شىمكەنت قالاسىندا 1 ماۋسىم – حالىقارالىق بالالاردى قورعاۋ كۇنىنە ارنالعان مەرەكەلىك ءىس-شارادا بالالار ۇيىندەگى 30 ءبۇلدىرشىننىڭ تۇساۋى كەسىلدى.
1-3 جاس ارالىعىنداعى بالالاردىڭ تۇساۋىن قالا اكىمى م.ايتەنوۆ، ءماسليحات حاتشىسى ب.نارىمبەتوۆ، شىمكەنت قالاسىنىڭ قۇرمەتتى ازاماتى ءو.مەلدەحانوۆ، قالانىڭ باس يمامى باقداۋلەت نۇرماتۇلى، «تۇركىستان» سارايىنىڭ ديرەكتورى س.مايعازيەۆ پەن قولونەر شەبەرى بولات بەيىسبەكوۆ، وپەرا جانە بالەت تەاترىنىڭ ديرەكتورى مايرا مۇحامەدقىزى، «شانشار» ءازىل-سىقاق تەاترىنىڭ ديرەكتورى ۋ.ءابدىرايىموۆ، ايتىسكەر اقىن ا.لەۋباەۆا سىندى ەلگە سىيلى، بەلگىلى ازاماتتار كەستى.
تۇساۋكەسەر راسىمىنەن سوڭ قاتىسۋشىلار بالالارعا اق جول تىلەپ، اق باتالارىن بەردى.
بالالار كۇنىنە وراي ۇيىمداستىرىلعان شارادا «جەتى قازىنا» اتتى ينتەللەكتۋالدى ويىن-ساۋىق ۇيىمداستىرىلدى. مۇندا بالالار ءتورت توپقا ءبولىنىپ، «تاۋەلسىزدىك» ساياباعىندا كومبەگە جاسىرىلعان 7 قازىنانى ىزدەيدى. ال، ەتنواۋىلدا «اسىق»، «تەپپە»، «اساۋ ماستەك» ويناپ، «ساداق اتۋ»، «ات ەرتتەۋدەن» جارىسىپ، قازاق حاندارىنا شولۋ جاساپ، توعىزقۇمالاقتان ەسەپ شىعارۋدان سايىس ءوتتى. ال، وسكەلەڭ قىزدار قۇراق قۇراۋدان جارىستى. سايىس سوڭىندا بالالارعا ارنايى سىيلىقتار تاراتىلدى.
ادەت-عۇرىپ جانە سالت-ءداستۇر ورتالىعىنىڭ ۇيىمداستىرۋىمەن وتكەن مەرەكەلىك شارا كونتسەرتتىك باعدارلامامەن جالعاسىن تاپتى.
شىمكەنت قالاسى اكىمدىگىنىڭ ءباسپاسوز قىزمەتى
