Áleýmettik jelide Qarmaqshy aýdanyna qarasty aýyl mektebi muǵaliminiń bilim ordasynda syra iship otyrǵan fotosýreti tarady. Bul týraly Aslan Omarov esimdi jeli qoldanýshysy jarııalady.
Mektep muǵalimi synyptyń ishinde syra iship otyrǵan jerinen sýretke túsip qalǵan. Alaıda kabınettiń ishinde taǵy kimderdiń bolǵany belgisiz.
«Mektep - oqýshylar joqta bilgenin jasap júretin meken bolyp ketken be? Qyzylorda oblysy, Qarmaqshy aýdany Turmaǵambet Iztileýov atyndaǵy orta mektep dırektorynyń oqý isi jónindegi orynbasary jyraýlar shyqqan qasıetti óńirdiń bilim berý uıymynda ishimdik iship, ustazdarǵa ádistemelik kómek berip, oqýshylar men ata-analarǵa úlgi ónege kórsetip júr.
Myna hanymǵa osylaı bilim ordasynda júrýge kim ruqsat berip qoıǵan? Mynadan keıin qalaı muǵalimderge balany senip tapsyramyz?», - dep jazǵan avtor.
Qyzylorda oblysy ákimdiginiń baspasóz qyzmetindegiler Azattyq Rýhy tilshisine bul oqıǵadan habardar ekenin jáne qazir atalǵan faktige qatysty tekseris júrgizilip jatqanyn habarlady.
«Qarmaqshy aýdany, T.Iztileýov atyndaǵy №29 orta mektebiniń muǵalimine qatysty áleýmettik jelide taralǵan pedagogtyń áreketi boıynsha aýdandyq bilim bólimimen qyzmettik tekserý jumystary júrgizilýde. Bul rette qyzmettik tekserý arqyly pedagogıkalyq etıka talaptarynyń jáne mekteptiń ishki tártip erejelerimen, eńbek zańnamalarynyń saqtalýy qaralatyn bolady. Nátıjesimen, zańǵa sáıkes sheshim qabyldanady», - delingen habarlamada.
"Adyrna" ulttyq portaly
