شىمكەنت قالاسى اكىمى م.ايتەنوۆ قالا اۋماعىنداعى سانيتارلىق تازالاۋ، كوگالداندىرۋ جانە اباتتاندىرۋ جۇمىستارى بويىنشا اباي، ءال-فارابي، ەڭبەكشى، قاراتاۋ اۋدان اكىمدەرىنىڭ ەسەبىن تىڭدادى.
كوكتەم شىعا قالا ۇيىلگەن قوقىس پەن ويدىم جولدىڭ ورتاسىندا قالاتىنىن ايتقان قالا اكىمى بۇگىندە شاھار شاڭى بۇرقىراپ تۇرعانىن ايتىپ، ءتورت اۋدان اكىمىنە سىن-ەسكەرتپە ايتىپ، قالا تازالىعىن رەتكە كەلتىرمەسە اۋدان اكىمدەرىنىڭ جاۋاپكەرشىلىگى قارالاتىنىن جەتكىزدى.
«بيىلعى جىلدان باستاپ قالانىڭ سانيتارلىق تازالىعىن قامتاماسىز ەتۋ جۇمىستارى قالالىق ەنەرگەتيكا جانە كوممۋنالدىق شارۋاشىلىق باسقارماسىنان ءتورت اۋدان اكىمدەرىنە جۇكتەلدى. بۇل شەشىمنىڭ باستى ماقساتى – جۇمىستى وڭتايلاندىرىپ، اۋدان اكىمدەرىنىڭ قۇزىرىن كۇشەيتىپ، اۋدان اكىمى مەن تۇرعىندار اراسىنداعى كەرى بايلانىستى نىعايتۋ بولاتىن. بىراق ماعان الدىن الا بەرىلگەن اقپاراتقا سايكەس، قالا تازالىعى ءتيىستى دارەجەدە دەپ ايتۋعا قيىن»،-دەدى قالا باسشىسى.
اكىم اباي اۋدانىنداعى «جاڭاتالاپ»، تۇرعىن الابىنداعى بادام وزەنىنىڭ بويىنداعى قوقىستار، «اقجار»، «قىزىلجار»، «اقتاس»، «قازىعۇرت» شاعىن اۋداندارى مەن تۇرعىن الاپتارىنىڭ كورىنىسى سىن كوتەرمەيتىنىن ايتىپ، اۋدان اۋماعىندا تۇرمىستىق جانە قۇرىلىس قالدىقتارى جينالمايتىنىن جانە وزەن ارنالارىندا پلاستيك زاتتار مەن ءولى مال كوپتەپ كەزدەسەتىنىن اتاپ ءوتتى.
ءدال وسىنداي جاعداي ءال-فارابي اۋدانىنداعى «ساۋلە» شاعىن اۋدانى مەن تەرەشكوۆا، حلوپزاۆود كوشەلەرىندە، ەڭبەكشى اۋدانىنىڭ «بادام-2»، «تۇردىاباد»، «جىلانبۇزعان» تۇرعىن الاپتارى جانە №12, №15 شاعىن اۋداندارىندا، اسىرەسە قاراتاۋ اۋدانىنىڭ «بوزارىق»، «تۇران»، «قاينار-بۇلاق»، «شاپىراشتى»، «اسار-2»، «دوستىق» شاعىن اۋداندارىندا جانە «اكىمشىلىك-ىسكەرلىك ورتالىعىندا» دا ورىن العان دەدى.
الەۋمەتتىك جەلىدە دە قالانىڭ سانيتارلىق تازالىعى تۋرالى سىني ماتەريالدار كوپتەپ كەزدەسەتىنىن ايتقان قالا اكىمى بۇل اۋدان اكىمى مەن ونىڭ سانيتارلىق تازالىققا جاۋاپتى ورىنباسارىنىڭ ءتيىستى دەڭگەيدە جۇمىس اتقارمايتىنىن اڭعارتادى دەدى. ماسەلەن، الەۋمەتتىك جەلىلەردەگى پاراقشالاردا ءبىر اپتادا قاراتاۋعا قاتىستى – 18, اباي مەن ەڭبەكشىگە قاتىستى 11, ءال-فارابيگە قاتىستى – 6 سىني ماتەريال جارىق كورگەن.
سونىمەن قاتار، م.ايتەنوۆ تازالىققا تىكەلەي اسەر ەتەتىن رەتسىز ساۋدا ورىندارى ماسەلەسىنە دە توقتالىپ ءوتتى. بۇل ماسەلەنىڭ جىلدار بويى شەشىلمەۋى تەك اۋدان اكىمدەرى عانا ەمەس، جەرگىلىكتى پوليتسيا قىزمەتىنىڭ ءوز مىندەتتەرىنە نەمقۇرايلىقپەن قاراۋ سالدارىنان دەدى.
ءسوز سوڭىندا اكىم رەسپۋبليكالىق قالا مارتەبەسىنە لايىقتى تازا قالا بولۋى ءۇشىن، تۇرعىنداردىڭ مادەنيەتىن كوتەرىپ، بيۋدجەتتەن بولىنگەن قارجىنى ءتيىمدى جۇمساۋ قاجەت ەكەنىن جانە جۇمىستى ءبىر-بىرلەرىڭىزگە سىلتەمەي ءبىر ۇجىم رەتىندە جۇمىس جۇرگىزۋگە شاقىردى.
شىمكەنت قالاسى اكىمدىگىنىڭ ءباسپاسوز قىزمەتى
