Mańǵystaý oblysynda 8 jastaǵy bala synyqshynyń salǵyrttyǵynan bir qolynan aıyryldy. Dárigerler balanyń qolyn aman alyp qala almady. Tipti óziniń de ólip ketý qaýpi bolǵanyn eskertti, dep habarlaıdy «Adyrna» ulttyq portaly Stan.kz saıtyna silteme jasap.
Bul týraly Azamat Sársenbaev jelidegi paraqshada jazdy.
«2021 jyly 17 maýsymda Qyzylsaı aýylynyń turǵyndary segiz jasar balasymen Mańǵystaý oblystyq balalar aýrýhanasynyń jedel járdem bólimine júgindi. Dárigerler shuǵyl túrde balaǵa «oń qoly shyntaǵyna deıingi gangrena» degen dıagnozyn qoıdy. Ókinishke qaraı, qolyn aman alyp qalý múmkin bolmady, sondyqtan oń qoldy shyntaǵyna deıin kesý úshin hırýrgııalyq operaııa jasaldy.
Ata-analardyń aıtýy boıynsha, operaııadan eki apta buryn bala velosıpedten qulap, qolyn syndyryp alǵan. Sodan keıin balany jergilikti «emshige» aparǵan, ol qolyn tekserip, tańǵannan keıin balany úıine jibergen. On kúnnen keıin náresteniń oń qoly kógere bastady. Sodan keıin ǵana balanyń ata-anasy dárigerlerge júgindi. Qazirgi ýaqytta sábıdiń jaǵdaıy jaqsy. Jaqyn arada ony dárigerler tekseredi», – dep jazdy Azamat Sársenbaev.
Anasynyń aıtýynsha, uly velosıpedten qulap, qolyn syndyryp alǵan. Ata-anasy dereý synyqshyǵa aparyp, ulynyń qolyn saldyrǵan.
«Balam qolyn syndyryp aldy. Úıdiń janynda synyqshyǵa bardyq. Birinshi kúni qolyn saldy da, úsh kúnnen keıin kelińder dedi. Oǵan deıin qoly qaraıyp kele jatty. Úshinshi kúni barǵanda da endi 21 kúnnen keıin kelesińder dedi. Oǵan deıin qoly kógerip, isýi múmkin dedi. Biz soǵan sendik. Ulymnyń qoly keıde aýyrdy. Qaraıa bastady. Bir kúni ol saýsaǵyn ustaǵanda sezbeı qaldy. Jansyzdana bastady. Sol kezde dárigerge apardyq», – dedi anasy.
Dárigerler balany aýrýhanaǵa keshiktirip ákelgenin aıtty. Onyń qolyn saý alyp qalý múmkin bolmady. Isik denege tarap ketpes úshin bir qolyn kesýge týra keldi.
«Biz barlyq jaǵynan tekserip kórdik. Birneshe dáriger qarady. Asqynyp ketkenin aıtty. Sondyqtan amal joq qolyn kestik. Olaı bolmaǵan jaǵdaıda isik denege tarap, ólip ketý qaýpi boldy», – dedi balalar dárigeri Qaırat Qurmanov.
Dáriger oqys jaǵdaıda emshi, synyqshyǵa emes balany dereý aýrýhanaǵa ákelýge keńes beredi.
«Qazir 21-ǵasyr. Synyqty synyqshyǵa senýge bolmaıdy. Isik denege tarap ketse qaýipti. Qansha jaqsy mamandar bar. Synyqty da salady, emdep beredi. Qoldy da aman alyp qalýǵa bolady. Der kezinde aýrýhanaǵa ákelý kerek», – dedi dáriger.
"Adyrna" ulttyq portaly
