«ادىرنا» ۇلتتىق پورتالى 2022 جىل بويىنشا ءوز سالاسىندا ۇزدىك دەپ تانىلعان مايتالمانداردى انىقتادى. «جىل ۇزدىكتەرىن» انىقتاۋ الەۋمەتتىك جەلى پاراقشالارىنداعى داۋىس بەرۋ ارقىلى جۇرگىزىلدى. بىرنەشە باعىت بويىنشا ۇيىمداستىرىلعان تارتىسقا تولى "ساۋالناما سايىسىندا" ۇزدىكتەر ناقتىلاندى، دەپ حابارلايدى "ادىرنا" ۇلتتىق پورتالى.
سونىمەن، بيىلعى جىلدىڭ ۇزدىكتەرى تومەندەگىدەي:
«2022 جىلدىڭ ۇزدىك ءمينيسترى» رەتىندە اسحات ايماعامبەتوۆ تانىلدى. مينيستر وقۋ ءۇردىسىن ۇلتتىق تانىمعا ساي جاساقتاۋدا جانە ساپالى ءبىلىم قالىپتاستىرۋدا تاباندى قىزمەت ەتىپ كەلەدى. ونىڭ ەڭ باستى جەتىستىگى - قازاق تىلىندە ءبىلىم بەرۋ ءىسىنىڭ ءورىسىن كەڭەيتۋى بولدى.
«2022 جىلدىڭ ۇزدىك اكىمى» بەرىك ابدىعاليۇلى بولدى. اكىم ءوز قىزمەتىندە ۇلت ۇياسى - ۇلىتاۋ ءوڭىرىن دامىتۋدىڭ ءتيىمدى تۇستارى مەن ناقتى قادامدارىن بەلگىلەۋمەن ەرەكشە كوزگە ءتۇستى. ءوندىرىس سالاسىن قايتا جانداندىرىپ، تۇرعىندار الەۋمەتىن ارتتىرۋعا كۇش سالدى.
«2022 جىلدىڭ ۇزدىك دەپۋتاتى» بولىپ ەدىل جاڭبىرشين تانىلدى. دەپۋتات مىنبەردە ءوزىنىڭ تىكمىنەزى، باتىل شەشىمدەرى جانە شىنشىل، تۋراشىلدىعىمەن ەستە قالدى. ەسكى جۇيەنى وزگەرتىپ، ادىلەتتى قازاق قوعامىن قۇرۋدى تالاپ ەتتى.
«2022 جىلدىڭ ۇزدىك ءجۋرناليسى» بولعان ازامات - ماقسات تولىقباي. جۋرناليست تىكەلەي تولقىندا الەۋمەتتىك ماسەلەلەردى اشىق كوتەرىپ، قازاق ەلىندەگى كوپتەگەن پروبلەمالاردى اشىق ايتا الدى. ونىڭ حابارلارى كوپتەگەن قازاق ەلى ازاماتتارىنىڭ ەسىندە ساقتالىپ، قوعامدىق پىكىر تۋدىردى.
«2022 جىلدىڭ ۇزدىك حالىق بلوگەرى» بولىپ قۋانىش ەدىلحان تانىلدى. الەۋمەتتىك جەلىدە بەلسەندىلىگىمەن، تەرەڭ پايىمى جانە اشىق ساناسىمەن كوزگە تۇسكەن ازاماتتى وقىرمان قاۋىم جاقسى تانيدى. ونىڭ ساياسي سيپاتتاعى جازبالارى ۇلتتىق مۇددەنى كوكسەپ، وقىرمانداردىڭ cاياسي ساناسىنىڭ وسۋىنە يگى ىقپال ەتۋدە.
«2022 جىلدىڭ ۇزدىك ۇلت جاناشىرى» ەسەبىندە ارمان شوراەۆ ەستە قالدى. كەيىپكەر ۇلتتىق مۇددەنى، قازاقىلىقتى، قازاق حالقىنىڭ قاۋىپسىزدىگىن قاشان دا ءبىرىنشى ورىنعا قويادى. ونىڭ وتكىر سوزدەرى مەن ءوتىمدى سۇحباتتارى قالىڭ قازاققا رۋح بەرىپ، قوعامدىق سانانى سەرپىلتتى. سىرتقى جانە ىشكى گەوساياساتتاعى ۇستانىمدارى كوپشىلىك كوڭىلىنەن شىقتى.
«2022 جىلدىڭ ۇزدىك ءتىل جاناشىرى» رەتىندە اسىلى وسمان حانىم كوپشىلىكتىڭ قالىڭ ىقىلاسىنا بولەندى. جانى قازاق قىزى مايەكتى ءتىلى، اق جۇرەگى، كەڭ پەيىلىنىڭ ارقاسىندا حالىقتىڭ سۇيىكتىسىنە اينالعان.
