سوتتالعان اكىم ورىنباسارىنىڭ جازاسى جەڭىلدەتىلدى

اتىراۋ وبلىسى اكىمىنىڭ بۇرىنعى ورىنباسارى باقىتگۇل حامەنوۆانىڭ جازاسى جەڭىلدەتىلدى، دەپ حابارلايدى "ادىرنا" ۇلتتىق پورتالى.

سوت ونىڭ جازا ءتۇرىن بوستاندىعىن شەكتەۋگە اۋىستىردى.

16 ناۋرىز كۇنى اتىراۋ قالاسىنىڭ №2 سوتى پروباتسيا قىزمەتىنىڭ ۇسىنىسىن قاراپ، ءتيىستى شەشىم قابىلداعان. سوت مالىمەتىنشە، حامەنوۆا جازانى وتەۋدى كەيىنگە قالدىرۋ مەرزىمى ىشىندە، ياعني 2026 جىلعى 10 ناۋرىزعا دەيىن زاڭ بۇزباعان جانە اكىمشىلىك جاۋاپكەرشىلىككە تارتىلماعان.

وسىنى ەسكەرگەن سوت قالعان جازا مەرزىمىن بوستاندىعىن شەكتەۋمەن الماستىرىپ، وعان پروباتسيالىق باقىلاۋ بەلگىلەدى.

ەسكە سالايىق، باقىتگۇل حامەنوۆا 2022 جىلدىڭ قاراشا ايىندا پارا الۋ ءىسى بويىنشا كىنالى دەپ تانىلىپ، 7 جىلعا باس بوستاندىعىنان ايىرىلعان بولاتىن. ءىس 4,5 ملن تەڭگەگە بايلانىستى بولعان. بۇل قاراجات اباي قۇنانبايۇلىنا ەسكەرتكىش ورناتۋ جوباسىنا قاتىستى دەلىنگەن. سونىمەن قاتار، سوت ونىڭ مۇلكىن تاركىلەپ، ءومىر بويى مەملەكەتتىك قىزمەتتە جۇمىس ىستەۋ قۇقىعىنان ايىرعان.

الايدا كىشكەنتاي بالالارىنىڭ بولۋىنا بايلانىستى جازا وتەۋ ءۇش جىلعا كەيىنگە قالدىرىلعان ەدى. حامەنوۆا ءوز كىناسىن مويىنداماي، ۇكىمگە شاعىم تۇسىرگەنىمەن، سوت شەشىمى وزگەرىسسىز قالعان.

سونداي-اق، بۇعان دەيىن ونىڭ تويدا جۇرگەن ۆيدەوسى الەۋمەتتىك جەلىدە تاراعان. باس پروكۋروردىڭ ورىنباسارى عالىمجان قويگەلديەۆتىڭ ايتۋىنشا، جازانى وتەۋ مەرزىمى كەيىنگە قالدىرىلعان جاعدايدا سوتتالعان ادامعا ءىس-شارالارعا قاتىسۋعا زاڭ بويىنشا تىيىم سالىنبايدى. حامەنوۆا مۇنداي شارالارعا پروباتسيا قىزمەتىنىڭ رۇقساتىمەن بارعان.