بۇگىن پارلامەنت ماجىلىسىندە «كەيبىر زاڭنامالىق اكتىلەرگە ويىن بيزنەسى، لوتەرەيالار جانە لوتەرەيا قىزمەتى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى تانىستىرىلدى. پەداگوگ - دەپۋتاتتىڭ پايىمى قانداي؟
اتالعان زاڭ جوباسى قۇمار ويىنعا قاتىستى كومپانيالاردىڭ جۇمىسىنا قانشالىقتى شەكتەۋ ەنگىزەدى جانە ول كوسمەتيكالىق زاڭ جوباسى بولىپ شىقپاي ما؟ وسى جانە وزگە دە سۇراقتاردى ءماجىلىس دەپۋتاتى اسحات ايماعامبەتوۆكە قويدىق.
– قۇمار ويىنعا قاتىستى زاڭ بۋكمەكەرلىك كەڭسەلەردىڭ جۇمىسىنا قانشالىقتى تەگەۋرىندى باقىلاۋ ورناتا الادى؟
– زاڭ جوباسى قۇمار ويىنىن ۇيىمداستىراتىن ادامدارعا قولايسىز بولماق. اتالعان زاڭ بويىنشا ويىن بيزنەسىنىڭ يەگەرلەرى جۇزدەگەن ميللاردتاعان تابىسىن جوعالتادى. ويتكەنى جارنامادان باستاپ ادامنىڭ جاسىنا دەيىنگى وتە ۇلكەن شەكتەۋلەر بار. جالپى وسى بيزنەستى شەكتەيتىن ناقتى نورمالار قاراستىرىلدى. سوندىقتان دا ارينە بۇل ويىن بيزنەسى يەلەرىنىڭ مۇددەسىنەن شىقپايتىنى انىق. ءبىزدىڭ ماقساتىمىز جالپى ازاماتتاردىڭ وسى ءبىر ۇلكەن پروبلەمادان قورعاۋ جانە قۇتقارۋ.
قازىر ۇلكەن مەگاپوليستەردە قۇمار ويىندى ناسيحاتتايتىن ۇلكەن بيلبوردتار كوبەيىپ كەتتى. بۇدان بىلاي قۇمار ويىندى ناسيحاتتايتىن جارناما قوعامدىق ورىنداردا قويىلمايدى. بۇل - كومپانيا وكىلدەرىنە ۇلكەن سوققى. بۇل – ءبىر. ەكىنشىدەن، زاڭ جوباسىندا 25 جاسقا دەيىنگى ادامداردىڭ قۇمار ويىنىن ويناۋىنا شەكتەۋ ەنگىزىلىپ جاتىر. ال اليمەنت بويىنشا قارىزى بار ادامداردى ءتىپتى ويىناتپاۋ تۋرالى نورما زاڭ جوباسىندا ەنگىزىلەدى. ءبىر سوزبەن ايتقاندا، مۇنىڭ ءبارى قۇمار ويىن ارتىندا تۇرعان ادامد ءۇشىن ۇلكەن سوققى.
– فۋتبولدان قازاقستان پرەمەر-ليگاسىنىڭ باس دەمەۋشىسى – "Olimpbet" بۋكمەكەرلىك كەڭسەسى. اتالعان كومپانيا وزىنە جارناما جاساۋ مۇمكىندىگىنەن ايرىلا ما؟
– قازىر بىزدە دەنە شىنىقتىرۋ تۋرالى زاڭ جوباسى قارالىپ جاتىر. وسى زاڭ جوباسى شەڭبەرىندە ءبىزدىڭ دەپۋتاتتار تۇزەتۋ بەردى. ول بويىنشا فۋتبول ليگاسىنىڭ اتىن قازىرگىدەن وزگەرتۋ قاراستىرىلىپ جاتىر. جۇمىس توبىندا بۇل ماسەلە قاراستىرىلدى. سوندىقتان بۇل جۇمىس باستالىپ كەتتى دەپ ايتۋعا دا بولادى.
– قۇمار ويىننىڭ ارتىندا ۇلكەن لوببي تۇرعانى بەلگىلى. سىزدەردىڭ ولارعا تەگەۋرىندى قارسىلىق كورسەتۋگە شامالارىڭىز كەلە مە؟ كوسمەتيكالىق زاڭ بولىپ شىقپاي ما؟
– جوق، ولاي دەپ ايتۋعا بولمايدى. ويتكەنى قازىردىڭ وزىندە بۇل ماسەلە بويىنشا مەملەكەت باسشىسى قاۋىپسىزدىك كەڭەسىن وتكىزدى. ۇلتتىق قۇرىلتايدا دا ءتيىستى تاپسىرما بەردى. ۇكىمەتتە زاڭ جوباسىنىڭ قورىتىندىسىن جىلدامداتىپ بىزگە جىبەردى. ەندى قازىر ناقتى جۇمىس باستالدى. زاڭ جوباسى قاراستىرىلىپ جاتىر. بۇل زاڭ جوباسىندا جاڭا وزىڭىزگە ايتقانداي ماڭىزدى نورمالار قاراستىلىپ وتىر. سوندىقتان بۇل نورمالار ناقتى جانە قوردالانعان پروبلەمانى شەشۋگە سەپتىگىن تيگىزەتىن وڭ نورمالار دەپ ايتۋعا بولادى. قادام-قاداممەن ارى قارايدا بۇل ماسەلەنى شەشۋگە مۇمكىندىكتەر جەتكىلىكتى دەپ سانايمىن.
شىنار اقجانقىزى
