پرەمەر-ءمينيستردىڭ ورىنباسارى، قر سىرتقى ىستەر ءمينيسترى مۇحتار تىلەۋبەردى باكۋگە رەسمي ساپارمەن باردى. وندا ول ازەربايجان پرەزيدەنتى يلحام اليەۆپەن، پرەمەر-مينيستر الي اسادوۆپەن جانە سىرتقى ىستەر ءمينيسترى دجەيحۋن بايراموۆپەن كەزدەستى. كەلىسسوزدەر بارىسىندا ازەربايجان پرەمەر-ءمينيسترى قازاقستاندىق كومپانيالاردى تاۋلى قاراباقتى قالپىنا كەلتىرۋگە قاتىسۋعا شاقىردى، دەپ حابارلايدى «ادىرنا» ۇلتتىق پورتالى.
تىلەۋبەردى ازەربايجان باسشىسىنا قازاقستان پرەزيدەنتى قاسىم-جومارت توقاەۆ پەن تۇڭعىش پرەزيدەنت نۇرسۇلتان نازارباەۆتىڭ جىلى لەبىزدەرى مەن تىلەكتەرىن جەتكىزدى.
يلحام اليەۆ قازاقستان مەن ازەربايجاننىڭ بۇرىننان كەلە جاتقان سەنىمدى قارىم-قاتىناسى تۋرالى ايتىپ ءوتتى.
«بۇل دوستىقتىڭ ىرگەتاسىن كەزىندە نۇرسۇلتان نازارباەۆ پەن گەيدار اليەۆ قالاعان جانە بۇگىندە ەكى ەل پرەزيدەنتتەرى بۇل باعىتتى جالعاستىرۋدا»، - دەدى ول.
ول قاسىم-جومارت توقاەۆتىڭ ازەربايجانعا جوسپارلانعان ساپارى قازاقستان مەن ازەربايجان اراسىنداعى ىنتىماقتاستىققا قوسىمشا سەرپىن بەرەتىنىنە سەنىم ءبىلدىردى.
ازەربايجان ۇكىمەتىنىڭ باسشىسى ساۋدا قاتىناستارىن دامىتۋدىڭ ازەربايجان ونىمدەرىن قازاقستاننىڭ باتىس ايماقتارىنا جەتكىزۋدەگى الەۋەتىن اتاپ ءوتتى. ول قازاقستاندىق كومپانيالاردى بۇگىنگى ازەربايجان قوعامى ءۇشىن باسىمدىق بولىپ سانالاتىن تاۋلى قاراباقتى قالپىنا كەلتىرۋگە بەلسەندى قاتىسۋعا شاقىردى.
"ادىرنا" ۇلتتىق پورتالى
