2021 jylǵy 19 mamyrda saǵat 15.00-de Shymkent qalasyndaǵy «Qazaqstan halqy Assambleıasy» ǵımaraty aldynan Shymkent qalasy Qazaqstan halqy Assambleıasy ókilderiniń qatysýymen Shyǵys Qazaqstan oblysy Rıdder qalasynda órtten zardap shekken otbasylarǵa arnalǵan gýmanıtarlyq kómek kerýeni jóneltildi.
Shyǵys Qazaqstanda oryn alǵan tehnogendik apattan keıin Shymkent qalasynda «Rıdder, biz birgemiz!» aıdarymen zardap shekken otbasylarǵa qaıyrymdylyq kómek uıymdastyrý shtabtary qurylǵan bolatyn. Mundaı shtabtar qalamyzdaǵy «Jastar resýrstyq ortalyǵy» men «Qoǵamdyq kelisim» mekemeleri janynan ashylyp, shyǵysqazaqstandyq azamattarǵa gýmanıtarlyq kómek kórsetýge azamattyq uıymdar, volonterlyq qozǵalystar, etnomádenı birlestikter, jastar uıymdary jumyldyryldy.
Shymkent qalasynyń jastar uıymdary 15 mamyrda eki júk kóligine tıelgen gýmanıtarlyq kómek kerýeniniń alǵashqy legin Rıdder qalasyna jóneltken edi.
Qalalyq Qazaqstan halqy Assambleıasynyń músheleri de el bolyp atqarylatyn bastamadan shet qalmaı, zardap shekken otbasylarǵa qajetti azyq-túlik taýarlary men turmystyq qajettilik zattaryn jınaqtady. Nátıjesinde qala turǵyndary men etnos ókilderi tarapynan 3 tonna un, 2 tonna kókónis pen jemis-jıdek, 500 kg. kúrish, 1,5 tonna basqada azyq-túlik taýarlary (makaron, sháı ónimderi, qant, konfet, kúlshe, maı, t.b), 800 dana ashanalyq sý men sýsyndar, sharýashylyq buıymdary, tósek jabdyqtary, barlyǵy 8 tonnadan astam júk jınaldy.
Qoǵamda qaıyrymdylyqty damytý arqyly ózara baýyrlastyǵymyzdy nyǵaıtýǵa, bir-birimizge degen janashyrlyq qasıetti jandandyrýǵa qalada áreket etetin 17 etnomádenı birlestik jumylyp, aýyzbirshiligimizdiń joǵary úlgisin kórsetti.
Igi isti uıymdastyryp, ótkizýge «Silkway» Halyqaralyq ýnıversıteti, ózbek, koreı, sheshen-ıngýsh, uıǵyr, nemis etnomádenı birlestikteri, qalalyq Assambleıa janyndaǵy Analar keńesi belsendilik tanytyp, joǵary azamattyq bastamashyldyǵymen kózge tústi.
Aıta ketý kerek, Elbasy Nursultan Nazarbaevtyń tapsyrmasymen elimizdegi qaıyrymdylyq isteriniń úılestirýshi mindetin atqarý Qazaqstan halqy Assambleıasyna júktelgen bolatyn. Assambleıa ókilderi jyl saıyn dástúrli túrde qoǵamda qaıyrymdylyqty ilgeriletýge arnalǵan keshendi is-sharalar uıymdastyryp keledi.
Bıylǵy jyl el Táýelsizdiginiń 30 jyldyq mereıli belesine oraı Qazaqstan halqy Assambleıasynyń jalpyhalyqtyq «30 ıgi is» qaıyrymdylyq marafony bastaý aldy. Osy keshendi is-shara aıasynda Shymkent qalasynda qaıyrymdylyq taqyryby aıasynda 4 aýqymdy joba iske asatyn bolady.
