ماڭعىستاۋ وبلىسىندا 8 جاستاعى بالا سىنىقشىنىڭ سالعىرتتىعىنان ءبىر قولىنان ايىرىلدى. دارىگەرلەر بالانىڭ قولىن امان الىپ قالا المادى. ءتىپتى ءوزىنىڭ دە ءولىپ كەتۋ قاۋپى بولعانىن ەسكەرتتى، دەپ حابارلايدى «ادىرنا» ۇلتتىق پورتالى Stan.kz سايتىنا سىلتەمە جاساپ.
بۇل تۋرالى ازامات سارسەنباەۆ جەلىدەگى پاراقشادا جازدى.
«2021 جىلى 17 ماۋسىمدا قىزىلساي اۋىلىنىڭ تۇرعىندارى سەگىز جاسار بالاسىمەن ماڭعىستاۋ وبلىستىق بالالار اۋرۋحاناسىنىڭ جەدەل جاردەم بولىمىنە جۇگىندى. دارىگەرلەر شۇعىل تۇردە بالاعا «وڭ قولى شىنتاعىنا دەيىنگى گانگرەنا» دەگەن دياگنوزىن قويدى. وكىنىشكە قاراي، قولىن امان الىپ قالۋ مۇمكىن بولمادى، سوندىقتان وڭ قولدى شىنتاعىنا دەيىن كەسۋ ءۇشىن حيرۋرگيالىق وپەراتسيا جاسالدى.
اتا-انالاردىڭ ايتۋى بويىنشا، وپەراتسيادان ەكى اپتا بۇرىن بالا ۆەلوسيپەدتەن قۇلاپ، قولىن سىندىرىپ العان. سودان كەيىن بالانى جەرگىلىكتى «ەمشىگە» اپارعان، ول قولىن تەكسەرىپ، تاڭعاننان كەيىن بالانى ۇيىنە جىبەرگەن. ون كۇننەن كەيىن نارەستەنىڭ وڭ قولى كوگەرە باستادى. سودان كەيىن عانا بالانىڭ اتا-اناسى دارىگەرلەرگە جۇگىندى. قازىرگى ۋاقىتتا ءسابيدىڭ جاعدايى جاقسى. جاقىن ارادا ونى دارىگەرلەر تەكسەرەدى»، – دەپ جازدى ازامات سارسەنباەۆ.
اناسىنىڭ ايتۋىنشا، ۇلى ۆەلوسيپەدتەن قۇلاپ، قولىن سىندىرىپ العان. اتا-اناسى دەرەۋ سىنىقشىعا اپارىپ، ۇلىنىڭ قولىن سالدىرعان.
«بالام قولىن سىندىرىپ الدى. ءۇيدىڭ جانىندا سىنىقشىعا باردىق. ءبىرىنشى كۇنى قولىن سالدى دا، ءۇش كۇننەن كەيىن كەلىڭدەر دەدى. وعان دەيىن قولى قارايىپ كەلە جاتتى. ءۇشىنشى كۇنى بارعاندا دا ەندى 21 كۇننەن كەيىن كەلەسىڭدەر دەدى. وعان دەيىن قولى كوگەرىپ، ءىسۋى مۇمكىن دەدى. ءبىز سوعان سەندىك. ۇلىمنىڭ قولى كەيدە اۋىردى. قارايا باستادى. ءبىر كۇنى ول ساۋساعىن ۇستاعاندا سەزبەي قالدى. جانسىزدانا باستادى. سول كەزدە دارىگەرگە اپاردىق»، – دەدى اناسى.
دارىگەرلەر بالانى اۋرۋحاناعا كەشىكتىرىپ اكەلگەنىن ايتتى. ونىڭ قولىن ساۋ الىپ قالۋ مۇمكىن بولمادى. ىسىك دەنەگە تاراپ كەتپەس ءۇشىن ءبىر قولىن كەسۋگە تۋرا كەلدى.
«ءبىز بارلىق جاعىنان تەكسەرىپ كوردىك. بىرنەشە دارىگەر قارادى. اسقىنىپ كەتكەنىن ايتتى. سوندىقتان امال جوق قولىن كەستىك. ولاي بولماعان جاعدايدا ىسىك دەنەگە تاراپ، ءولىپ كەتۋ قاۋپى بولدى»، – دەدى بالالار دارىگەرى قايرات قۇرمانوۆ.
دارىگەر وقىس جاعدايدا ەمشى، سىنىقشىعا ەمەس بالانى دەرەۋ اۋرۋحاناعا اكەلۋگە كەڭەس بەرەدى.
«قازىر 21-عاسىر. سىنىقتى سىنىقشىعا سەنۋگە بولمايدى. ىسىك دەنەگە تاراپ كەتسە قاۋىپتى. قانشا جاقسى ماماندار بار. سىنىقتى دا سالادى، ەمدەپ بەرەدى. قولدى دا امان الىپ قالۋعا بولادى. دەر كەزىندە اۋرۋحاناعا اكەلۋ كەرەك»، – دەدى دارىگەر.
"ادىرنا" ۇلتتىق پورتالى