«2022 جىلدىڭ ۇزدىك زاڭگەرى» بولىپ ايگۇل ورىنبەك تاڭدالدى. وقىرماندار زاڭگەردى قوعامداعى كەلەڭسىزدىكتەرگە بەل شەشىپ، بىلەك سىبانا ارالاسۋىمەن، وتكىر جازبالارى، ناقتى ۇستانىمدارى ارقىلى جاقسى تانيدى.
«2022 جىلدىڭ ۇزدىك ۇستازى» بولىپ ءومىر شىنىبەكۇلى تاندالدى. ۇزدىك ۇستاز مەكتەپ ومىرىنە، ەلىمىزدەگى ءبىلىم سالاسىنىڭ وركەندەۋىنە شىن جاناشىر، ءبىلىم سالاسىنداعى كەلەڭسىزدىكتەردى بۇقپاي ايتادى ءارى ءوز ءىسىنىڭ بىلگىرى.
«2022 جىلدىڭ ۇزدىك سپورتشىسى» بولىپ جانىبەك ءالىمحانۇلى تاڭدالدى. ونىڭ قازاق ەلىنە جەڭىس سىيلاعان شۋاقتى ساتتەرى، قازاقتىڭ رۋحىن كوتەرگەن شاقتارى حالىق جادىندا. تورتكۇل دۇنيە جانىبەكتىڭ ىقپالىمەن قازاق ءتىلىنىڭ قۇدىرەتىن سەزىندى، قازاق ۇلتىنا دەگەن قۇرمەتى ارتتى.
«2022 جىلدىڭ ۇزدىك قارجى ساراپشىسى» بولىپ داۋلەت مۇقاەۆ تاڭدالدى. ول ەكونوميكالىق قۇبىلىستاردى قاراپايىم تىلدە وقىرماندارعا جەتكىزىپ، قازاق حالقىنىڭ الەۋەتىن ارتتىرۋعا ۇلەس قوسىپ ءجۇر.
«2022 جىلدىڭ ۇزدىك ساياسي ساراپشىسى» رەتىندە اسحات قاسەنعالي تاڭدالدى. اۆتوردىڭ تالدامالى، ساراپتامالى جازبالارى وقىرمان قاۋىمنىڭ ءجىتى نازارىندا. ساياساتتانۋشىنىڭ باستى ەرەكشەلىگى، كەز كەلگەن ساياسي قۇبىلىستىڭ تەرەڭىنە ۇڭىلۋىندە جانە ونى ساراپتامالىق سيپاتتا جەتكىزۋىندە.
«2022 جىلدىڭ ۇلت باتىرى» بولىپ اسقار زابيكۋلين تاڭدالدى. حالقىنىڭ اماندىعى جولىندا ورتكە ورانىپ، جانىن قيعان ازاماتتىڭ كوزسىز ەرلىگى قالىڭ كوپشىلىكتىڭ جادىندا جاتتاۋلى. اسقار ءوزىنىڭ ءماندى عۇمىرىندا حالقىن قالاي شىن ءسۇيۋ قاجەت ەكەندىگىن تانىتىپ، كورسەتە ءبىلدى. باتىردىڭ ەسىمى ماڭگىلىك حالقىنىڭ جۇرەگىندە ساقتالادى.
«2022 جىلدىڭ ۇلت قايراتكەرى» بولىپ بالتاش تۇرسىمباەۆ تاڭدالدى. ۇزدىك قايراتكەردىڭ قازاق مۇددەسى ءۇشىن جان بەرىپ، جان الىسىپ كۇرەسكەنى كوپكە ۇلگى. كەيىپكەر ساياساتتاعى شىنشىلدىق، ادامي قاسيەتتەردىڭ حاس كەسكىنى مەن تۋراشىلدىقتى تۋ ەتتى.
«جىل ادامى-2022» بولىپ بەرىك ابىشەۆ تاڭدالدى. "قاڭتار قىرعىنى" كەزىندە قازاقتىڭ ءبورىلى بايراعىن قۇلاتپاي، تۋىن جىقپاي، ەرەن ەرلىگىمەن كوزگە ءتۇستى. ونىڭ حالىقشىل، ۇلتشىل مۇددەسى كوپ قازاقتىڭ مەرەيىن وسىرگەنى راس.
«اقپاراتتىڭ سۇرمەرگەنى - 2022» رەتىندە وڭعار قابدەن تاڭدالدى. كاسىبي جۋرناليست ۋكراينا مەن رەسەي قاقتىعىسىنا قاتىستى ناقتى اقپارات ۇسىنىپ، ەكىباستۇز حالقىن سارشۇناق اياز قىسقاندا، ەلدىڭ ىشىنەن، حالىقتىڭ ورتاسىنان تابىلدى. "اق قار، كوك مۇزدا" اقپارات تاراتتى.
"ادىرنا" ۇلتتىق پورتالى بارلىق مايتالمانداردى شىن جۇرەكتەن قۇتتىقتايدى. جاڭا جىل بارشاڭىزعا تابىس، بەرەكە، باق پەن مولشىلىق اكەلسىن.
"ادىرنا" ۇلتتىق پورتالى
