شىمكەنتتە ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيا وتىرىسى ءوتتى

2865
Adyrna.kz Telegram

شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقاننىڭ توراعالىعىمەن شىمكەنت قالاسى اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى كوميسسيانىڭ ونلاين وتىرىسى ءوتتى. وعان قۇزىرلى مەملەكەتتىك ورگاندار باسشىلارى جانە جەرگىلىكتى ۇكىمەتتىك ەمەس ۇيىمدار جەتەكشىلەرى قاتىستى.

ونلاين-كەڭەس بارىسىندا «قازاقستان رەسپۋبليكاسىنداعى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسىن» ىسكە اسىرۋ بويىنشا بىرقاتار ماسەلەلەر قاراستىرىلدى. ونىڭ ىشىندە، بەكىتىلگەن جوسپارعا سايكەس ايەلدەردى زورلىق-زومبىلىقتان قورعاۋ باعىتىنداعى ۋچاسكەلىك ينسپەكتورلاردىڭ جۇمىسى، ەرلى-زايىپتىلاردىڭ اجىراسۋ كورسەتكىشى مەن ديناميكاسى، داعدارىس ورتالىعىنداعى ازاماتتاردىڭ جاعدايى مەن قوعامدىق ۇيىمدارمەن مەملەكەتتىك تاپسىرىس اياسىندا اتقارىلىپ جاتقان جۇمىستارى تۋرالى قالالىق جۇمىسپەن قامتۋ جانە الەۋمەتتىك قورعاۋ، ىشكى ساياسات جانە جاستار ىستەرى جونىندەگى باسقارمالارى، قاراتاۋ اۋدانى اكىمى ورىنباسارىنىڭ جانە جەرگىلىكتى پوليتسيا دەپارتامەنتى باسشىلارىنىڭ ەسەپتەرى تىڭدالدى.

سونداي-اق، وتباسىندا زورلىق-زومبىلىق كورگەن ايەلدەردىڭ قۇقىقتارىن قورعاۋ سياقتى ماڭىزدى ماسەلەلەردىڭ سەبەپتەرى مەن شەشۋ جولدارى قاراستىرىلدى.

جيىن سوڭىندا شىمكەنت قالاسىنىڭ اكىمى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى وڭىرلىك كوميسسيا تاراپىنان ءتيىستى جۇمىستاردى جۇرگىزۋ بويىنشا بىرقاتار ءتيىستى ورگاندارعا ۇسىنىستار بەرىلدى.

شىمكەنت قالاسى اكىمدىگىنىڭ ءباسپاسوز قىزمەتى

پىكىرلەر