شىمكەنت ەلىمىزدەگى ەكونوميكالىق ءوسىمى ارتقان ەكى ايماقتىڭ ءبىرى

3436
Adyrna.kz Telegram

بۇگىنگى ۇكىمەت وتىرىسىندا قر ۇلتتىق ەكونوميكا ءمينيسترى اسەت ەرعاليەۆ ەكونوميكانىڭ 7 كورسەتكىشى بويىنشا ەكى ءوڭىر عانا ءوسىم كورسەتكەنىن ايتتى. ونىڭ ايتۋىنشا، ەكونوميكانىڭ 7 كورسەتكىشى بويىنشا وڭ ءوسىم شىمكەنت قالاسى جانە ماڭعىستاۋ وبلىسىندا بايقالىپ وتىر. ال، 6 كورسەتكىش بويىنشا بەس وڭىردە ءوسىم تىركەلگەن ەكەن. ولار: اقمولا، اقتوبە، جامبىل، قاراعاندى جانە قوستاناي وبلىستارى.

مينيستر ساۋدا جانە كولىك بويىنشا جاعداي جاقسارىپ كەلە جاتقانىن، بۇل وڭىرلەردەگى ىسكەرلىك بەلسەندىلىكتىڭ ارتقانىن ايعاقتايتىنىن باسا ايتتى. «ساۋدا بويىنشا 13 وڭىردە ءوسىم بايقالادى. بۇل رەتتە بولشەك ساۋدا 6,2 پايىزعا ءوسىپ، ىشكى سۇرانىستىڭ قالپىنا كەلۋىن كورسەتەدى. اتىراۋ وبلىسىنان باسقا، ماڭعىستاۋ وبلىسى جانە شىمكەنت قالاسىنىڭ كولىك سالاسى بويىنشا قىزمەت كورسەتۋ جاقساردى»، - دەدى اسەت ەرعاليەۆ.

سونداي-اق، قر ۇلتتىق ەكونوميكا ءمينيسترى اسەت ەرعاليەۆ ەكونوميكالىق ءوسىمدى قالپىنا كەلتىرۋ ءۇشىن ءىرى كومپانيالارمەن ينۆەستيتسيالىق كەلىسىمدەردى ىسكە اسىرۋعا، اۋىل شارۋاشىلىعى جانە قۇرىلىس-مونتاج جۇمىستارىنىڭ ماۋسىمىن بەلسەندى وتكىزۋگە جانە «جۇمىسپەن قامتۋ جول كارتاسى» مەن «ەڭبەك» باعدارلامالارى اياسىندا تارگەتتەلگەن تۇراقتى جۇمىس ورىندارىن قۇرۋ قاجەتتىگىن ايتتى.

شىمكەنت قالاسى اكىمدىگىنىڭ ءباسپاسوز قىزمەتى

 

پىكىرلەر