جاقىندا عانا قازاقستانعا كەلىپ، يك توبىنان سۇحبات العان رەسەيلىك تانىمال ۆيدەوبلوگەر، جۋرناليست يۋري دۋد ەندى ديماشپەن سۇحباتتاسۋ ءۇشىن اقتوبەگە كەلمەكشى ەكەن دەگەندى ەستىپ قالدىم. ءدۋدتىڭ سۇحباتتارى مەن فيلمدەرىن ءبىرازدان بەرى كورىپ ءجۇرمىن. YouTube ارقىلى نولدەن باستاپ اتاقتى بولعان ءانشى دجاستين بيبەردىڭ جۋرناليستيكاداعى بالاماسى دەۋگە بولاتىن شىعار.
بىراق ءدۋدتىڭ كەي سۇحباتتارىن كورىپ وتىرىپ، ونىڭ تاساسىندا كرەمل نەمەسە كرەملگە جاقىن توپتار تۇر ما دەگەن ويعا قالدىم.
مىسالى رەسەيدىڭ باستى پروپاگانديسىنىڭ ءبىرى كيسەليوۆتەن العان سۇحباتىن كورىڭىز. ول سۇحباتتا كيسەليوۆ ءدۋدتى "جەپ" قويدى. پورۆال كاك تۋزيك گرەلكۋ. ءار سۇحباتتاسۋشىسىن ەگجەي-تەگجەي زەرتتەيتىن، ىڭعايسىز سۇراقتارىمەن بۇرىشقا تاقاپ الىپ تەرلەتەتىن دۋد بۇل سۇحباتتا مۇعالىمنىڭ الدىندا سۇمىرەيىپ تۇرعان وقۋشى بولىپ قالدى!
كيسەليوۆتىڭ اتاقتى سوزىمەن ايتقاندا: سوۆپادەنيە؟ نە دۋمايۋ!
بۇل سۇحبات رەسەي پروپاگانداسىنا سىن كوپ ايتىلىپ كەتكەن، باستى مەملەكەتتىك تەلەارنالاردىڭ رەيتينگى تومەندەگەن تۇستا شىققانى دا نازار اۋدارتادى.
ءجا، بۇل ولاردىڭ ىشكى شارۋاسى. ايتايىن دەگەنىم، سوڭعى كەزدەرى دۋد قازاقتاردى اينالشىقتاي باستادى. بىزگە كەلگىشتەپ كەتتى. رەسەيدەگى قازاقتاردى تۇگەندەپ ءبىتىپ، ەندى قازاقستانداعى تانىمال بولا باستاعان جاس بۋىنعا ۇيىرسەك بولىپتى. ال ءدۋدتىڭ سۇحبات الۋى بىزگە زور مارتەبە. ويتكەنى سول ارقىلى سەنى ميلليونداعان ادام تانيتىن بولادى. وسى جەردە مەنىڭشە ۇلكەن گاپ بار. قانشا جەردەن ايتساڭىز دا، رەسەيدىڭ مەدياتۇلعالارى مەن ساياساتكەرلەرى ءۇشىن ءبىز بۇرىنعى وتارى، يمپەريانىڭ ماڭىزدى پەريفەرياسىمىز!
سوندىقتان مەنىڭ پايىمىمشا، قازىر رەسەي قازاقستاندى ءوز ىقپالىنان شىعارىپ الماۋعا جانتالاسۋدا. ەسكى بۋىنمەن اراداعى اڭگىمە تۇسىنىكتى. بىراق ۋاقىت وتەدى، ساحناعا جاڭا بۋىن شىعۋدا.
ەندى تاۋەلسىز ەلدە تۋىپ، تاريحى مەن تاعدىرىن رەسەيمەن بايلانىستىرمايتىن جاڭا ۇرپاقتى قالاي وزىنە قاراي بۇرۋ كەرەك؟ ولاردىڭ ءتىلىن قالاي تابۋعا بولادى؟ جالپى ولاردىڭ كوزقاراسى قانداي؟
بۇل سۇراقتارعا جاۋاپ تابۋ ءۇشىن جانە جاڭا، جاس قازاقتاردى ءوزىڭنىڭ وربيتاڭنان شىعارماۋ ءۇشىن الدىمەن ولاردىڭ تامىرىن باسىپ كورۋ قاجەت. نەگە ماسەلەن دۋد قازاقستان تۇگىلى شەتەلگە تانىلعان ناينتي ۋان جىگىتتەرىنەن ەمەس، يك-دان الدى؟
مەنىڭشە، مۇنىڭ بىرنەشە سەبەبى بار. بىرىنشىدەن، يك - تازا قازاقستاننىڭ ىشىندە تانىلعان، وزدەرىن جاستار اراسىندا ەرەكشە تانىمال ك-POP باعىتىمەن بايلانىستىرماعان توپ. ەكىنشىدەن، ناينتي ۋان ونەردەگى بۋنتارلار بولسا، يك كوزقاراس، ۇستانىمدارىن ونەر ارقىلى جەتكىزگەن بۋنتارلار!
ۇشىنشىدەن، يك توبىنىڭ وكىلدەرى ءورىستىلدى.
يك جىگىتتەرىمەن بولعان سۇحباتتاعى سۇراقتاردىڭ ونە بويىنان ساياسي استاردى اڭعارعان بولارسىز؟ ءدۋدتىڭ بۇل سۇحباتىندا باسقا دا تاقىرىپتا قويىلعان سۇراقتار مەن جاۋاپتاردىڭ بولعانىنا، ولاردىڭ ءبارى كەسىلىپ تاستالعانىنا ءباس تىگەمىن.
قاتەلەسۋىم دە مۇمكىن.
بىراق بيلىگى كەشەگى يمپەريانى كوكسەيتىن، كوسەمى كەڭەس وداعىنىڭ ىدىراۋىن "ەڭ ۇلكەن گەوساياسي اپات" دەپ سانايتىن، سايكەسىنشە ءبىزدى تەك شيكىزات شىلاۋى رەتىندە قاراستىراتىن (ەۋرازيالىق ەكونوميكالىق وداقتان كورىپ وتىرمىز) كورشىنىڭ اياق استىنان قازاقتىڭ جاس تالانتتارىنا قىزىعۋشىلىق تانىتقانى، ولاردى دارىپتەي باستاعانى كەزدەيسوقتىق پا؟ ولاي ەمەس سەكىلدى!
دانەش بايبولاتوۆ،
تاۋەلسىز ساراپشى
