Almaty oblysynda jer telimine qatysty daý basylar emes. Eki sharýa qojalyǵynyń arasyndaǵy is sotqa deıin jetken. Biri egin ekse, endi biri onda mal jaıady eken. Qansha eskertkenimmen, eleýsiz qaldyryp eski ádetine basady degen sharýa, mańaıdy aınaldyra qazyp tastaǵan. Qasymbek aýylyndaǵy daýly máseleni tilshimiz bilip qaıtty. Bul týraly «Adyrna» ulttyq portaly «Eýrazııa» birinshi arnasyna silteme jasap habarlaıdy.
Jer úshin talas-tartys munda bıyl ǵana bastalmaǵan. Qasymbek aýylynyń mańaıyndaǵy taý bókterindegi alqapqa sharýalardyń biri egin ekse, ekinshisi mal baǵýdy kásip etip keledi eken. Alaıda, tórt túlik ekken dándi-daqylǵa aýyz salyp jyl saıyn zardabyn tartqyzatyn kórinedi. 33 gektar jeri bar kórshime qansha eskertsem de, eski ádetine basýyn jalǵastyryp júr deıdi, sharýa Telman Mamedhasınov.
«Ol jerin jalǵa beredi. 400 qoı ustaǵan jalǵa alýshylardyń biri jaıylym jetpegen soń meniń jerime malyn aıdady. Qansha ret ákimdikke de, polıııaǵa da aryzdandym. Kelip, jer ıesi Nurádilmen sóılesip, eskertý jasaıdy. Biraq odan shyqqan qorytyndy joq», - deıdi sharýa Telman Mamedhasınov.
Telmannan bólek munda taǵy bir sharýa qojalyǵynyń ıesi maldyń egistikke kirip, endi shyǵyp kele jatqan ónimdi taptap ketenin jetkizdi.
«Egin egemiz kúzdik. Sony bizdiń kúzdik egin arqyly jaıylymǵa aıdaıdy kúzde. Sentıabr, oktıabr aıynda egilgen kúzdikten keıin. Sondaı problemalar bar. Ol endi mundaı mal ustaıtyn bolsa ondaı problema bola beredi», - deıdi sharýa Ádilet Alıshev.
Jer ıesi Nurádil Rahmetollamen Telman Mamedhasınovtyń arasyndaǵy jaǵdaıdan jergilikti ákimdik te habardar. Birneshe ret bul másele tóńireginde sóılesipti. Alaıda, aıtylǵan sóz sol jerde qalyp qoıǵandaı. Tipti, 33 gektar jerge qansha mal ustaýǵa ruqsat bar degenge bylaı dep jaýap berdi.
«Zań boıynsha ortasha alǵanda bir malǵa 3 gektardan dep eseptegen negizinde. Túsindirý jumysyn júrgizgenbiz kelip. Bir, eki ret kelip aıtylǵan. Akımat tarapyna da shaqyryp sóıleskenbiz», - deıdi Jambyl aýdany jer qatynastary bóliminiń basshysy Asqar Baıbolat.
Al Nurádil Rahmetolla qazirgi ýaqytta eshqandaı maly joǵyn aıtyp, qora-jaıdy jalǵa bergenin habarlady.
«Qazirgi jaǵdaıda meniń sharýa qojalyǵymda eshqandaı mal joq. Meniń sharýashylyǵymnyń qora jaıyn bir kásipker jigitter alyp, Qurban aıt merekesine mal bordaqylap, qoı daıarlap jatyr. Ol maldar shyqsa da, óz sharýa qojalyǵymynyń ortasyndaǵy kólden sý ishedi. Qaıta qoraǵa keledi», - deıdi sharýa Nurádil Rahmetolla.
Tórt túlik mal bastaǵan isiniń berekesin alǵan soń Telman Mamedhasınov eginniń aınalasyn qazyp tastaǵan. Buǵan Nurádil Rahmetolla zańsyz dep daýryqqan eken. Alaıda, zańgerler bári talapqa saı deıdi.
«Qazylǵan aryǵy óziniń jeke terrıtorııasynda qazylǵan. Eshkimge de, sharýa qojalyǵy Nurádil aıtqandaı, basqa da úshinshi tulǵalarǵa zııan keltirmeıdi. Birinshiden aıtyp ketetinim sol. Ekinshiden, bul qazylǵan aryqtyń zań júzinde Jer kodeksine sáıkes qarama qaıshylyq joq», - deıdi zańger Nurjan Maqsatov.
Bir-birimen osy ýaqytqa deıin bitimge kelmegen qos sharýanyń arasyndaǵy daýǵa endi zań júzinde núkte qoıylmaq. Óıtkeni, osy ýaqytqa deıin nátıjeli ónim ala almaı, qyp-qyzyl shyǵynǵa battym degen sharýa sotqa aryz túsirgen.
"Adyrna" ulttyq portaly
