ۇيدە وتىرىپ جۇمىس ىستەۋ ارقىلى تابىس تاباتىن ينتەرنەت ماماندىقتار سوڭعى جىلدارى تانىمالدىلىققا يە بولدى. اسىرەسە پاندەميا كەزىندە ونلاين جۇمىس جاسايتىنداردىڭ قاراسى كوبەيدى. بۇگىندە كوپشىلىك ەشقايدا شىقپاي-اق مانساپ قۇرىپ، قوعامعا پايداسىن تيگىزۋدە. ءسىز دە ۇيدە وتىرىپ، اقشا تاپقىڭىز كەلە مە؟ ەندەشە ماقالانى مۇقيات وقىپ شىعىڭىز. نازارلارىڭىزعا ەڭ تانىمال ونلاين-ماماندىقتار ءتىزىمىن ۇسىنامىز.
كوپيرايتەر
كوپيرايتينگ - ينتەرنەتتە اقشا تابۋدىڭ ەڭ تانىمال ادىستەرىنىڭ ءبىرى. نەگىزگى مىندەت - پايدالى ماتىندەردى، جارنامالىق ماتەريالداردى قۇرۋ. بۇل ساناتقا رەداكتورلار جانە جازۋشىلار كىرەدى. ەگەر ءسىز كوركەم جازا بىلسەڭىز، وسى ءبىر زاماناۋي ماماندىق ارقىلى اقشا تابا الاسىز. ۆاكانسيالاردى hh.kz سايتىنان قاراي الاسىز.
كونتەنت-مەنەدجەر
كونتەنت-مەنەدجەر سايتتاردى باقىلاپ، ولاردى ماتىنمەن، فوتوسۋرەتتەرمەن، بەينەلەرمەن تولتىرۋعا جاۋاپ بەرەدى. ول سايتتى اقپاراتپەن تولتىرىپ قانا قويماي، ماقساتتى اۋديتوريا مەنوقىرمانداردى نە قىزىقتىراتىنىن انىقتايدى.
سايت رەداكتورى
سايت رەداكتورىنىڭ جۇمىسى كونتەنت-مەنەدجەرىنە ۇقساس. رەداكتوردىڭ كونتەنت-مەنەدجەردەن ايىرماشىلىعى - جاريالاعان ءماتىننىڭ ساپاسىن باقىلاۋ. رەداكتور قاتەلەردى تۇزەتەدى، فورۋمدا بايلانىس جاسايدى، كوپيرايتەرلەرگە تاپسىرمالار بەرەدى. سودان كەيىن ولاردىڭ جۇمىسىن تەكسەرەدى.
بلوگەر
ءوزى ءۇشىن جۇمىس ىستەگىسى كەلەتىن جانە ءوز پىكىرىن بىلدىرۋدەن قورىقپايتىن ادامدار ءۇشىن بلوگەر بولۋعا بولادى. بۇل باعىت جاستار اراسىندا وتە تانىمال. ەگەر ءسىز بلوگەر بولساڭىز، كەز كەلگەن الەۋمەتتىك جەلىدە تاۋلىك بويى ۆيدەوبەينە جازىپ، تىكەلەي ەفيرگە شىعىپ، فوتوسۋرەتتەر جاريالاۋىڭىز كەرەك. بلوگتى ءتۇسىرۋ ءۇشىن، ارينە، جاقسى كامەرا الىپ، كوپشىلىكتى قىزىقتىراتىن تاقىرىپتى تابۋ كەرەك. قازىرگى تاڭدا وتاندىق بلوگەرلەر ورتاشا ەسەپپەن ايىنا 500 مىڭ تەڭگە تابادى. تابىستىڭ نەگىزگى كوزى – جارناما.
ۆەب-باعدارلاماشىلار
جوعارىدا اتالعان ماماندار سايتتاردى تولتىرۋمەن اينالىسسا، ۆەب-باعدارلاماشىلار سول سايتتاردى جاسايدى. سايتتى قۇرۋمەن قاتار، ولار باعدارلامالار مەن ستسەناريلەردى جازۋعا، سايتتى جاڭارتۋعا جانە قاۋىپسىزدىكتى ساقتاۋعا جاۋاپ بەرەدى. بۇل سالانىڭ مامانى ادەتتە جاقسى جالاقى الادى. بىراق بۇل تاڭقالارلىق ەمەس، ويتكەنى جۇمىس جاساۋ ءۇشىن ۆەب-باعدارلامالاۋ تىلدەرىن جەتىك ءبىلۋ كەرەك.
