شىمكەنتتە الەۋمەتتىك دۇكەندەر سانى ارتادى

2382

قالادا ازىق-تۇلىك باعالارىن تۇراقتاندىرۋ شارالارى اياسىندا 11 شاعىن اۋدانى، ەلشىبەك باتىر كوشەسى №116 مەكەنجايىندا «الەۋمەتتىك دۇكەن» اشىلعان بولاتىن.

الەۋمەتتىك دۇكەننىڭ وزگە ازىق-تۇلىك دۇكەندەردەن ەرەكشەلىگى - حالىق كۇندەلىكتى ءبىرىنشى كەزەكتە تۇتىناتىن ازىق-تۇلىك ونىمدەرىن تومەن ءارى بەلگىلەنگەن باعادا ساتۋى.

مەملەكەت باسشىسىنىڭ اگروونەركاسىپتى دامىتۋ جونىندەگى تاپسىرماسىنا سايكەس «ەگىستىكتەن دۇكەن سورەسىنە دەيىن» جوباسى اياسىندا قالادا مۇنداي دۇكەندەردى كوپتەپ اشۋ جوسپارلانىپ وتىر. وسى ماقساتتا قالاداعى مال بورداقىلاۋمەن اينالىساتىن «قاسقاسۋ-س» شارۋاقوجالىعىنا اينالىمعا 200 ملن. تەڭگە قارىز قاراجات بەرىلىپ، كەلىسىمشارت تۇزىلگەن. كەلىسىمشارت نەگىزىندە شارۋاقوجالىق جوسپارعا سايكەس قالامىزدىڭ حالقى تىعىز ورنالاسقان ايماقتاردا شىلدە جانە تامىز ايلارىندا 2 الەۋمەتتىك دۇكەن اشۋدى جوسپارلاپ وتىر. وندا كوكونىس، ەت ونىمدەرى جانە وزگە دە ازىق-تۇلىك ساتىلاتىن بولادى.

بۇدان بولەك، شارۋاقوجالىق وسى جىلدىڭ تامىز ايىندا 4 جىلجىمالى ەت ونىمدەرىن ساتاتىن ساۋدا تىركەمەلەرىن ىسكە قوسۋدى دا جوسپارلاپ وتىرعان جايى بار. وسىعان وراي، اۋىل شارۋاشىلىعى جانە ۆەتەريناريا باسقارماسىنىڭ باسشىسى ا.قانىبەكوۆ شىلدە ايىندا اشىلۋى جوسپارلانىپ وتىرعان 18 شاعىن اۋدانىنداعى «الەۋمەتتىك دۇكەنگە» بارىپ، ونداعى جۇمىس بارىسىمەن تانىستى.

ايتا كەتەيىك، الەۋمەتتىك دۇكەننىڭ قۇرىلىس جۇمىستارى تولىعىمەن اياقتالعان. قازىرگى تاڭدا دۇكەنگە قاجەتتى سورەلەر، جابدىقتاردى ورنىقتىرۋ جۇمىستارى جۇرگىزىلۋدە. الداعى ۋاقىتتا «الەۋمەتتىك دۇكەندەر» اشىلعان جاعدايدا تۇرعىندار ساپالى ءارى ارزانداتىلعان باعادا ازىق-تۇلىك ونىمدەرىن ساتىپ الا الاتىن بولادى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر
رەداكتسيا تاڭداۋى