Úıde otyryp aqsha tapqyńyz kelse..

2344
Adyrna.kz Telegram

Úıde otyryp jumys isteý arqyly tabys tabatyn ınternet mamandyqtar  sońǵy jyldary tanymaldylyqqa ıe boldy. Ásirese pandemııa kezinde onlaın jumys jasaıtyndardyń qarasy kóbeıdi. Búginde kópshilik eshqaıda shyqpaı-aq mansap quryp, qoǵamǵa paıdasyn tıgizýde. Siz de úıde otyryp, aqsha tapqyńyz kele me? Endeshe maqalany muqııat oqyp shyǵyńyz. Nazarlaryńyzǵa eń tanymal onlaın-mamandyqtar tizimin usynamyz.

Kopıraıter

Kopıraıtıng - ınternette aqsha tabýdyń eń tanymal ádisteriniń biri. Negizgi mindet - paıdaly mátinderdi, jarnamalyq materıaldardy qurý. Bul sanatqa redaktorlar jáne jazýshylar kiredi. Eger siz kórkem jaza bilseńiz, osy bir zamanaýı mamandyq arqyly aqsha taba alasyz. Vakansııalardy hh.kz saıtynan qaraı alasyz.

Kontent-menedjer

Kontent-menedjer saıttardy baqylap, olardy mátinmen, fotosýrettermen, beınelermen toltyrýǵa jaýap beredi. Ol saıtty aqparatpen toltyryp qana qoımaı, maqsatty aýdıtorııa menoqyrmandardy ne qyzyqtyratynyn anyqtaıdy.

Saıt redaktory

Saıt redaktorynyń jumysy kontent-menedjerine uqsas. Redaktordyń kontent-menedjerden aıyrmashylyǵy - jarııalaǵan mátinniń sapasyn baqylaý. Redaktor qatelerdi túzetedi, forýmda baılanys jasaıdy, kopıraıterlerge tapsyrmalar beredi. Sodan keıin olardyń jumysyn tekseredi.

Bloger

Ózi úshin jumys istegisi keletin jáne óz pikirin bildirýden qoryqpaıtyn adamdar úshin bloger bolýǵa bolady. Bul baǵyt  jastar arasynda óte tanymal. Eger siz bloger bolsańyz, kez kelgen áleýmettik jelide táýlik boıy vıdeobeıne jazyp, tikeleı efırge shyǵyp, fotosýretter jarııalaýyńyz kerek. Blogty túsirý úshin, árıne, jaqsy kamera alyp, kópshilikti qyzyqtyratyn taqyrypty tabý kerek. Qazirgi tańda otandyq blogerler ortasha eseppen aıyna 500 myń teńge tabady. Tabystyń negizgi kózi – jarnama.

Veb-baǵdarlamashylar

Joǵaryda atalǵan mamandar saıttardy toltyrýmen aınalyssa, veb-baǵdarlamashylar sol saıttardy jasaıdy. Saıtty qurýmen qatar, olar baǵdarlamalar men senarıılerdi jazýǵa, saıtty jańartýǵa jáne qaýipsizdikti saqtaýǵa jaýap beredi. Bul salanyń mamany ádette jaqsy jalaqy alady. Biraq bul tańqalarlyq emes, óıtkeni jumys jasaý úshin veb-baǵdarlamalaý tilderin jetik bilý kerek.

Veb-dızaıner

Saıtty qurýǵa veb-dızaıner de at salysady. Ol saıt ınterfeısterin jobalaýǵa, ıdeıa men tujyrymdamaǵa, bezendirýge jaýap beredi.

Mobıldi qosymshalardy qurastyrýshy

Mobıldi qosymshalardy qashyqtan da jasaýǵa bolady. Qazirgi ýaqytta bul úlken aqsha alyp keletin eń sátti baǵyttardyń biri. Planetanyń kez kelgen turǵynynda uıaly telefon bar. Ol únemi birneshe qosymshalardy ornatady. Sol sebepti de jaqsy mobıldi qosymsha jasaý arqyly kóp aqsha taba alasyz.

Aýdarmashy

Shet tilderin jaqsy biletinder úshin qashyqtan jumys isteýdiń taǵy bir múmkindigi bar. Siz úıde otyryp-aq mátinderdi aýdara alasyz. Bul kopıraıter jumysyna uqsas. Alaıda aýdarma úshin tólem kopıraıtıngke qaraǵanda áldeqaıda joǵary.

Top ákimgeri

Internetti paıdalanýshylardyń barlyǵy derlik áleýmettik jelide otyrady. Kez kelgen áleýmettik jelide ártúrli taqyryptar boıynsha toptar bar. Ákimgerdiń negizgi jumysy - topty tártipte ustaý.

SMM mamany

Bul mamandyq basqalarǵa uqsas, biraq aıtarlyqtaı aıyrmashylyq bar. SMM-mamany oqyrmandardyń kóńilin kóterý jáne jaǵymdy ımıdj qalyptastyrý úshin brendti barlyq jelilerde birden usynady. Bul máselede PR tehnologııalary men áleýmettik jelilerdi túsiný kerek. Óıtkeni ár jeliniń ózindik jarnamalyq ereksheligi bar. Bul baıypty analıtıkalyq jumys.

Onlaın repetıtor

Internetke birtindep kóship kelgen taǵy bir mamandyq - oqytýshy. Skaıp, Zoom sııaqty vıdeo baılanystyń kóptegen joldarymen úıden shyqpaı balalardy oqytýǵa bolady. Sondaı-aq repetitor.kz saıtyna tirkelip, óz jarnamańyzdy qaldyra alasyz.

Baılanys ortalyǵynyń operatory

Kúndelikti jumysqa jaqyn, biraq úıde otyryp jasaýǵa bolatyn mamandyq - baılanys ortalyǵynyń operatory. Qarapaıym sózben aıtqanda, siz klıentterge qońyraý shalyp, olardyń qońyraýlaryna jaýap berip, taýarlardy jarnamalaýyńyz kerek. Siz kóptegen qońyraýlarǵa daıyn bolýyńyz kerek. Sonymen qatar klıentti qyzyqtyra alýyńyz mańyzdy.

«Adyrna» ulttyq portaly

Pikirler