Shymbulak تاۋ كۋرورتىندا اۋەسقوي شاڭعىشىلار اراسىندا شاڭعىمەن جىلدام سىرعاناۋ بويىنشا قازاقستان رەكوردى تىركەلدى. بۇل تۋرالى Shymbulak كۋرورتىنىڭ كوممۋنيكاتسيا دەپارتامەنتى جازدى، دەپ حابارلايدى «ادىرنا» ءتىلشىسى.
«قازاقستان رەكوردتار كىتابى كينەس-2026 دەرەكتەرىنە سايكەس، ەل رەكوردىن اۋەسقوي شاڭعىشى سەرگەي اپەنكو ورناتتى. ونىڭ جىلدامدىق كورسەتكىشى – ساعاتىنا 160,953 كم»،-دەلىنگەن حابارلامادا.
جىلدامدىق ارنايى كاسىبي ALGE Timing ولشەۋ جۇيەسى ارقىلى انىقتالعان.
شاڭعىشىنىڭ ايتۋىنشا، بۇل رەكورد ەلىمىزدەگى تاۋ-شاڭعى كلاستەرىن دامىتۋعا قولداۋ بىلدىرەتىن سيمۆوليكالىق قادام بولعان.
«ۇلكەن جىلدامدىقپەن سىرعاناۋدى ءدال Shymbulak كۋرورتىندا وتكىزۋدەگى ماقسات – ءبىزدىڭ تاۋلارىمىز بەن تراسسالاردىڭ مۇمكىندىگىن كورسەتۋ. بۇل جوبا بۇقارالىق سپورتتىڭ تانىمال بولۋىنا جانە قازاقستاننىڭ قىسقى تۋريزم ورتالىعى رەتىندەگى بەدەلىن نىعايتۋعا ىقپال ەتەدى دەپ ۇمىتتەنەمىن»،– دەدى سەرگەي اپەنكو.
