Búgin qala ákimi Murat ÁITENOV shahmat oıynynyń jeńimpazdaryn marapattady.
Shymkentte buqaralyq
sportty damytý maqsatyndaǵy «Shymkent jastar lıgasy» básekesinde shahmattan jeńimpazdar anyqtaldy.
Bıyl 1 naýryzdan bastap oqýshylar tórt sport túrinen – voleıbol, fýtbol, basketbol jáne shahmat oıyndarynan synǵa túsýde.
Shahmat oıynynda A.S.Pýshkın atyndaǵy № 1 mektep-gımnazııa shákirtteri jeńimpaz atandy. № 9 mektep-lıeı 2, № 23 mektep 3 - oryndy ıelendi.
Qala basshysy zııatkerlik oıyn básekesinde úzdik shyqqan komandalardy marapattady. Shahar basshysy pandemııa kezeńinde shahmat oıyny burynǵydan da zor mańyzǵa ıe bola túskenin, megapolıstiń shahmatshylary onlaın-týrnırlerde úzdik nátıje kórsetkenin atap ótti.
– Memleket basshysynyń Qazaqstan halqyna Joldaýyndaǵy buqaralyq sportty damytýǵa baǵyttalǵan keshendi baǵdarlamasyn júzege asyrý tapsyrmasyna sáıkes, Qazaqstan Táýelsizdiginiń 30 jyldyǵy aıasynda bıyl alǵash ret «Shymkent Jastar Lıgasy» ótip jatyr. Shahmat álemdegi keń taralǵan oıyndardyń biri sanalady. Shahmat adamnyń este saqtaý qabiletin jaqsartyp, qıyn suraqtardy sheship, kúrdeli ıdeıalardy oılap tabýǵa septigi mol. Shahmat oıynynan Shymkent qalasynda da jeńisti dástúr bar. Kóptegen halyqaralyq dodalarda Ánuranymyzdy shyrqata bilgen alǵashqy grossmeıster Gúlishan Nahbaeva jáne Jansaıa Ábdimálik Shymkent qalasynyń týmasy.
Osy oqý jylynda Qazaqstanda tuńǵysh ret Shymkent mektepterinde shahmat oıyny engizildi. Sizderge shahmat sportyna qyzyǵýshylyq tanytqandaryńyz úshin alǵysymdy bildiremin jáne jańa tabystar tileımin, – dedi qala ákimi.
Jeńimpaz komandaǵa 20 mln teńge tabys etildi. Qalǵan júldegerler dıplom jáne Kýboktarmen marapattaldy. Mekteptiń bul qarajatty qaıda jaratatynyn, mektep muqtajyna jaratý shartymen, bilim ordasy ujymynyń ózi anyqtaıdy.
Búginde «Shymkent jastar lıgasyna» qatysýǵa 140 bilim uıymynan, 536 komandadan ótinish túsken. Oıyndardy úılestirý úshin 420 deneshynyqtyrý mamany jumyldyrylyp, tikeleı 8 569 oqýshy qatysýda. Al shahmat oıyndaryna jalpy 140 mektep qatysýǵa ótinim bildirip, 560 oqýshy baq synady.
Foto: Bereke Seıitjappar
