جىل باسىندا ءبىلىم سالاسى وكىلدەرىنىڭ قاتىسۋىمەن جۇمىس توبى قۇرىلىپ، پەداگوگتەردىڭ اتتەستاتسيادان ءوتۋ جۇيەسىن جەتىلدىرۋ بويىنشا بىرقاتار وزگەرىستەر ەنگىزۋ ۇسىنىلدى. بۇل تۋرالى وقۋ-اعارتۋ ءمينيسترى اسحات ايماعامبەتوۆ عacebook جەلىسىندەگى پاراقشاسىنا جاريالادى، دەپ حابارلايدى "ادىرنا" ۇلتتىق پورتالى.
ءمينيستردىڭ ايتۋىنشا، ۇسىنىستار ادىستەمەگە، ءاربىر بىلىكتىلىك ساناتىنا قويىلاتىن تالاپتارعا، كۇتىلەتىن ناتيجەلەرگە، كاسىبي ستاندارتتىڭ ءوزارا بايلانىسىنا جانە ت.ب. قاتىستى جاسالدى.
قازىر بارلىق پەداگوگ اتتەستاتسيانىڭ ەكى كەزەڭىنەن وتەدى: ءبىرىنشى كەزەڭ - بارلىق پەداگوگتىڭ ءپان مەن وقىتۋ ادىستەمەسىن بىلۋگە ارنالعان تەستىلەۋدەن مىندەتتى تۇردە ءوتۋى جانە ەكىنشى كەزەڭ-پەداگوگ پورتفوليوسىن، جەتىستىكتەرىن باعالاۋ. وسىعان بايلانىستى جۇيەنى جەتىلدىرۋ ءۇشىن كەلەسىدەي وزگەرىستەر ۇسىنىلادى.
ءبىرىنشى كەزەڭگە، ياعني ۇبت-عا (ۇلتتىق بىلىكتىلىك تەستى) قاتىستى.
- ادىستەمە بويىنشا تەستىلەۋ سۇراقتارىن قامتيتىن تولىق تاقىرىپتار مەن ادەبيەتتەر بارلىعىنا قولجەتىمدى بولادى.
- پەداگوگيكالىق ءوتىلى 30 جىل جانە جاڭا اتتەستاتسيا جۇيەسى بويىنشا ساناتى بار پەداگوگتەردى بىلىكتىلىك تەستىلەۋدەن بوساتۋ ۇسىنىلادى. ولار اتتەستاتسيانىڭ ەكىنشى كەزەڭىنەن عانا وتەدى، ياعني پورتفوليو تاپسىرادى. بۇل رەتتە ەگەر ولار بىلىكتىلىك ساناتىن كوتەرگىسى كەلسە، وندا اتتەستاتسيا جالپى نەگىزدە وتەدى. مىسالى، 30 جىلدىق ەڭبەك ءوتىلى بار پەداگوگ-ساراپشى ءوز ساناتىن راستاسا، اتتەستاتسيادان تەك ەكىنشى كەزەڭنەن ۇبت-سىز وتەدى، ال ارتتىرعىسى كەلسە قوسىمشا ۇبت تاپسىرادى.
- سونداي-اق پەداگوگيكالىق ءوتىلى 30 جىل، بىراق ەسكى اتتەستاتتاۋ جۇيەسى بويىنشا جوعارى، ءبىرىنشى ساناتتى پەداگوگتەر، «پەداگوگ-مودەراتور» ساناتىنا اۋىساتىن بولسا، وندا ولار بىلىكتىلىك تەستىلەۋدەن وتۋدەن بوساتىلادى. بۇل جاعدايدا ولار اتتەستاتسيانىڭ ەكىنشى كەزەڭىنەن وتەدى، ياعني پورتفوليو تاپسىرادى. ال ەگەر بۇل پەداگوگتەر اتتەستاتسيانىڭ جاڭا جۇيەسى بويىنشا باسقا ساناتتاردى العىسى كەلسە، وندا اتتەستاتسيا جالپى نەگىزدە وتەدى.
