شىمكەنت قالاسىندا اۋا رايىنىڭ كۇرت جىلىنىپ كەتۋىنە بايلانىستى سۋعا شومىلۋ ماۋسىمى وزگە وڭىرلەرگە قاراعاندا ەرتە باستالىپ كەتەدى. رەسمي تۇردە شومىلۋ ماۋسىمى اشىق دەپ جاريالانباسادا بۇگىندە بالالار سۋعا شومىلۋدى باستاپ كەتكەن. وسىعان وراي، توتەنشە جاعدايلار دەپارتامەنتى سۋعا شومىلۋ ماۋسىمىنا دايىندىق جانە قاۋىپسىزدىك شارالارى جونىندە ايتىپ، قاۋىپسىزدىك ەرەجەلەرىن ساقتاۋعا شاقىرادى.
قاۋىپسىزدىك ادام ومىرىندەگى ەڭ ماڭىزدى فاكتوردىڭ ءبىرى بولىپ تابىلادى. وسى ورايدا، اتالمىش دەپارتامەنت ءوز قۇزىرى اياسىندا ءوڭىردىڭ سۋ ايدىندارىندا ەرەسەكتەر مەن بالالار ولىمىنە جول بەرمەۋ شارالارىن قامتاماسىز ەتەدى. شىمكەنت قالاسىنىڭ اۋماعىندا قازىرگى تاڭدا سۋعا شومىلۋعا رۇقسات ەتىلگەن 5 دەمالىس ايماعى بار. ولار توعىس سۋ قويماسىنداعى «حولوديلنيك» دەمالىس ورنى، بادام سۋ قويماسىنداعى «راحات بادام» دەمالىس ورنى، قوشقار اتا وزەنىنىڭ باستاۋى، شىمكەنت مەملەكەتتىك دەندرولوگيالىق ساياباعىنداعى كول مەن «جايلاۋكول» (تۇلپار). اتالعان دەمالىس ايماقتارىنىڭ يەلەرى دەمالۋشىلاردىڭ قاۋىپسىزدىگىنە تىكەلەي جاۋاپتى بولادى.
توتەنشە جاعدايلار دەپارتامەنتىمەن قازىرگى كەزدە سۋداعى قاۋىپسىزدىك ءىس-شارالارىنا بايلانىستى جەرگىلىكتى ورگاندارمەن بىرىگىپ جۇمىس جۇرگىزىلۋدە. سونىمەن قاتار، قالا كولەمىندە دەپارتامەنت قىزمەتكەرلەرىمەن «قاۋىپسىز جاز» اكتسياسى اياسىندا بۇقارالىق اقپارات قۇرالدارى ارقىلى ماقالالار جاريالانىپ، سۇحباتتار ۇيىمداستىرىلىپ، حالىقپەن اڭگىمەلەسۋ جۇمىستارى جۇرگىزىلۋدە.
بۇدان بولەك، دەپارتامەنتتىڭ قۇرىلىمدىق بولىمشەلەرى اۋداندىق پوليتسيا باسقارمالارىنىڭ قىزمەتكەرلەرىمەن بىرلەسىپ شومىلۋ ماۋسىمى اياسىندا كۇندەلىكتى رەيدتىك ءىس-شارالار جۇرگىزەتىن بولادى. ءبىلىم باسقارماسىمەن بىرلەسىپ، «سۋداعى قاۋىپسىزدىكتى قامتاماسىز ەتۋ ماقساتىندا WhatsApp الەۋمەتتىك جەلىلەرى ارقىلى مەكتەپتەر مەن بالاباقشالاردىڭ «اتا-انالار» توپتارىنا جادنامالار مەن بەينەروليكتەر ورنالاستىرۋ جۇمىستارى بەلسەندى تۇردە جۇزەگە اسىرىلۋدا.
شىمكەنت قالاسى اكىمدىگىنىڭ ءباسپاسوز قىزمەتى
