QR Bilim jáne ǵylym mınıstri Ashat Aımaǵambetov jas túlekterdi búgingi merekelerimen shyn júrekten quttyqtady, dep habarlaıdy «Adyrna» ulttyq portaly.
«Qurmetti túlekter!
Mine, oqý jyly óz máresine jetti.
Bul oqý jyly búkil álemdegi oqýshylar men stýdentter úshin ońaı bolǵan joq.
Álemdik bilim birý júıesi pandemııa syndy úlken synaqtan ótti. Biz muǵalimdermen birlese otyryp bilim berý júıesine jańa dem berip, olarǵa barynsha qajetti jaǵdaı jasaýǵa tyrystyq.
Sizder oqýlaryńyzdy aıaqtap jatyrsyzdar.
Keıbir túlekter joǵary oqý oryndaryna nemese kolledjderge tússe, endi bireýleri jumys isteıdi.
Qalaı bolsa da, aldaǵy ýaqytta sizderdi jańa múmkindikter men jańa ómir belesteri kútip tur.
Mektep bitirip jatqan kezim áli esimde. Úlken ómirge qadam basar aldyndaǵy qorqynysh, ýaıym, kúdik, josparlar men bolashaqqa degen úmit.
Ol kezde is júzinde bári basqasha ekenin túsinbegen ekenmin. Tipti, men oılaǵannan da ońaı eken dep aıtýǵa bolady», - dep jazdy mınıstr Instagram jelisindegi paraqshasynda.
Sonymen qatar ol óz tájirıbesine súıene otyryp jas túlekterge 3 keńesin aıtty.
«Birinshiden. Eshqashan qıyndyqtarǵa moıymańyzdar. Kózdegen maqsatyńa jetý jolynda áldebireýdiń aıtqanyna ermeı, týra joldan taımaý kerek.
Basymnan ótken bir oqıǵany aıtyp bereıin.
Dıplom alǵannan keıin eki apta ótken soń máslıhat depýtatyǵyna saılaý ótetindigi týraly habarlandyrýdy kózim shalyp qaldy. Dostarymmen aqyldasyp, saılaýǵa qatysýǵa bel býdym.
Qolynda ótinishi bar 21 jastaǵy jigitti kórgen saılaý komıssııasyndaǵy mamandar maǵan kúle qarady. Qarsylastarymnyń da maǵan degen kózqarasy sondaı boldy.
Saılaýshylarmen alǵashqy kezdesýlerim de esimde. Jas balanyń depýtattyqqa úmitker ekenin kórgende saılaýshylarymnyń jartysynan kóbi teris aınalǵan bolatyn.
Shtabymnan basqa eshkim meniń jeńiske jetetinime senbeı, bári bul múmkin emes deýmen boldy.
Kásipkerler, jetekshiler jáne tanymal qaıratkerlerden turatyn 11 qarsylasym bolsa da, eńbek jáne jeńiske degen senim arqyly keshegi stýdent, qarapaıym jigit osy saılaýda jeńiske jetti. Al 4 jyldan keıin qaıta saılandym.
Shyn máninde bul saılaýdan utqanym kóp boldy. Saılaýshylardyń senimine ıe bolyp, óz kúshime degen senimim de nyǵaıa tústi.
Sondyqtan adam balasy óz kúshi men armanyna senýi kerek. Qulasań da qaıta turyp, alǵa umtylýǵa tyrysý kerek.
Esterińizde bolsyn, taǵdyr maqsaty aıqyn jáne alǵan betinen qaıtpaıtyn adamdardy jaqsy kóredi», - deıdi mınıstr.
Aımaǵambetov jas túlekterdi qatelesýden qoryqpaýǵa, óz qatelikterin ýaqytynda túsinip, túzetýge tyrysýǵa shaqyrdy.
«Ekinshiden. Qatelesýden qoryqpaý kerek. Qatelik jasalsa, ómir sonymen aıaqtalmaıdy. Barlyq adam qatelesedi.
Eń bastysy - óz qateligimizdi ýaqytyly túsinip, túzetýge tyrysýymyz áldeqaıda mańyzdy. Barynsha kúsh-jigerimizdi salyp, alǵan betten qaıtpaǵanymyz abzal.
Mine, bul bolashaqta tabysqa qol jetkizetin adamǵa tán qasıet.
Mektepti bitirgennen keıin men birden grantqa túse almadym. Jalpy jaqsy ball jınaǵanyma qaramastan, beıindik pán boıynsha az ball alǵandyqtan, grant jeńip ala almadym. Sol kezde bul jaǵdaıdy ómirimdegi úlken qatelik dep sanadym, ómirim aıaqtalǵan sııaqty boldy.
