كوك تۋدىڭ جەلبىرەگەنى

3553
Adyrna.kz Telegram
فوتو اشىق اقپارات كوزدەرىنەن الىندى
فوتو اشىق اقپارات كوزدەرىنەن الىندى

ءبىز تاۋەلسىزدىككە اڭساپ، زارىعىپ جەتتىك. كوزدى اشىپ – جۇمعانشا ەگەمەندى ەل بولعانىمىزعا وردا بۇزار 30 جىل ءوتىپتى. بيىل تاۋەلسىزدىگىمىزدىڭ وتىز جىلدىعىن تويلايمىز. مەملەكەت باسشىمىز ايتقانداي «ەندى سول تاۋەلسىزدىكتىڭ قاسيەتتى رامىزدەرىن دە ەرەكشە قادىرلەۋىمىز، قاستەرلەۋىمىز كەرەك. ءاربىر ازامات قازاقستاننىڭ تۋىن، ەلتاڭباسىن، ءانۇرانىن تۇمارداي قاسيەت تۇتۋى قاجەت. ەلدىگىمىزدىڭ سىنالاتىن ءبىر تۇسى – وسى»، مەملەكەتتىك رامىزدەر – ەل دامۋىنىڭ اجىراماس بولىگى. سوندىقتان قازاقستاندىقتاردىڭ وسى رامىزدەرگە دەگەن قۇرمەتى، ولاردى بويتۇمارداي قاستەرلەۋى ەرەكشە سەزىلىپ تۇرۋى ءتيىس.

رامىزدەر ارقىلى ەلىمىزدى بۇكىل الەم تانيدى. ويتكەنى وندا قازاق حالقىنىڭ باستان وتكىزگەن تاريحى، مادەنيەتى مەن ءداستۇرى كورىنىس بەرەدى. جاستاردىڭ وتانسۇيگىشتىك سەزىمىن وياتادى، پاتريوتيزمگە ۇندەيدى، باتىلدىققا تاربيەلەيدى. ءتىپتى بالاباقشا بۇلدىرشىندەرى وڭ قولىنىڭ الاقانىن جۇرەك تۇسىنا قويىپ، «مەنىڭ قازاقستانىمدى» شىرقاعاندا ەرەكشە ءبىر سەزىمگە بولەنەتىنىڭ، جىگەرلەنىپ قاناتتاناتىنىڭ راس. بۇل ەل بولاشاعى – جاستاردىڭ ءوز وتانىن، ءوز جەرىن، ءوز ەلىن قورعاۋعا دەگەن سەزىمىن وياتىپ، سەنىمىن نىعايتاتىنى انىق.

4 ماۋسىم – ەلىمىزدىڭ مەملەكەتتىك رامىزدەرى كۇنى. 1992 جىلدىڭ 4 ماۋسىمىندا قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ قول قويعان زاڭدارمەن تۇڭعىش رەت تاۋەلسىز ەلىمىزدىڭ تۋى، ەلتاڭباسى بەكىتىلدى، ال 1992 جىلدىڭ 11 جەلتوقسانىندا مەملەكەتتىك ءانۇرانىمىز تۋرالى زاڭعا قول قويىلدى. مىنە، ەگەمەندىگىمىزدىڭ بەلگىسى رەتىندە بەكىتىلگەن تۋ، ەلتاڭبا جانە ءانۇران  -ۇلتىمىز ءۇشىن اسا قاستەرلى قۇندىلىقتار. مەملەكەتتىك رامىزدەر بارشا قازاقستاندىقتىڭ رۋحىن اسقاقتاتىپ، ۇلتتىق ءبىتىم – بولمىسىن ايشىقتايدى. وتىز جىل بيىكتە جەلبىرەگەن كوك تۋىمىز ماڭگىلىك ەلدىڭ مارتەبەسىن كوتەرە بەرسىن. «تالاسقا تۇسسە جان مەن تۋ – جان ەمەس ماعان كەرەگى. كوك تۋدىڭ جەلبىرەگەنى»،-دەپ اندەتكەن كەلەشەگىمىزدىڭ بولاشاعى جارقىن بولسىن.

 

ارداق قۇماروۆا

پىكىرلەر