- زەينەتكە شىعۋىنا 4 جىل قالعان مۇعالىمدەر دە جاڭا جۇيە بويىنشا بار ساناتىن راستاعان جاعدايدا ولاردى اتتەستاتسيادان بوساتۋ ۇسىنىلادى. ال ەگەر ولار قولدانىستاعى بىلىكتىلىك ساناتىن، تيىسىنشە الاتىن ۇستەماقىسىن ارتتىرعىسى كەلسە، وندا اتتەستاتسيا جالپى نەگىزدە وتەدى.
مينيستر اتتەستاتسيانىڭ ەكىنشى كەزەڭىندە دە وزگەرىستەر بولاتىنىن جەتكىزدى.
- قۇجاتتاردىڭ سانى ايتارلىقتاي قىسقارادى. ەكىنشى كەزەڭدەگى نەگىزگى باعالاۋ كريتەريلەرى: ساباققا قاتىسۋى جانە ونى تالداۋى، پەداگوگتىڭ بىلىكتىلىكتى ارتتىرۋ كۋرستارىنان ءوتۋى. ۇبدق-دا ءار مۇعالىم ءۇشىن ماڭىزدى اقپاراتى بار ەلەكتروندى پورتفوليو قۇرۋ جوسپارلانىپ وتىر، مۇعالىمدەر اتتەستاتسيا كەزىندە مالىمەتتەردى سول جەردەن الا الادى.
- وقۋشىلاردىڭ ءبىلىم ساپاسى تۋرالى اقپارات اقپاراتتىق جۇيەلەردەن اۆتوماتتى تۇردە الىنادى.
- پەداگوگتىڭ كاسىبي جەتىستىكتەرى مەن وقۋشىلاردىڭ جەتىستىكتەرىنە كەلەتىن بولساق (وليمپيادالار مەن كونكۋرستار), وليمپيادالار مەن كونكۋرستاردىڭ تىزبەسى ايتارلىقتاي كەڭەيتىلەدى.
- ساباقتاردىڭ بەينەجازبالارى مىندەتتى بولمايدى، ونىڭ ورنىنا قاتىسقان ساباققا جانە lesson study تالداۋ جاسالادى.
- سونىمەن قاتار تەستىلەۋدەن ءوتۋ ءتارتىبىن بۇزعان جانە ءوز جەتىستىكتەرى تۋرالى جالعان اقپارات كورسەتكەن تۇلعالارعا 5 جىلعا اتتەستاتسيادان وتۋگە تىيىم سالاتىن نورمانى ەنگىزۋ ۇسىنىلدى.
- پەداگوگيكالىق قىزمەتكە العاش رەت كىرىسكەندەر «پەداگوگ-تاعىلىمگەر» ۋاقىتشا بىلىكتىلىگىن الىپ، ءبىر جىلعا جۇمىسقا قابىلدانادى، سودان كەيىن ولاردا ماماندىققا بەيىمدەلۋ، ەنۋ باعدارلاماسى باستالادى. بۇل باعدارلاما بويىنشا جاس مامانعا تالىمگەر بەكىتىلىپ، ونىڭ كاسىبي دامۋ باعدارلاماسى ازىرلەنەدى، كۋرستاردان ءوتىپ، lesson study جۇرگىزەدى جانە باعدارلاما قورىتىندىسى بويىنشا پەداگوگيكالىق كەڭەس «پەداگوگ» ساناتىن بەرۋ جانە شارتتى ۇزارتۋ تۋرالى ءتيىستى شەشىم قابىلدايدى.
- اتتەستاتسيا مەرزىمىن 3 جىلعا دەيىن قىسقارتپاي، 5 جىلدا ءبىر رەت، ياعني سول كۇيىندە قالدىرۋ تۋرالى شەشىم قابىلداندى.
قابىلدانىپ جاتقان شارالار مۇعالىمدەرگە وزدەرىنىڭ بىلىكتىلىك دەڭگەيىن ارتتىرۋ ماسەلەلەرىنە تيىمدىرەك قاراۋعا مۇمكىندىك بەرىپ، نەگىزگى مىندەتتى، ياعني ءبىلىم ساپاسىن ارتتىرۋدى شەشەتىنىنە سەنىمدىمىن، – دەپ جازدى اسحات ايماعامبەتوۆ.
"ادىرنا" ۇلتتىق پورتالى