ۆەب-ديزاينەر
سايتتى قۇرۋعا ۆەب-ديزاينەر دە ات سالىسادى. ول سايت ينتەرفەيستەرىن جوبالاۋعا، يدەيا مەن تۇجىرىمداماعا، بەزەندىرۋگە جاۋاپ بەرەدى.
ءموبيلدى قوسىمشالاردى قۇراستىرۋشى
ءموبيلدى قوسىمشالاردى قاشىقتان دا جاساۋعا بولادى. قازىرگى ۋاقىتتا بۇل ۇلكەن اقشا الىپ كەلەتىن ەڭ ءساتتى باعىتتاردىڭ ءبىرى. پلانەتانىڭ كەز كەلگەن تۇرعىنىندا ۇيالى تەلەفون بار. ول ۇنەمى بىرنەشە قوسىمشالاردى ورناتادى. سول سەبەپتى دە جاقسى ءموبيلدى قوسىمشا جاساۋ ارقىلى كوپ اقشا تابا الاسىز.
اۋدارماشى
شەت تىلدەرىن جاقسى بىلەتىندەر ءۇشىن قاشىقتان جۇمىس ىستەۋدىڭ تاعى ءبىر مۇمكىندىگى بار. ءسىز ۇيدە وتىرىپ-اق ماتىندەردى اۋدارا الاسىز. بۇل كوپيرايتەر جۇمىسىنا ۇقساس. الايدا اۋدارما ءۇشىن تولەم كوپيرايتينگكە قاراعاندا الدەقايدا جوعارى.
توپ اكىمگەرى
ينتەرنەتتى پايدالانۋشىلاردىڭ بارلىعى دەرلىك الەۋمەتتىك جەلىدە وتىرادى. كەز كەلگەن الەۋمەتتىك جەلىدە ءارتۇرلى تاقىرىپتار بويىنشا توپتار بار. اكىمگەردىڭ نەگىزگى جۇمىسى - توپتى تارتىپتە ۇستاۋ.
SMM مامانى
بۇل ماماندىق باسقالارعا ۇقساس، بىراق ايتارلىقتاي ايىرماشىلىق بار. SMM-مامانى وقىرمانداردىڭ كوڭىلىن كوتەرۋ جانە جاعىمدى يميدج قالىپتاستىرۋ ءۇشىن برەندتى بارلىق جەلىلەردە بىردەن ۇسىنادى. بۇل ماسەلەدە PR تەحنولوگيالارى مەن الەۋمەتتىك جەلىلەردى ءتۇسىنۋ كەرەك. ويتكەنى ءار جەلىنىڭ وزىندىك جارنامالىق ەرەكشەلىگى بار. بۇل بايىپتى اناليتيكالىق جۇمىس.
ونلاين رەپەتيتور
ينتەرنەتكە بىرتىندەپ كوشىپ كەلگەن تاعى ءبىر ماماندىق - وقىتۋشى. سكايپ، Zoom سياقتى ۆيدەو بايلانىستىڭ كوپتەگەن جولدارىمەن ۇيدەن شىقپاي بالالاردى وقىتۋعا بولادى. سونداي-اق repetitor.kz سايتىنا تىركەلىپ، ءوز جارناماڭىزدى قالدىرا الاسىز.
بايلانىس ورتالىعىنىڭ وپەراتورى
كۇندەلىكتى جۇمىسقا جاقىن، بىراق ۇيدە وتىرىپ جاساۋعا بولاتىن ماماندىق - بايلانىس ورتالىعىنىڭ وپەراتورى. قاراپايىم سوزبەن ايتقاندا، ءسىز كليەنتتەرگە قوڭىراۋ شالىپ، ولاردىڭ قوڭىراۋلارىنا جاۋاپ بەرىپ، تاۋارلاردى جارنامالاۋىڭىز كەرەك. ءسىز كوپتەگەن قوڭىراۋلارعا دايىن بولۋىڭىز كەرەك. سونىمەن قاتار كليەنتتى قىزىقتىرا الۋىڭىز ماڭىزدى.
«ادىرنا» ۇلتتىق پورتالى
