قوعامنىڭ ەرتەڭىنە، بولاشاعىنا قاتىستى، قازاقتىڭ ورتاق مۇددەسىنە قاتىستى ءبىر ماسەلەنى كوتەرسەڭ، ءبىزدىڭ قوعام سول ماسەلەنى تەك سول كوتەرگەن ادامنىڭ عانا جەكە باسىنا سالىپ قويادى. "العا، اقىرىنا دەيىن بار! باستادىڭ با، اياقتا!" بىراق قوعامنىڭ باسىم كوپشىلىگى فەيسبۋكتە "قولدايمىز!" دەگەننەن اسپايدى. كىم قانداي ماسەلە كوتەرسە، سول ادام سول ماسەلەنى اقىرىنا دەيىن جەتكىزۋى كەرەك. ولسە دە، جوق بولسا دا ونىڭ مىندەتى سول بولۋى كەرەك.
ال، ناتيجە شىقسا، قوعام جاقسىلىعىن كورەدى، بىراق تەز ۇمىتادى. ەگەر دە سول ادام ءوزىنىڭ كوتەرگەن ماسەلەسىن سوڭىنا دەيىن جەتكىزە الماسا، (ارينە ول جالعىز ەشتەڭە ىستەي المايدى) ونىڭ ارتىنان "باستادى دا، تاستاپ كەتتى، ونىڭ تىرلىگى ماسكا، كوزبوياۋشىلىق، ۇپاي جيناپ ءجۇر" دەگەن سوزدەر ايتادى.
كومەكتەسۋ دەگەن جوق. سۇمدىق ەگويزم، ماسكا، مەنمەنشىلدىك.
تالاي مىقتى ازاماتتاردىڭ ارتىنان وسىنداي سوزدەر ايتىلىپ، تالايىنىڭ تاۋى شاعىلىپ تا كەتتى. سەبەبى، قوعام ولاردىڭ قانداي ماسەلە كوتەرىپ وتىرعانىن بىلگەنىمەن، نە ىستەسە دە ءوزى ءبىلسىن، ءوزى كورەدى نە بولسا دا دەپ مەلشيىپ وتىرا بەرەدى.
ءبىزدىڭ قوعامنىڭ ماسكا كيگەنى سونشالىقتى، ورتاق مۇددەگە، ورتاق يدەياعا جۇمىس جاساعا كەلگەندە تىم-تىرىس، تەرىس اينالىپ شىعا كەلەدى. قازاقتىڭ مۇلدەم باسىنىڭ بىرىكپەي وتىرعانى دا وسىدان.
بۇل قوعام جالعىز ادامدى العا سالىپ، ايداپ وتىراتىن ەكىجۇزدى قوعامعا اينالىپ تىنعان. ەگەر قانداي دا ءبىر ازاماتتار قوعامنىڭ بولاشاعىنا قاجەتتى باستامالاردى كوتەرىپ شىقسا، قوعام ونى تەرەڭىنەن ءتۇسىنىپ، جاپپاي قولداپ كەتەتىن ءۇردىس قالىپتاسسا، بىزدە وسى ۋاقىتقا دەيىن تالاي-تالاي دۇنيەلەر شەشىمىن تاۋىپ كەتەر ەدى.
وتىرىپ الىپ جالعىز ادامعا اقىرىنا دەيىن جەتكىز، اقىرىنا دەيىن بار دەپ وتىراتىن قوعام ءالى تالاي رەسۋرسىنان ايىرىلادى. مەنىڭشە، بۇل ءالى باسى عانا سياقتى. مۇنداي قوعام ەشقاشان دا دامىمايدى، ەشقاشان دا ورتاق يدەياعا جۇمىس جاساي المايدى. ال، جالعىز دارا ادامدار ەشقايدا بارا المايدى.
ءسوزدىڭ شىندىعى وسى. شىندىقتان ەشقايدا قاشىپ قۇتىلا المايسىڭ.
بەكبولات قارجان،
"ادىرنا" ۇلتتىق پورتالى
