. Ədebıettanýshy retinde ilgeridegi Abdýl-Hamıd Jənibekov, Súıin Qapaev, Əshim Sıkalıev syndy sóz sardarlarynyń jolyn jalǵap, bıik beleske shyqty. Jıyrmasynshy ǵasyrdaǵy noǵaı poezııasyn ulttyq jəne jalpytúrkilik tarıhı-mədenı kontekste qarastyryp, fılologııa ǵylymdarynyń doktory atandy. Ult perzenti retinde óz halqynyń murasyn altynnyń synyǵyndaı qasterlep saqtap, kózge túskenin jınaıdy da júredi. Qaıratker retinde de qabilet-qarymyn kórsetip, ana bir jyldarda Qarashaı-Cherkes Respýblıkasynyń Ulttar isteri, buqaralyq kommýnıkaııa jəne baspasóz mınıstri boldy. Bul qyzmetinde de noǵaıdyń sóz ónerin damytýǵa ushan-teńiz paıda keltirdi. Túrki dúnıesin túgeldeýshi retinde barlyq eńbeginde túbi bir, túri uqsas aǵaıyn elderge ortaq murattardy alǵa tartady.

Al osy Nəsiphan qyzdyń qazaq degenge jany bólek. Bizdiń ǵalymdarmen baılanysy berik. Əriptesterin túrli ǵylymı jıyndarǵa shaqyrady. Ózi de jıi keledi. Qur qol kelmeıdi. Qalyń-qalyń kitaptardy ala jetedi. Noǵaı sóziniń qazaq jurtyna qapysyz jetkenin qalaıdy. Qaıtarda da bos qaıtpaıdy. Qazaq kitaptaryn qorjynyna toltyryp alyp attanady. Nur dıdarly Nəsiphannyń noǵaı-qazaq ədebı baılanystaryn damytýmen jalǵyz ózi tynbaı aınalysyp júrgenine birneshe jyldyń júzi boldy. Eńbegi jemissiz de emes.

Aman júrińiz, ǵylymnyń baǵyn jandyrǵan noǵaı arýy!

Biz, qazaq jurtyndaǵy əriptesteri, Nəsiphan hanymdy mereıli jasymen quttyqtaımyz! Myqty densaýlyq, zor tabys tileımiz! Myna əlemdi jaılaǵan indetten tezirek qutylyp, Asan Qaıǵy atasy sekildi "Bulut bolǵan aıdy ashqan, Munar bolǵan kúndi ashqan" dep, jarqyldap kúlip, ortamyzǵa oralatyn kezin asyǵa kútemiz!

Baýyrjan OMARULY

Pikirler