الماتى وبلىسىندا «نۇرلى جەر» باعدارلاماسىن جۇزەگە اسىرۋ جالعاسۋدا، بيىلعى جىلى 1 ملن. شارشى مەتر تۇرعىن ءۇي پايدالانۋعا بەرىلەدى. بۇل تۋرالى بۇگىن ورتالىق كوممۋنيكاتسيالار قىزمەتى الاڭىندا وتكەن بريفينگ كەزىندە الماتى وبلىسىنىڭ اكىمى اماندىق باتالوۆ ايتتى، - دەپ حابارلايدى الماتى وبلىسى اكىمىنىڭ ءباسپاسوز قىزمەتى.
وبلىس باسشىسىنىڭ سوزىنە سۇيەنسەك، «جۇمىسپەن قامتۋ جول كارتاسى» شەڭبەرىندە وڭىرگە 105 ملرد. تەڭگە بولىنگەن، 20 مىڭ جۇمىس ورنىن قۇرعان 1051 جوبا جۇزەگە اسىرىلدى. وتكەن جىلى وبلىس بويىنشا 60 مىڭ جۇمىس ورنى اشىلدى.
باياندامادا ايتىلعانداي، «نۇرلى جەر» باعدارلاماسىن جۇزەگە اسىرۋ جالعاسۋدا، بيىلعى جىلى 1 ملن. شارشى مەتر تۇرعىن ءۇي پايدالانۋعا بەرۋ جوسپارلانعان. 2603 پاتەرلىك 521 تۇرعىن ءۇي سالىنىپ جاتىر، سونىڭ 1212-ءسى كوپ بالالى وتباسىلارعا بەرىلەدى. سونىمەن قاتار جەڭىلدىكتەر قاراستىرىلعان «7-20-25»، «باقىتتى وتباسى» جانە «شاڭىراق 5-10-20» باعدارلامالارىمەن 1986 وتباسى پاتەرلى بولادى.
- الماتى وبلىسىندا قۇرىلىس سالاسىندا كارانتيندىك شەكتەۋلەرگە قاراماستان جۇمىس قارقىنى باسەڭدەگەن جوق. سول سياقتى ءبىز شاعىن جانە ورتا بيزنەس نىساندارىنىڭ جابىلۋى سالدارىنان ورنىنان بوساپ قالعان كوپتەگەن ازاماتتى وسى قۇرىلىس سالاسىندا جۇمىسپەن قامتىدىق، - دەدى ا. باتالوۆ.
