Qoǵamnyń erteńine, bolashaǵyna qatysty, qazaqtyń ortaq múddesine qatysty bir máseleni kóterseń, bizdiń qoǵam sol máseleni tek sol kótergen adamnyń ǵana jeke basyna salyp qoıady. "Alǵa, aqyryna deıin bar! Bastadyń ba, aıaqta!" Biraq qoǵamnyń basym kópshiligi feısbýkte "Qoldaımyz!" degennen aspaıdy. Kim qandaı másele kóterse, sol adam sol máseleni aqyryna deıin jetkizýi kerek. Ólse de, joq bolsa da onyń mindeti sol bolýy kerek.
Al, nátıje shyqsa, qoǵam jaqsylyǵyn kóredi, biraq tez umytady. Eger de sol adam óziniń kótergen máselesin sońyna deıin jetkize almasa, (árıne ol jalǵyz eshteńe isteı almaıdy) onyń artynan "bastady da, tastap ketti, onyń tirligi maska, kózboıaýshylyq, upaı jınap júr" degen sózder aıtady.
Kómektesý degen joq. Sumdyq egoızm, maska, menmenshildik.
Talaı myqty azamattardyń artynan osyndaı sózder aıtylyp, talaıynyń taýy shaǵylyp ta ketti. Sebebi, qoǵam olardyń qandaı másele kóterip otyrǵanyn bilgenimen, ne istese de ózi bilsin, ózi kóredi ne bolsa da dep melshıip otyra beredi.
Bizdiń qoǵamnyń maska kıgeni sonshalyqty, ortaq múddege, ortaq ıdeıaǵa jumys jasaǵa kelgende tym-tyrys, teris aınalyp shyǵa keledi. Qazaqtyń múldem basynyń birikpeı otyrǵany da osydan.
Bul qoǵam jalǵyz adamdy alǵa salyp, aıdap otyratyn ekijúzdi qoǵamǵa aınalyp tynǵan. Eger qandaı da bir azamattar qoǵamnyń bolashaǵyna qajetti bastamalardy kóterip shyqsa, qoǵam ony tereńinen túsinip, jappaı qoldap ketetin úrdis qalyptassa, bizde osy ýaqytqa deıin talaı-talaı dúnıeler sheshimin taýyp keter edi.
Otyryp alyp jalǵyz adamǵa aqyryna deıin jetkiz, aqyryna deıin bar dep otyratyn qoǵam áli talaı resýrsynan aıyrylady. Menińshe, bul áli basy ǵana sııaqty. Mundaı qoǵam eshqashan da damymaıdy, eshqashan da ortaq ıdeıaǵa jumys jasaı almaıdy. Al, jalǵyz dara adamdar eshqaıda bara almaıdy.
Sózdiń shyndyǵy osy. Shyndyqtan eshqaıda qashyp qutyla almaısyń.
Bekbolat QARJAN,
"Adyrna" ulttyq portaly
