استانادا ءوتىپ جاتقان Atyrau Creative Days كرەاتيۆتى جارمەڭكەسىنىڭ العاشقى كۇنى قورىتىندىلاندى.
بۇگىن جارمەڭكە الاڭىندا اتىراۋلىق ديزاينەرلەر، قولونەر شەبەرلەرى، سۋرەتشىلەر مەن ونەرپازدار ءوز شىعارماشىلىعىن ەلوردا تۇرعىندارى مەن قوناقتارىنا تانىستىردى. العاشقى كۇننىڭ وزىنە 3000-عا جۋىق كورەرمەن كەلىپ، جارمەڭكە جۇمىسىنا قىزىعۋشىلىق تانىتتى.
كۇن باعدارلاماسىندا مۋزىكالىق جانە تەاترلاندىرىلعان قويىلىمدار، شىعارماشىلىق تانىستىرىلىمدار، ۇلتتىق جانە زاماناۋي ونەر تۋىندىلارىنىڭ كورمەسى ءوتتى. سونىمەن قاتار Fashion Design باعىتى بويىنشا ءسان كورسەتىلىمى ۇيىمداستىرىلىپ، اتىراۋلىق ديزاينەرلەردىڭ جاڭا توپتامالارى كوپشىلىك نازارىنا ۇسىنىلدى.
جارمەڭكە بارىسىندا كرەاتورلاردىڭ اۆتورلىق بۇيىمدارىنا قىزىعۋشىلىق تانىتىپ، ساتىپ العاندار دا بولدى. وسىلايشا، اتىراۋلىق شىعارماشىلىق ونىمدەر استانا اۋديتورياسىنا ۇسىنىلىپ، ناقتى ساتىلىمدارعا ۇلاستى.
Atyrau Creative Days ەرتەڭ دە جالعاسادى.
