بۇگىنگى جەتىنشى شاقىرىلىمداعى شىمكەنت قالاسى ءماسليحاتىنىڭ كەزەكتەن تىس بەسىنشى سەسسياسىندا مادەنيەت، ءبىلىم، دەنساۋلىق جانە سوت سالالارىندا ەڭبەگى سىڭگەن 20 ازاماتقا «شىمكەنت قالاسىنىڭ قۇرمەتتى ازاماتى» اتاعىن بەرۋ تۋرالى شەشىم قابىلداندى. ودان وزگە 7 ماسەلە قارالدى.
اتاپ ايتقاندا، شىمكەنت قالاسى ءماسليحاتى دەپۋتاتىنىڭ وكىلەتتىگىن مەرزىمىنەن بۇرىن توقتاتۋ تۋرالى ماسەلەگە سايكەس، دەپۋتات ە. قۋاتباەۆتىڭ وكىلەتتىگى اياقتالىپ، ورنىنا ج.تاڭاتاروۆا سايلاندى.
تاعى ءبىر ماڭىزدى ماسەلەنىڭ ءبىرى - شىمكەنت قالاسى بويىنشا الەۋمەتتىك ءمانى بار قاتىناستاردىڭ تىزبەسىن ايقىنداۋدا ءبىرشاما وزگەرىستەر ەنگىزىلدى. بۇل جونىندە جولاۋشىلار كولىگى جانە اۆتوموبيل جولدارى باسقارماسىنىڭ باسشىسى ە.جولداسوۆ باياندادى.
ماسليحاتپەن بەكىتىلگەن «كەشەندى سحەما» جاڭا 78 مارشرۋتتان تۇرادى. ولاردى ەنگىزۋدە دەپۋتاتتار كورپۋسى دا بەلسەندى قاتىستى. دەپۋتاتتاردىڭ قاتىسۋىمەن شالعاي شاعىن اۋداندار مەن تۇرعىن الاپتاردىڭ تۇرعىندارىمەن بىرنەشە رەت كەزدەسۋلەر وتكىزىلىپ، جوسپارلانعان باعىتتار تالقىلانىپ، كەزدەسۋلەر قورىتىندىسى بويىنشا مارشرۋتتارعا ءتيىستى وزگەرىستەر ەنگىزىلدى.
سونىمەن قاتار، سحەماعا سايكەس 7 شاعىن اۆتوبۋستىڭ مارشرۋتتارى قارالعان. بۇل مارشرۋتتار ۇلكەن اۆتوبۋستاردىڭ جۇرۋگە مۇمكىندىگى جوق، كوشەلەرى تار جانە جولاۋشىلار اعىنى تومەن تۇرعىن الاپتارعا قاتىنايتىن بولادى.
قازىرگى تاڭدا قالادا 71 مارشرۋت جولاۋشىلارعا تاسىمالداۋ قىزمەتىن كورسەتۋدە، ونىڭ ىشىندە 56 ماشرۋت كەشەندى سحەماعا سايكەستەندىرىلىپ، قوزعالىس سىزبالارى وڭتايلاندىرىلدى.
سەسسيا سوڭىندا قالا اكىمى م.ايتەنوۆ قالا ءۇشىن قابىلداناتىن ماڭىزدى شەشىمدەر تەك دەپۋتاتتار مەن قالا تۇرعىندارىنىڭ قاتىسۋىمەن عانا بولاتىنىن تاعى ءبىر ەسكە سالىپ ءوتتى.
شىمكەنت قالاسى اكىمىنىڭ ءباسپاسوز قىزمەتى
