2021 جىلعى 19 مامىردا ساعات 15.00-دە شىمكەنت قالاسىنداعى «قازاقستان حالقى اسسامبلەياسى» عيماراتى الدىنان شىمكەنت قالاسى قازاقستان حالقى اسسامبلەياسى وكىلدەرىنىڭ قاتىسۋىمەن شىعىس قازاقستان وبلىسى ريددەر قالاسىندا ورتتەن زارداپ شەككەن وتباسىلارعا ارنالعان گۋمانيتارلىق كومەك كەرۋەنى جونەلتىلدى.
شىعىس قازاقستاندا ورىن العان تەحنوگەندىك اپاتتان كەيىن شىمكەنت قالاسىندا «ريددەر، ءبىز بىرگەمىز!» ايدارىمەن زارداپ شەككەن وتباسىلارعا قايىرىمدىلىق كومەك ۇيىمداستىرۋ شتابتارى قۇرىلعان بولاتىن. مۇنداي شتابتار قالامىزداعى «جاستار رەسۋرستىق ورتالىعى» مەن «قوعامدىق كەلىسىم» مەكەمەلەرى جانىنان اشىلىپ، شىعىسقازاقستاندىق ازاماتتارعا گۋمانيتارلىق كومەك كورسەتۋگە ازاماتتىق ۇيىمدار، ۆولونتەرلىق قوزعالىستار، ەتنومادەني بىرلەستىكتەر، جاستار ۇيىمدارى جۇمىلدىرىلدى.
شىمكەنت قالاسىنىڭ جاستار ۇيىمدارى 15 مامىردا ەكى جۇك كولىگىنە تيەلگەن گۋمانيتارلىق كومەك كەرۋەنىنىڭ العاشقى لەگىن ريددەر قالاسىنا جونەلتكەن ەدى.
قالالىق قازاقستان حالقى اسسامبلەياسىنىڭ مۇشەلەرى دە ەل بولىپ اتقارىلاتىن باستامادان شەت قالماي، زارداپ شەككەن وتباسىلارعا قاجەتتى ازىق-تۇلىك تاۋارلارى مەن تۇرمىستىق قاجەتتىلىك زاتتارىن جيناقتادى. ناتيجەسىندە قالا تۇرعىندارى مەن ەتنوس وكىلدەرى تاراپىنان 3 توننا ۇن، 2 توننا كوكونىس پەن جەمىس-جيدەك، 500 كگ. كۇرىش، 1,5 توننا باسقادا ازىق-تۇلىك تاۋارلارى (ماكارون، ءشاي ونىمدەرى، قانت، كونفەت، كۇلشە، ماي، ت.ب), 800 دانا اسحانالىق سۋ مەن سۋسىندار، شارۋاشىلىق بۇيىمدارى، توسەك جابدىقتارى، بارلىعى 8 توننادان استام جۇك جينالدى.
قوعامدا قايىرىمدىلىقتى دامىتۋ ارقىلى ءوزارا باۋىرلاستىعىمىزدى نىعايتۋعا، ءبىر-بىرىمىزگە دەگەن جاناشىرلىق قاسيەتتى جانداندىرۋعا قالادا ارەكەت ەتەتىن 17 ەتنومادەني بىرلەستىك جۇمىلىپ، اۋىزبىرشىلىگىمىزدىڭ جوعارى ۇلگىسىن كورسەتتى.
يگى ءىستى ۇيىمداستىرىپ، وتكىزۋگە «Silkway» حالىقارالىق ۋنيۆەرسيتەتى، وزبەك، كورەي، شەشەن-ينگۋش، ۇيعىر، نەمىس ەتنومادەني بىرلەستىكتەرى، قالالىق اسسامبلەيا جانىنداعى انالار كەڭەسى بەلسەندىلىك تانىتىپ، جوعارى ازاماتتىق باستاماشىلدىعىمەن كوزگە ءتۇستى.
ايتا كەتۋ كەرەك، ەلباسى نۇرسۇلتان نازارباەۆتىڭ تاپسىرماسىمەن ەلىمىزدەگى قايىرىمدىلىق ىستەرىنىڭ ۇيلەستىرۋشى مىندەتىن اتقارۋ قازاقستان حالقى اسسامبلەياسىنا جۇكتەلگەن بولاتىن. اسسامبلەيا وكىلدەرى جىل سايىن ءداستۇرلى تۇردە قوعامدا قايىرىمدىلىقتى ىلگەرىلەتۋگە ارنالعان كەشەندى ءىس-شارالار ۇيىمداستىرىپ كەلەدى.
بيىلعى جىل ەل تاۋەلسىزدىگىنىڭ 30 جىلدىق مەرەيلى بەلەسىنە وراي قازاقستان حالقى اسسامبلەياسىنىڭ جالپىحالىقتىق «30 يگى ءىس» قايىرىمدىلىق مارافونى باستاۋ الدى. وسى كەشەندى ءىس-شارا اياسىندا شىمكەنت قالاسىندا قايىرىمدىلىق تاقىرىبى اياسىندا 4 اۋقىمدى جوبا ىسكە اساتىن بولادى.
