قر ءبىلىم جانە عىلىم ءمينيسترى اسحات ايماعامبەتوۆ جاس تۇلەكتەردى بۇگىنگى مەرەكەلەرىمەن شىن جۇرەكتەن قۇتتىقتادى، دەپ حابارلايدى «ادىرنا» ۇلتتىق پورتالى.
«قۇرمەتتى تۇلەكتەر!
مىنە، وقۋ جىلى ءوز مارەسىنە جەتتى.
بۇل وقۋ جىلى بۇكىل الەمدەگى وقۋشىلار مەن ستۋدەنتتەر ءۇشىن وڭاي بولعان جوق.
الەمدىك ءبىلىم ءبىرۋ جۇيەسى پاندەميا سىندى ۇلكەن سىناقتان ءوتتى. ءبىز مۇعالىمدەرمەن بىرلەسە وتىرىپ ءبىلىم بەرۋ جۇيەسىنە جاڭا دەم بەرىپ، ولارعا بارىنشا قاجەتتى جاعداي جاساۋعا تىرىستىق.
سىزدەر وقۋلارىڭىزدى اياقتاپ جاتىرسىزدار.
كەيبىر تۇلەكتەر جوعارى وقۋ ورىندارىنا نەمەسە كوللەدجدەرگە تۇسسە، ەندى بىرەۋلەرى جۇمىس ىستەيدى.
قالاي بولسا دا، الداعى ۋاقىتتا سىزدەردى جاڭا مۇمكىندىكتەر مەن جاڭا ءومىر بەلەستەرى كۇتىپ تۇر.
مەكتەپ ءبىتىرىپ جاتقان كەزىم ءالى ەسىمدە. ۇلكەن ومىرگە قادام باسار الدىنداعى قورقىنىش، ۋايىم، كۇدىك، جوسپارلار مەن بولاشاققا دەگەن ءۇمىت.
ول كەزدە ءىس جۇزىندە ءبارى باسقاشا ەكەنىن تۇسىنبەگەن ەكەنمىن. ءتىپتى، مەن ويلاعاننان دا وڭاي ەكەن دەپ ايتۋعا بولادى»، - دەپ جازدى مينيستر Instagram جەلىسىندەگى پاراقشاسىندا.
سونىمەن قاتار ول ءوز تاجىريبەسىنە سۇيەنە وتىرىپ جاس تۇلەكتەرگە 3 كەڭەسىن ايتتى.
«بىرىنشىدەن. ەشقاشان قيىندىقتارعا مويىماڭىزدار. كوزدەگەن ماقساتىڭا جەتۋ جولىندا الدەبىرەۋدىڭ ايتقانىنا ەرمەي، تۋرا جولدان تايماۋ كەرەك.
باسىمنان وتكەن ءبىر وقيعانى ايتىپ بەرەيىن.
ديپلوم العاننان كەيىن ەكى اپتا وتكەن سوڭ ءماسليحات دەپۋتاتىعىنا سايلاۋ وتەتىندىگى تۋرالى حابارلاندىرۋدى كوزىم شالىپ قالدى. دوستارىممەن اقىلداسىپ، سايلاۋعا قاتىسۋعا بەل بۋدىم.
قولىندا ءوتىنىشى بار 21 جاستاعى جىگىتتى كورگەن سايلاۋ كوميسسياسىنداعى ماماندار ماعان كۇلە قارادى. قارسىلاستارىمنىڭ دا ماعان دەگەن كوزقاراسى سونداي بولدى.
سايلاۋشىلارمەن العاشقى كەزدەسۋلەرىم دە ەسىمدە. جاس بالانىڭ دەپۋتاتتىققا ۇمىتكەر ەكەنىن كورگەندە سايلاۋشىلارىمنىڭ جارتىسىنان كوبى تەرىس اينالعان بولاتىن.
شتابىمنان باسقا ەشكىم مەنىڭ جەڭىسكە جەتەتىنىمە سەنبەي، ءبارى بۇل مۇمكىن ەمەس دەۋمەن بولدى.
كاسىپكەرلەر، جەتەكشىلەر جانە تانىمال قايراتكەرلەردەن تۇراتىن 11 قارسىلاسىم بولسا دا، ەڭبەك جانە جەڭىسكە دەگەن سەنىم ارقىلى كەشەگى ستۋدەنت، قاراپايىم جىگىت وسى سايلاۋدا جەڭىسكە جەتتى. ال 4 جىلدان كەيىن قايتا سايلاندىم.
