Premer-Mınıstrdiń orynbasary, QR Syrtqy ister mınıstri Muhtar Tileýberdi Bakýge resmı saparmen bardy. Onda ol Ázerbaıjan prezıdenti Ilham Álıevpen, premer-mınıstr Alı Asadovpen jáne syrtqy ister mınıstri Djeıhýn Baıramovpen kezdesti. Kelissózder barysynda Ázerbaıjan premer-mınıstri qazaqstandyq kompanııalardy Taýly Qarabaqty qalpyna keltirýge qatysýǵa shaqyrdy, dep habarlaıdy «Adyrna» ulttyq portaly.
Tileýberdi Ázerbaıjan basshysyna Qazaqstan Prezıdenti Qasym-Jomart Toqaev pen Tuńǵysh Prezıdent Nursultan Nazarbaevtyń jyly lebizderi men tilekterin jetkizdi.
Ilham Álıev Qazaqstan men Ázerbaıjannyń burynnan kele jatqan senimdi qarym-qatynasy týraly aıtyp ótti.
«Bul dostyqtyń irgetasyn kezinde Nursultan Nazarbaev pen Geıdar Alıev qalaǵan jáne búginde eki el prezıdentteri bul baǵytty jalǵastyrýda», - dedi ol.
Ol Qasym-Jomart Toqaevtyń Ázerbaıjanǵa josparlanǵan sapary Qazaqstan men Ázerbaıjan arasyndaǵy yntymaqtastyqqa qosymsha serpin beretinine senim bildirdi.
Ázerbaıjan úkimetiniń basshysy saýda qatynastaryn damytýdyń Ázerbaıjan ónimderin Qazaqstannyń batys aımaqtaryna jetkizýdegi áleýetin atap ótti. Ol qazaqstandyq kompanııalardy búgingi Ázerbaıjan qoǵamy úshin basymdyq bolyp sanalatyn Taýly Qarabaqty qalpyna keltirýge belsendi qatysýǵa shaqyrdy.
"Adyrna" ulttyq portaly
