قر مەملەكەتتىك قىزمەت ىستەرى اگەنتتىگى جول قۇرىلىسى سالاسىندا جۇزدەگەن ميلليارد تەڭگەنىڭ ءتيىمسىز جۇمسالعانىن مالىمدەدى، دەپ حابارلايدى “ادىرنا” ۇلتتىق پورتالى.
اگەنتتىك 2025 جىلى جۇرگىزىلگەن سىبايلاس جەمقورلىق تاۋەكەلدەرىنە قاتىستى سىرتقى تالداۋ ناتيجەلەرىن جاريالادى.
ەسەپكە سايكەس، وڭىرلەردەگى تەكسەرىس بارىسىندا جول قۇرىلىسىنىڭ سمەتالىق قۇنى 11 ملرد تەڭگەگە نەگىزسىز ارتتىرىلعانى انىقتالعان.
سونىمەن قاتار 362 ەسكىرگەن جوبالىق-سمەتالىق قۇجات تىركەلىپ، ولاردى ازىرلەۋگە 23 ملرد تەڭگە ءتيىمسىز جۇمسالعان. بۇدان بولەك، قۇنى 27 ملرد تەڭگە بولاتىن 324 نىسان مىندەتتى مەملەكەتتىك ساراپتامادان وتپەگەن.
اگەنتتىك دەرەگىنشە، 70 كومپانيا جۇمىس تاجىريبەسى تۋرالى جالعان انىقتامالار پايدالانۋ ارقىلى جالپى سوماسى 408 ملرد تەڭگەنى قۇرايتىن كەلىسىمشارتتارعا قول جەتكىزگەن.
ۆەدومستۆو وكىلدەرى مەردىگەرلەر مەن سۋبمەردىگەرلەرگە قاتىستى قانداي شارا قولدانىلعانىن جانە كەلتىرىلگەن شىعىننىڭ وتەلگەن-وتەلمەگەنىن ناقتىلامادى. الايدا جوسپارلاۋ، قۇرىلىس جانە تەحنيكالىق قاداعالاۋ سالالارىنداعى جۇيەلى ماسەلەلەردى جويۋ ءۇشىن 80-نەن استام ۇسىنىس ازىرلەنگەنى حابارلاندى.
قازىرگى تاڭدا قازاقستاندا ۇلتتىق جول اكتيۆتەرى ساپاسى ورتالىعى ەسكەرتۋلەرى جويىلعانعا دەيىن جولداردى پايدالانۋعا بەرۋگە تىيىم سالىنعان.
اگەنتتىك مالىمەتىنشە، جاڭا پلاتفورما اقپاراتتى ورتالىقتاندىرۋ ارقىلى ءونىم ساپاسى تۋرالى دەرەكتەردى بۇرمالاۋ تاۋەكەلىن ازايتادى. بۇل شارالار 2026 جىلعا جول سالاسىنا بولىنگەن 360 ملرد تەڭگەدەن استام بيۋدجەت قاراجاتىنىڭ اشىق ءارى ءتيىمدى يگەرىلۋىن قامتاماسىز ەتۋگە باعىتتالعان.
