بۇگىن قالا اكىمى مۇرات ايتەنوۆ شاحمات ويىنىنىڭ جەڭىمپازدارىن ماراپاتتادى.
شىمكەنتتە بۇقارالىق
سپورتتى دامىتۋ ماقساتىنداعى «شىمكەنت جاستار ليگاسى» باسەكەسىندە شاحماتتان جەڭىمپازدار انىقتالدى.
بيىل 1 ناۋرىزدان باستاپ وقۋشىلار ءتورت سپورت تۇرىنەن – ۆولەيبول، فۋتبول، باسكەتبول جانە شاحمات ويىندارىنان سىنعا تۇسۋدە.
شاحمات ويىنىندا ا.س.پۋشكين اتىنداعى № 1 مەكتەپ-گيمنازيا شاكىرتتەرى جەڭىمپاز اتاندى. № 9 مەكتەپ-ليتسەي 2, № 23 مەكتەپ 3 - ورىندى يەلەندى.
قالا باسشىسى زياتكەرلىك ويىن باسەكەسىندە ۇزدىك شىققان كوماندالاردى ماراپاتتادى. شاھار باسشىسى پاندەميا كەزەڭىندە شاحمات ويىنى بۇرىنعىدان دا زور ماڭىزعا يە بولا تۇسكەنىن، مەگاپوليستىڭ شاحماتشىلارى ونلاين-تۋرنيرلەردە ۇزدىك ناتيجە كورسەتكەنىن اتاپ ءوتتى.
– مەملەكەت باسشىسىنىڭ قازاقستان حالقىنا جولداۋىنداعى بۇقارالىق سپورتتى دامىتۋعا باعىتتالعان كەشەندى باعدارلاماسىن جۇزەگە اسىرۋ تاپسىرماسىنا سايكەس، قازاقستان تاۋەلسىزدىگىنىڭ 30 جىلدىعى اياسىندا بيىل العاش رەت «شىمكەنت جاستار ليگاسى» ءوتىپ جاتىر. شاحمات الەمدەگى كەڭ تارالعان ويىنداردىڭ ءبىرى سانالادى. شاحمات ادامنىڭ ەستە ساقتاۋ قابىلەتىن جاقسارتىپ، قيىن سۇراقتاردى شەشىپ، كۇردەلى يدەيالاردى ويلاپ تابۋعا سەپتىگى مول. شاحمات ويىنىنان شىمكەنت قالاسىندا دا جەڭىستى ءداستۇر بار. كوپتەگەن حالىقارالىق دودالاردا ءانۇرانىمىزدى شىرقاتا بىلگەن العاشقى گروسسمەيستەر گۇلىسحان ناحباەۆا جانە جانسايا ابدىمالىك شىمكەنت قالاسىنىڭ تۋماسى.
وسى وقۋ جىلىندا قازاقستاندا تۇڭعىش رەت شىمكەنت مەكتەپتەرىندە شاحمات ويىنى ەنگىزىلدى. سىزدەرگە شاحمات سپورتىنا قىزىعۋشىلىق تانىتقاندارىڭىز ءۇشىن العىسىمدى بىلدىرەمىن جانە جاڭا تابىستار تىلەيمىن، – دەدى قالا اكىمى.
جەڭىمپاز كومانداعا 20 ملن تەڭگە تابىس ەتىلدى. قالعان جۇلدەگەرلەر ديپلوم جانە كۋبوكتارمەن ماراپاتتالدى. مەكتەپتىڭ بۇل قاراجاتتى قايدا جاراتاتىنىن، مەكتەپ مۇقتاجىنا جاراتۋ شارتىمەن، ءبىلىم ورداسى ۇجىمىنىڭ ءوزى انىقتايدى.
بۇگىندە «شىمكەنت جاستار ليگاسىنا» قاتىسۋعا 140 ءبىلىم ۇيىمىنان، 536 كوماندادان ءوتىنىش تۇسكەن. ويىنداردى ۇيلەستىرۋ ءۇشىن 420 دەنەشىنىقتىرۋ مامانى جۇمىلدىرىلىپ، تىكەلەي 8 569 وقۋشى قاتىسۋدا. ال شاحمات ويىندارىنا جالپى 140 مەكتەپ قاتىسۋعا ءوتىنىم ءبىلدىرىپ، 560 وقۋشى باق سىنادى.
فوتو: بەرەكە سەيىتجاپپار
