قازاقستان قالالارىنداعى تازالىق، قاۋىپسىزدىك جانە جايلى قوعامدىق كەڭىستىكتەر شەتەلدىك قوناقتاردىڭ دا نازارىن اۋدارىپ وتىر، دەپ حابارلايدى "ادىرنا" ۇلتتىق پورتالى.
الايدا مەملەكەت باسشىسى قاسىم-جومارت توقاەۆ ەلدى كوركەيتۋ جۇمىستارى حالىقارالىق يميدج ءۇشىن ەمەس، ەڭ الدىمەن ازاماتتاردىڭ تۇرمىس ساپاسىن جاقسارتۋعا باعىتتالۋى كەرەگىن ايتتى.
پرەزيدەنت بۇل تۋرالى پرەزيدەنت ساياباعىندا وتكەن ەكولوگيالىق اكتسيا بارىسىندا مالىمدەدى.
قاسىم-جومارت توقاەۆتىڭ ايتۋىنشا، تازالىق، ءتارتىپ پەن جايلىلىق حالىقتىڭ تۇرمىس مادەنيەتى مەن وركەنيەت دەڭگەيىن كورسەتەدى. سوندىقتان تابيعاتتى قورعاۋ، ءوزارا قۇرمەت پەن بەلگىلەنگەن نورمالاردى ساقتاۋ قوعامنىڭ كۇندەلىكتى ءومىر سالتىنا اينالۋى قاجەت.
«تازا قازاقستان» باستاماسىنىڭ ماڭىزىنا توقتالعان مەملەكەت باسشىسى مۇنداي جۇمىستاردىڭ ەل ازاماتتارىنىڭ پاتريوتتىق سەزىمىن ارتتىرۋعا ىقپال ەتەتىنىن اتاپ ءوتتى. رەسمي مالىمەتكە سايكەس، جالپىۇلتتىق جوباعا ميلليونداعان ازامات قاتىسىپ، ەل اۋماعىندا اباتتاندىرۋ جانە تازالىق جۇمىستارى جۇرگىزىلىپ كەلەدى.
پرەزيدەنت شەتەلدىك قوناقتاردىڭ قازاقستان قالالارىنىڭ تازالىعىنا نازار اۋدارىپ جۇرگەنىن دە ايتتى.
«جاقىندا استانا مەن الماتىعا امەريكانىڭ بەلگىلى كونگرەسسمەندەرى كەلدى. ولار كوشەلەردىڭ تازالىعى مەن جيناقىلىعىنا تاڭعالىپ، قالانى باسقارۋ دەڭگەيى مەن ساپاسىنا جوعارى باعا بەردى. الەۋمەتتىك جەلىلەردە ءىرى قالالارىمىزدىڭ كەلبەتىنە ءتانتى بولعان شەتەلدىك قوناقتار مەن تۋريستەردىڭ بەينەجازبالارىن ءجيى بايقايمىز»، – دەدى قاسىم-جومارت توقاەۆ.
مەملەكەت باسشىسى كورىكتى قوعامدىق كەڭىستىكتەر، قاۋىپسىزدىك پەن قولايلىلىق قازاقستان تۋرالى شەتەلدە وڭ پىكىر قالىپتاستىرۋى مۇمكىن ەكەنىن اتاپ ءوتتى. دەگەنمەن نەگىزگى ماقسات ەلدىڭ حالىقارالىق ءيميدجىن جاقسارتۋ ەمەس، ازاماتتارعا جايلى ورتا قالىپتاستىرۋ بولۋى كەرەگىن ايتتى.
ء«بىز يميدج ءۇشىن جۇمىس ىستەمەي، ازاماتتارىمىزدىڭ الەۋمەتتىك جاعدايىن جاقسارتۋدى ويلاۋىمىز كەرەك. باستى ماقسات – وسى»، – دەدى پرەزيدەنت.
