قاسيەتتى رامازان ايىندا ءتۇرلى دەڭگەدەگى قايىرىمدىلىق شارالارىن ۇيىمداستىرعان بىرقاتار ازاماتتارعا شىمكەنت قالاسىنىڭ اكىمى مۇرات ايتەنوۆتىڭ اتىنان العىس حات تابىستالدى.
قالا اكىمىنىڭ ارنايى جولداعان العىس حاتىن شىمكەنت قالاسىنىڭ باس يمامى باقداۋلەت ابدراحمانوۆ تابىس ەتىپ، ەل تاۋەلسىزدىگىنىڭ 30 جىلدىعى مەن «شىمكەنت – قايىرىمدى قالا» جوباسى اياسىندا ايانباي قىزمەت ەتۋگە شاقىردى.
العىس حاتقا «زەكەت جانە قايىرىمدىلىق» قورىنىڭ شىمكەنت قالاسىنداعى وكىلى ايبەك ازيمباەۆ جانە الجان ساديەۆ، ەرجىگىت دوسىمباەۆ، نىعمەت ايداروۆ، ەرحان ءابىش ت.ب كاسىپكەر ازاماتتار يە بولدى.
ايتا كەتەيىك، قاسيەتتى رامازان ايىندا قالاداعى 32 مەشىت تاراپىنان 42 255 ادامعا (سۋ، قۇرما، نان، كونفەت، ىستىق تاماق، سالات، ايران ت.ب) «اۋىزاشار سەبەتى» ۇلەستىرىلسە، كاسىپكەرلەر مەن مەشىت جاماعاتى تاراپىنان 32 500 مۇقتاج وتباسىعا ازىق-تۇلىك (ۇن، ماي، ءشاي، كۇرىش، قانت، تۇز، ەت جانە ماكارون ونىمدەرى، تاتتىلەر، قۇرما، كارتوپ، پياز، ءسابىز، ت.ب) سالىنعان «رامازان قورجىنى» تاراتىلىپ، جەتكىزىلدى. جالپى قاسيەتتى ايدا 74 755 مۇقتاج وتباسىعا كومەك بەرىلدى.
