شىمكەنت قالاسىنداعى قوعامدىق كولىك 100 جاڭا اۆتوبۋسپەن تولىعىپ، 6 جاڭا باعىت اشىلدى. قوعامدىق كولىكتەردىڭ كىلتىن تابىستاۋعا قالا اكىمى م.ايتەنوۆ قاتىسىپ قىزمەتكەرلەرگە ساتتىلىك تىلەدى.
مەملەكەت باسشىسىنىڭ حالىققا قولايلى جاعداي جاساۋ تاپسىرماسى اياسىندا قالادا جۇيەلى جۇمىستار اتقارىلىپ جاتقانىن ايتقان قالا باسشىسى قالاداعى قوعامدىق كولىك بيىلعى جىلى 80 پايىزعا جاڭاراتىنىن ايتتى.
«قالامىز حالىققا قولايلى بولۋ ءۇشىن قوعامدىق كولىك جۇيەسىن ودان ءارى دامىتامىز. بىلتىر 590 جاڭا اۆتوبۋس ساتىپ الىنىپ، ونىڭ 200 ىسكە قوسىلعان بولاتىن. مىنە بۇگىن قوعامدىق كولىك تاعى جاڭا 100 اۆتوبۋسپەن تولىعىپ وتىر. قالعان اۆتوبۋستاردى دا رەت-رەتىمەن ىسكە قوساتىن بولامىز. سوندا قوعامدىق كولىك 80 پايىزعا جاڭارادى. بۇل اۆتوبۋستار گازبەن جۇرەدى، كونديتسيونەرى بار، مۇمكىنشىلىگى شەكتەۋلى ازاماتتارىمىزعا قولايلى»،-دەدى قالا اكىمى.
سونىمەن قاتار اكىم قوعامدىق كولىك جۇرگىزۋشىلەرى ءبىرىنشى كەزەكتە مادەنيەتتى بولۋ كەرەك ەكەندىگىن اتاپ ءوتتى.
بۇگىنگە دەيىن، مەگاپوليستە 71 باعىت بولسا، ەندى قوسىمشا 6 باعىتقا تولىعىپ، قوعامدىق كولىكتەردىڭ سانى 880 اۆتوبۋسقا جەتتى. ەندىگى جەردە جاڭا اۆتوبۋستار سامال 3, اق جايىق، كۇنشىعىس، حامزا، شىمسيتي، قايتپاس 1 مولتەك اۋداندارىنا جۇرەتىن بولادى.
وتكەن ايدا شىمكەنت قالاسىندا كۇن سايىن 200 اۆتوبۋسقا قىزمەت كورسەتۋگە مۇمكىندىك بەرەتىن مەتان گازىن تولتىراتىن كومپرەسسورلىق ستانتسيا ىسكە قوسىلعان بولاتىن. الداعى ۋاقىتتا كۇن سايىن 300 اۆتوبۋسقا قىزمەت كورسەتۋگە مۇمكىندىك بەرەتىن قالادا تاعى ءبىر كومپرەسسوردى ىسكە قوسۋ جوسپارلانعان.
ەگەر دە قوعامدىق كولىكتەردىڭ كەشىگۋى جۇرگىزۋشىلەردىڭ دورەكى سويلەۋى جانە باسقا دا قوعامدىق كولىككە قاتىستى ساۋالدارىڭىز تۋىنداسا @Shymkent «109» بىرىڭعاي بايلانىس نومىرىنە حابارلاسۋلارىڭىزعا بولادى.
شىمكەنت قالاسى اكىمدىگىنىڭ ءباسپاسوز قىزمەتى