شىن مانىندە بۇل سايلاۋدان ۇتقانىم كوپ بولدى. سايلاۋشىلاردىڭ سەنىمىنە يە بولىپ، ءوز كۇشىمە دەگەن سەنىمىم دە نىعايا ءتۇستى.
سوندىقتان ادام بالاسى ءوز كۇشى مەن ارمانىنا سەنۋى كەرەك. قۇلاساڭ دا قايتا تۇرىپ، العا ۇمتىلۋعا تىرىسۋ كەرەك.
ەستەرىڭىزدە بولسىن، تاعدىر ماقساتى ايقىن جانە العان بەتىنەن قايتپايتىن ادامداردى جاقسى كورەدى»، - دەيدى مينيستر.
ايماعامبەتوۆ جاس تۇلەكتەردى قاتەلەسۋدەن قورىقپاۋعا، ءوز قاتەلىكتەرىن ۋاقىتىندا ءتۇسىنىپ، تۇزەتۋگە تىرىسۋعا شاقىردى.
«ەكىنشىدەن. قاتەلەسۋدەن قورىقپاۋ كەرەك. قاتەلىك جاسالسا، ءومىر سونىمەن اياقتالمايدى. بارلىق ادام قاتەلەسەدى.
ەڭ باستىسى - ءوز قاتەلىگىمىزدى ۋاقىتىلى ءتۇسىنىپ، تۇزەتۋگە تىرىسۋىمىز الدەقايدا ماڭىزدى. بارىنشا كۇش-جىگەرىمىزدى سالىپ، العان بەتتەن قايتپاعانىمىز ابزال.
مىنە، بۇل بولاشاقتا تابىسقا قول جەتكىزەتىن ادامعا ءتان قاسيەت.
مەكتەپتى بىتىرگەننەن كەيىن مەن بىردەن گرانتقا تۇسە المادىم. جالپى جاقسى بالل جيناعانىما قاراماستان، بەيىندىك ءپان بويىنشا از بالل العاندىقتان، گرانت جەڭىپ الا المادىم. سول كەزدە بۇل جاعدايدى ومىرىمدەگى ۇلكەن قاتەلىك دەپ سانادىم، ءومىرىم اياقتالعان سياقتى بولدى.
بىراق كەيىن بۇل جاعدايعا دەگەن كوزقاراسىم وزگەرىپ، ونى ومىرىمدەگى كەزەكتى سىناق دەپ قابىلدادىم. تاعى ءبىر جىل دايىندالىپ، ۇبت-نى قايتا تاپسىردىم. جاقسى بالل جيناپ، گرانتتى جەڭىپ الدىم. بۇل وقيعا ماعان كوپ نارسەنى ۇيرەتكەن ومىرلىك ساباق بولعانىن جەتە ءتۇسىندىم.
ءوز كۇشىڭىزگە دەگەن سەنىم مەن قاتەلىكتەرگە مويىماي، اياققا قايتا تۇرۋ - ادام بالاسى ءۇشىن وتە ماڭىزدى دەپ بىلەمىن»، - دەپ جازدى ول.
سونىمەن قاتار ول مەكتەپ ءبىتىرۋشى تۇلەكتەرگە باسقالارعا قاراعاندا ەرەكشە بولۋدان ۇيالماۋ كەرەكتىگىن ايتتى.
«ۇشىنشىدەن. باسقالارعا قاراعاندا ەرەكشە بولۋدان ۇيالماڭىزدار.
ەڭ باستىسى وزىڭىزگە ادال بولىڭىز. باسقا ادامدارمەن ارالاسىپ، دوس بولىڭىزدار. اتا-انالارىڭا قامقور بولىپ، باۋىرلارىڭىزبەن بايلانىستى ەشقاشان جوعالتپاڭىزدار. كەيىن، مۇمكىن 30 جاسقا كەلگەندە، اتا-انانىڭ بەرگەن اقىل-كەڭەستەرى ورىندى ەكەنىن تۇسىنە باستايسىزدار.
بويلارىڭىزدا جاڭا ادەتتەر قالىپتاستىرىڭدار!
دەنساۋلىقتارىڭدى نىعايتىڭدار!
بۇكىل الەم قارسى بولسا دا، قايسارلىق تانىتىپ، العان باعىتتان قايتپاعان ءجون.
قازىر «قاي ۋنيۆەرسيتەتتى تاڭداسام ەكەن» دەپ ويلانىپ جۇرگەن بولارسىزدار.
