الماتى وبلىسىندا جەر تەلىمىنە قاتىستى داۋ باسىلار ەمەس. ەكى شارۋا قوجالىعىنىڭ اراسىنداعى ءىس سوتقا دەيىن جەتكەن. ءبىرى ەگىن ەكسە، ەندى ءبىرى وندا مال جايادى ەكەن. قانشا ەسكەرتكەنىممەن، ەلەۋسىز قالدىرىپ ەسكى ادەتىنە باسادى دەگەن شارۋا، ماڭايدى اينالدىرا قازىپ تاستاعان. قاسىمبەك اۋىلىنداعى داۋلى ماسەلەنى ءتىلشىمىز ءبىلىپ قايتتى. بۇل تۋرالى «ادىرنا» ۇلتتىق پورتالى «ەۋرازيا» ءبىرىنشى ارناسىنا سىلتەمە جاساپ حابارلايدى.
جەر ءۇشىن تالاس-تارتىس مۇندا بيىل عانا باستالماعان. قاسىمبەك اۋىلىنىڭ ماڭايىنداعى تاۋ بوكتەرىندەگى القاپقا شارۋالاردىڭ ءبىرى ەگىن ەكسە، ەكىنشىسى مال باعۋدى كاسىپ ەتىپ كەلەدى ەكەن. الايدا، ءتورت تۇلىك ەككەن ءداندى-داقىلعا اۋىز سالىپ جىل سايىن زاردابىن تارتقىزاتىن كورىنەدى. 33 گەكتار جەرى بار كورشىمە قانشا ەسكەرتسەم دە، ەسكى ادەتىنە باسۋىن جالعاستىرىپ ءجۇر دەيدى، شارۋا تەلمان مامەدحاسينوۆ.
«ول جەرىن جالعا بەرەدى. 400 قوي ۇستاعان جالعا الۋشىلاردىڭ ءبىرى جايىلىم جەتپەگەن سوڭ مەنىڭ جەرىمە مالىن ايدادى. قانشا رەت اكىمدىككە دە، پوليتسياعا دا ارىزداندىم. كەلىپ، جەر يەسى نۇرادىلمەن سويلەسىپ، ەسكەرتۋ جاسايدى. بىراق ودان شىققان قورىتىندى جوق»، - دەيدى شارۋا تەلمان مامەدحاسينوۆ.
تەلماننان بولەك مۇندا تاعى ءبىر شارۋا قوجالىعىنىڭ يەسى مالدىڭ ەگىستىككە كىرىپ، ەندى شىعىپ كەلە جاتقان ءونىمدى تاپتاپ كەتەنىن جەتكىزدى.
«ەگىن ەگەمىز كۇزدىك. سونى ءبىزدىڭ كۇزدىك ەگىن ارقىلى جايىلىمعا ايدايدى كۇزدە. سەنتيابر، وكتيابر ايىندا ەگىلگەن كۇزدىكتەن كەيىن. سونداي پروبلەمالار بار. ول ەندى مۇنداي مال ۇستايتىن بولسا ونداي پروبلەما بولا بەرەدى»، - دەيدى شارۋا ادىلەت اليشەۆ.
جەر يەسى ءنۇرادىل راحمەتوللامەن تەلمان مامەدحاسينوۆتىڭ اراسىنداعى جاعدايدان جەرگىلىكتى اكىمدىك تە حاباردار. بىرنەشە رەت بۇل ماسەلە توڭىرەگىندە سويلەسىپتى. الايدا، ايتىلعان ءسوز سول جەردە قالىپ قويعانداي. ءتىپتى، 33 گەكتار جەرگە قانشا مال ۇستاۋعا رۇقسات بار دەگەنگە بىلاي دەپ جاۋاپ بەردى.
«زاڭ بويىنشا ورتاشا العاندا ءبىر مالعا 3 گەكتاردان دەپ ەسەپتەگەن نەگىزىندە. ءتۇسىندىرۋ جۇمىسىن جۇرگىزگەنبىز كەلىپ. ءبىر، ەكى رەت كەلىپ ايتىلعان. اكيمات تاراپىنا دا شاقىرىپ سويلەسكەنبىز»، - دەيدى جامبىل اۋدانى جەر قاتىناستارى ءبولىمىنىڭ باسشىسى اسقار بايبولات.
ال ءنۇرادىل راحمەتوللا قازىرگى ۋاقىتتا ەشقانداي مالى جوعىن ايتىپ، قورا-جايدى جالعا بەرگەنىن حابارلادى.
«قازىرگى جاعدايدا مەنىڭ شارۋا قوجالىعىمدا ەشقانداي مال جوق. مەنىڭ شارۋاشىلىعىمنىڭ قورا جايىن ءبىر كاسىپكەر جىگىتتەر الىپ، قۇربان ايت مەرەكەسىنە مال بورداقىلاپ، قوي دايارلاپ جاتىر. ول مالدار شىقسا دا، ءوز شارۋا قوجالىعىمىنىڭ ورتاسىنداعى كولدەن سۋ ىشەدى. قايتا قوراعا كەلەدى»، - دەيدى شارۋا ءنۇرادىل راحمەتوللا.
ءتورت تۇلىك مال باستاعان ءىسىنىڭ بەرەكەسىن العان سوڭ تەلمان مامەدحاسينوۆ ەگىننىڭ اينالاسىن قازىپ تاستاعان. بۇعان ءنۇرادىل راحمەتوللا زاڭسىز دەپ داۋرىققان ەكەن. الايدا، زاڭگەرلەر ءبارى تالاپقا ساي دەيدى.
«قازىلعان ارىعى ءوزىنىڭ جەكە تەرريتورياسىندا قازىلعان. ەشكىمگە دە، شارۋا قوجالىعى ءنۇرادىل ايتقانداي، باسقا دا ءۇشىنشى تۇلعالارعا زيان كەلتىرمەيدى. بىرىنشىدەن ايتىپ كەتەتىنىم سول. ەكىنشىدەن، بۇل قازىلعان ارىقتىڭ زاڭ جۇزىندە جەر كودەكسىنە سايكەس قاراما قايشىلىق جوق»، - دەيدى زاڭگەر نۇرجان ماقساتوۆ.
ءبىر-بىرىمەن وسى ۋاقىتقا دەيىن بىتىمگە كەلمەگەن قوس شارۋانىڭ اراسىنداعى داۋعا ەندى زاڭ جۇزىندە نۇكتە قويىلماق. ويتكەنى، وسى ۋاقىتقا دەيىن ناتيجەلى ءونىم الا الماي، قىپ-قىزىل شىعىنعا باتتىم دەگەن شارۋا سوتقا ارىز تۇسىرگەن.
"ادىرنا" ۇلتتىق پورتالى
