10-14 ساۋىردە "اتىراۋ" سپورت كەشەنىندە 2007-2008 جىلى تۋعان كىشى جاسوسپىرىمدەر اراسىندا بوكستان قازاقستان رەسپۋبليكاسىنىڭ چەمپيوناتى مارەسىنە جەتتى.
ءتورت كۇن بويى 250-گە جۋىق بىلعارى قولعاپ شەبەرلەرى ءوزارا مىقتىنى انىقتادى. كارانتيندىك شەكتەۋلەرگە بايلانىستى سپورتتىق شارا كورەرمەنسىز ءوتتى.
ناتيجەسىندە، اتىراۋ وبلىسىنىڭ بوكسشىلارى 1 التىن، 2 كۇمىس جانە 3 قولا جۇلدەگە يە بولدى.
66 كەلىدە الپىسباەۆ جاندوس التىن جۇلدە جانە جارىستىڭ “ەڭ ۇزدىك بوكسشىسى” اتاعىنا يە بولدى. 42 كەلىدە احمەت داۋلەتكەرەي مەن 60 كەلىدە قابدراحيم مانسۋر اقتىق سىنعا دەيىن جەتىپ، كۇمىس جۇلدەگەر اتاندى. 46 كەلىدە سەرگەي نۇراسىل، 48 كەلىدە مارات انۋاربەك جانە 52 كەلىدە دجاربۋلوۆ ارتۋر قولا مەدال ەنشىلەدى.
ءبىزدىڭ باستى ماقسات – جاسوسپىرىمدەر سپورتىن دامىتۋ ارقىلى رەزەرۆ قالىپتاستىرۋ. وسىعان وراي ەل چەمپيوناتىن اتىراۋ وبلىسىندا ۇيىمداستىرۋدى ءجون كوردىك. بۇگىنگى جارىستا جۇلدەگەرلەر قاتارىنان كورىنگەن سپورتشىلارىمىز الدا تالاي بيىكتەردى باعىندىرادى دەپ سەنەمىن، – دەدى باسقارما باسشىسى رينات يبراگيموۆ.
ايتا كەتەيىك، مامىر ايىندا قازاقستان رەسپۋبليكاسىنىڭ جاستار ويىندارى اياسىندا بوكس باسەكەلەرى اتىراۋ قالاسىندا وتەدى.