ارينە، بۇل وتە ماڭىزدى ماسەلە.
ەندى ءاربىر جوعارى وقۋ ورنى تۇلەكتەرىنە مەملەكەتتىك ەمەس، وزىندىك ۇلگىدەگى ديپلوم بەرەدى. كەلەسى جىلدان باستاپ ديپلومنىڭ عانا بولۋى جەتكىلىكسىز، سونىمەن بىرگە ناقتى ءبىلىم مەن داعدىلاردىڭ بولۋىن دالەلدەۋ قاجەت بولماق. ءتىپتى ونى سەرتيفيكاتپەن راستاۋ كەرەك بولادى. سوندىقتان مىقتى وقۋ ورنىن تاڭداپ، بولاشاققا زور سەنىممەن قادام باسۋعا شاقىرامىن.
وقۋ قۇنىنىڭ ارزاندىعى، ساباقتى بوساتۋ، ەمتيحان تاپسىرماي-اق وقۋدى اياقتاۋ سىندى “مۇمكىندىكتەرگە” قىزىقپاڭىزدار. بۇل جاقسىلىققا الىپ كەلمەيتىن ارەكەت دەپ ەسەپتەيمىن. سول سەبەپتى جوو تاڭداعان كەزدە ۋنيۆەرسيتەتتىڭ بەدەلىنە، وقۋ ورنىنا قاتىستى جۇمىس بەرۋشىلەردىڭ پىكىرىنە، حالىقارالىق اككرەديتتەۋدىڭ بولۋىنا، تاريحىنا ءمان بەرگەندەرىڭىز ابزال.
«ءومىر اتتى بەلەستە تەك ءبىر رەت قانا ءبىلىم الۋ جەتكىلىكتى» دەگەن ەسكى قاعيدا ءوز كۇشىن جوعالتتى. تابىسقا جەتۋ ءۇشىن ءبىز ءومىر بويى وقۋىمىز قاجەت. كۇن سايىن جاڭا تەحنولوگيالار پايدا بولىپ جاتىر. ومىرىمىزدەگى جاڭا ترەندتەر - بۇل ۇزدىكسىز وقۋ ۇعىمىمەن پارا-پار.
سونداي-اق ءبىلىم ءمينيسترى رەتىندە مىقتى تۇلەكتەردى پەداگوگ ماماندىعىن تاڭداۋعا شاقىرامىن. ويتكەنى، ءبىلىم ساپاسى، ەلدىڭ بولاشاعى جوعارى وقۋ ورىندارىن اياقتاپ شىعاتىن مۇعالىمدەرگە تىكەلەي بايلانىستى. بۇل ۇلكەن دارەجەگە يە جانە وتە قۇرمەتتى ماماندىق.
مۇعالىم ماماندىعىنىڭ مارتەبەسىن ارتتىرۋ ءۇشىن پرەزيدەنتتىڭ تاپسىرماسى بويىنشا ءبىز پەداگوگتەردىڭ جالاقىسىن بەلسەندى تۇردە ارتتىرىپ جاتىرمىز. شامادان تىس ەسەپتىلىكتى الىپ تاستادىق. بولاشاق پەداگوگتەردىڭ ستيپەندياسى ەڭ جوعارى ستيپەنديا بولىپ تابىلادى، بۇل باعىتتاعى جۇمىستار ءارى قاراي دا جالعاسىن تابادى»، - دەدى مينيستر.
سونداي-اق قورىتىندىلاي كەلە ايماعامبەتوۆ جاس تۇلەكتەرگە اق جارما تىلەگىن ءبىلدىردى.
«قۇرمەتتى جاس تۇلەك!
العا قويعان ماقساتتارىڭىزعا جەتىڭىزدەر. باتىل بولىڭىزدار.
ءبارى ءوز قولدارىڭىزدا ەكەنىن ەستەرىڭىزدە ساقتاپ جۇرىڭىزدەر.
ءسوز سوڭىندا ايتارىم: وزدەرىڭدى شەكتەمەي، كەڭ ءارى اۋقىمدى ويلاۋعا تىرىسىڭدار. سوندا عانا تولاعاي تابىستارعا جەتەسىزدەر!
ومىرلەرىڭىزدەگى جاڭا كەزەڭ قۇتتى بولسىن، دوستار!
بولاشاقتا جاڭا جەتىستىكتەرگە جەتە بەرىڭدەر!» - دەپ جازدى مينيستر.
"ادىرنا" ۇلتتىق پورتالى