Biraq keıin bul jaǵdaıǵa degen kózqarasym ózgerip, ony ómirimdegi kezekti synaq dep qabyldadym. Taǵy bir jyl daıyndalyp, UBT-ny qaıta tapsyrdym. Jaqsy ball jınap, grantty jeńip aldym. Bul oqıǵa maǵan kóp nárseni úıretken ómirlik sabaq bolǵanyn jete túsindim.
Óz kúshińizge degen senim men qatelikterge moıymaı, aıaqqa qaıta turý - adam balasy úshin óte mańyzdy dep bilemin», - dep jazdy ol.
Sonymen qatar ol mektep bitirýshi túlekterge basqalarǵa qaraǵanda erekshe bolýdan uıalmaý kerektigin aıtty.
«Úshinshiden. Basqalarǵa qaraǵanda erekshe bolýdan uıalmańyzdar.
Eń bastysy ózińizge adal bolyńyz. Basqa adamdarmen aralasyp, dos bolyńyzdar. Ata-analaryńa qamqor bolyp, baýyrlaryńyzben baılanysty eshqashan joǵaltpańyzdar. Keıin, múmkin 30 jasqa kelgende, ata-ananyń bergen aqyl-keńesteri oryndy ekenin túsine bastaısyzdar.
Boılaryńyzda jańa ádetter qalyptastyryńdar!
Densaýlyqtaryńdy nyǵaıtyńdar!
Búkil álem qarsy bolsa da, qaısarlyq tanytyp, alǵan baǵyttan qaıtpaǵan jón.
Qazir «qaı ýnıversıtetti tańdasam eken» dep oılanyp júrgen bolarsyzdar.
Árıne, bul óte mańyzdy másele.
Endi árbir joǵary oqý orny túlekterine memlekettik emes, ózindik úlgidegi dıplom beredi. Kelesi jyldan bastap dıplomnyń ǵana bolýy jetkiliksiz, sonymen birge naqty bilim men daǵdylardyń bolýyn dáleldeý qajet bolmaq. Tipti ony sertıfıkatpen rastaý kerek bolady. Sondyqtan myqty oqý ornyn tańdap, bolashaqqa zor senimmen qadam basýǵa shaqyramyn.
Oqý qunynyń arzandyǵy, sabaqty bosatý, emtıhan tapsyrmaı-aq oqýdy aıaqtaý syndy “múmkindikterge” qyzyqpańyzdar. Bul jaqsylyqqa alyp kelmeıtin áreket dep esepteımin. Sol sebepti joo tańdaǵan kezde Ýnıversıtettiń bedeline, oqý ornyna qatysty jumys berýshilerdiń pikirine, halyqaralyq akkredıtteýdiń bolýyna, tarıhyna mán bergenderińiz abzal.
«Ómir atty beleste tek bir ret qana bilim alý jetkilikti» degen eski qaǵıda óz kúshin joǵaltty. Tabysqa jetý úshin biz ómir boıy oqýymyz qajet. Kún saıyn jańa tehnologııalar paıda bolyp jatyr. Ómirimizdegi jańa trendter - bul úzdiksiz oqý uǵymymen para-par.
Sondaı-aq bilim mınıstri retinde myqty túlekterdi pedagog mamandyǵyn tańdaýǵa shaqyramyn. Óıtkeni, bilim sapasy, eldiń bolashaǵy joǵary oqý oryndaryn aıaqtap shyǵatyn muǵalimderge tikeleı baılanysty. Bul úlken dárejege ıe jáne óte qurmetti mamandyq.
Muǵalim mamandyǵynyń mártebesin arttyrý úshin Prezıdenttiń tapsyrmasy boıynsha biz pedagogterdiń jalaqysyn belsendi túrde arttyryp jatyrmyz. Shamadan tys eseptilikti alyp tastadyq. Bolashaq pedagogterdiń stıpendııasy eń joǵary stıpendııa bolyp tabylady, bul baǵyttaǵy jumystar ári qaraı da jalǵasyn tabady», - dedi mınıstr.
Sondaı-aq qorytyndylaı kele Aımaǵambetov jas túlekterge aq jarma tilegin bildirdi.
«Qurmetti jas túlek!
Alǵa qoıǵan maqsattaryńyzǵa jetińizder. Batyl bolyńyzdar.
Bári óz qoldaryńyzda ekenin esterińizde saqtap júrińizder.
Sóz sońynda aıtarym: ózderińdi shektemeı, keń ári aýqymdy oılaýǵa tyrysyńdar. Sonda ǵana tolaǵaı tabystarǵa jetesizder!
Ómirlerińizdegi jańa kezeń qutty bolsyn, dostar!
Bolashaqta jańa jetistikterge jete berińder!» - dep jazdy mınıstr.
"Adyrna" ulttyq portaly
