جالپىۇلتتىق رەفەرەندۋم قارساڭىندا قاراعاندىدا قازاقستاننىڭ جاڭا قوعامدىق-ساياسي مودەلىندەگى وڭىرلەردىڭ ءرولى تالقىلاندى. ءبىر ۇستەل باسىنا بيلىك وكىلدەرى، عىلىمي جانە ساراپشىلىق قاۋىمداستىق، ساياسي پارتيالار مەن قوعامدىق ۇيىمداردىڭ وكىلدەرى جينالدى.
«جاڭا كونستيتۋتسيا: قازاقستاننىڭ بولاشاق ينستيتۋتسيونالدىق ارحيتەكتۋراسىنداعى وڭىرلەردىڭ ءرولى» تاقىرىبىنداعى دوڭگەلەك ۇستەل «Amanat» پارتياسىنىڭ وبلىستىق فيليالىندا ءوتتى. قاتىسۋشىلار ازاماتتاردىڭ قۇقىقتارىنا كەپىلدىكتەردى نىعايتۋ، جاڭا ينستيتۋتتاردىڭ — قۇرىلتاي مەن قازاقستان حالىق كەڭەسىنىڭ ءرولى، جاستار، وتباسى جانە قوعام ءۇشىن جاڭا مۇمكىندىكتەر سياقتى ماڭىزدى ماسەلەلەردى تالقىلادى.
قاراعاندى وبلىسىنىڭ اكىمى ەرماعانبەت بولەكپاەۆ جاڭا كونستيتۋتسيا جوباسى مەملەكەتتىڭ جاڭارتىلعان قوعامدىق-ساياسي مودەلىن قالىپتاستىرىپ، وڭىرلەردىڭ مۇمكىندىكتەرىن كەڭەيتەتىنىن اتاپ ءوتتى.
— جاڭا كونستيتۋتسيانىڭ نەگىزگى قاعيداتى — ادامعا باعدارلانۋ. ياعني باستى نازارعا ادام جانە ونىڭ قاجەتتىلىكتەرى قويىلادى. بۇل اتقارۋشى بيلىك جۇيەسىنە، ونىڭ ىشىندە وڭىرلىك اكىمدىكتەرگە قويىلاتىن ناقتى تالاپ، — دەدى ەرماعانبەت بولەكپاەۆ. — ءبىزدىڭ يندۋستريالىق-تەحنولوگيالىق ءوڭىر ءۇشىن نەگىزگى زاڭ جوباسىنىڭ كىرىسپەسى مەن باپتارىندا بەكىتىلگەن جاڭا يدەولوگيالىق ۇستانىمداردىڭ ماڭىزى زور. ولار — ەڭبەكقورلىق، پروگرەسس، ءبىلىم قۇندىلىقتارى، سونداي-اق جوعارى ەكولوگيالىق مادەنيەتتى قالىپتاستىرۋ. جاڭا كونستيتۋتسيا جۇمىسپەن قامتۋ، تسيفرلاندىرۋ، قورشاعان ورتانى قورعاۋ جانە ادامي كاپيتالدى دامىتۋعا باعىتتالعان ۇزاق مەرزىمدى باعدارلامالاردى تۇراقتى قولداۋدىڭ بۇرىن-سوڭدى بولماعان قۇقىقتىق نەگىزىن قالىپتاستىرادى.
جاڭا كونستيتۋتسيانىڭ نەگىزگى مىندەتتەرىنىڭ ءبىرى — قۇقىقتىق مەملەكەت قاعيداتتارىن نىعايتۋ جانە ازاماتتاردىڭ قۇقىقتارىن قورعاۋ كەپىلدىكتەرىن كۇشەيتۋ. قازاقستان رەسپۋبليكاسى پارلامەنتى سەناتى توراعاسىنىڭ ورىنباسارى جاقىپ اسانوۆ سوت جۇيەسىن دامىتۋ جانە سوتتاردىڭ تاۋەلسىزدىگىن كۇشەيتۋ ماسەلەلەرى تۋرالى ايتتى.
قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ زاڭ قىزمەتى دەپارتامەنتىنىڭ ديرەكتورى سەرىك بەركامالوۆ ءوز سوزىندە ەڭبەك زاڭناماسىن دامىتۋ جانە ازاماتتاردىڭ قۇقىقتارىن قورعاۋ كەپىلدىكتەرىن كۇشەيتۋ ماسەلەلەرىنە توقتالدى.
— جاڭا كونستيتۋتسيا جوباسىندا ادامنىڭ ەڭبەك ەتۋ قۇقىعى بەكىتىلەدى. بۇل — كەڭىرەك الەۋمەتتىك ۇعىم. ول تەك ماماندىقتى ەركىن تاڭداۋدى عانا ەمەس، سونىمەن قاتار ەڭبەكتى ادامنىڭ ءوزىن-ءوزى جۇزەگە اسىرۋىنىڭ ماڭىزدى نىسانى رەتىندە مويىنداۋدى بىلدىرەدى، — دەدى ول.
قازاقستان حالىق پارتياسى وبلىستىق فيليالى توراعاسىنىڭ ورىنباسارى ەربولات زاكيروۆ كونستيتۋتسيالىق رەفورمالاردىڭ جاستار ءۇشىن ماڭىزىن اتاپ ءوتتى.
— قازاقستاننىڭ قازىرگى جاستارى — ءبىلىمدى، باستاماشىل ءارى الەمگە اشىق بۋىن. جاڭا كونستيتۋتسيالىق مودەل ولار ءۇشىن ءبىلىم الۋ، كاسىبي تۇرعىدا جۇزەگە اسۋ جانە قوعامدىق ومىرگە قاتىسۋ باعىتىندا قوسىمشا مۇمكىندىكتەر اشادى، — دەدى پارتيا وكىلى.
دوڭگەلەك ۇستەلگە قاتىسۋشىلار كونستيتۋتسيالىق رەفورمالاردى ساراپتامالىق تۇرعىدا سۇيەمەلدەۋدىڭ ماڭىزىن جانە قازاقستاننىڭ جاڭا ينستيتۋتسيونالدىق ارحيتەكتۋراسىن قالىپتاستىرۋدا وڭىرلەردىڭ بەلسەندى ءرول اتقاراتىنىن اتاپ ءوتتى.
