الەۋمەتتىك جەلىدە قارماقشى اۋدانىنا قاراستى اۋىل مەكتەبى مۇعالىمىنىڭ ءبىلىم ورداسىندا سىرا ءىشىپ وتىرعان فوتوسۋرەتى تارادى. بۇل تۋرالى اسلان وماروۆ ەسىمدى جەلى قولدانۋشىسى جاريالادى.
مەكتەپ مۇعالىمى سىنىپتىڭ ىشىندە سىرا ءىشىپ وتىرعان جەرىنەن سۋرەتكە ءتۇسىپ قالعان. الايدا كابينەتتىڭ ىشىندە تاعى كىمدەردىڭ بولعانى بەلگىسىز.
«مەكتەپ - وقۋشىلار جوقتا بىلگەنىن جاساپ جۇرەتىن مەكەن بولىپ كەتكەن بە؟ قىزىلوردا وبلىسى، قارماقشى اۋدانى تۇرماعامبەت ىزتىلەۋوۆ اتىنداعى ورتا مەكتەپ ديرەكتورىنىڭ وقۋ ءىسى جونىندەگى ورىنباسارى جىراۋلار شىققان قاسيەتتى ءوڭىردىڭ ءبىلىم بەرۋ ۇيىمىندا ىشىمدىك ءىشىپ، ۇستازدارعا ادىستەمەلىك كومەك بەرىپ، وقۋشىلار مەن اتا-انالارعا ۇلگى ونەگە كورسەتىپ ءجۇر.
مىنا حانىمعا وسىلاي ءبىلىم ورداسىندا جۇرۋگە كىم رۇقسات بەرىپ قويعان؟ مىنادان كەيىن قالاي مۇعالىمدەرگە بالانى سەنىپ تاپسىرامىز؟»، - دەپ جازعان اۆتور.
قىزىلوردا وبلىسى اكىمدىگىنىڭ ءباسپاسوز قىزمەتىندەگىلەر Azattyq Rýhy تىلشىسىنە بۇل وقيعادان حاباردار ەكەنىن جانە قازىر اتالعان فاكتىگە قاتىستى تەكسەرىس جۇرگىزىلىپ جاتقانىن حابارلادى.
«قارماقشى اۋدانى، ت.ىزتىلەۋوۆ اتىنداعى №29 ورتا مەكتەبىنىڭ مۇعالىمىنە قاتىستى الەۋمەتتىك جەلىدە تارالعان پەداگوگتىڭ ارەكەتى بويىنشا اۋداندىق ءبىلىم بولىمىمەن قىزمەتتىك تەكسەرۋ جۇمىستارى جۇرگىزىلۋدە. بۇل رەتتە قىزمەتتىك تەكسەرۋ ارقىلى پەداگوگيكالىق ەتيكا تالاپتارىنىڭ جانە مەكتەپتىڭ ىشكى ءتارتىپ ەرەجەلەرىمەن، ەڭبەك زاڭنامالارىنىڭ ساقتالۋى قارالاتىن بولادى. ناتيجەسىمەن، زاڭعا سايكەس شەشىم قابىلدانادى»، - دەلىنگەن حابارلامادا.
"ادىرنا" ۇلتتىق پورتالى
