Shymkent qalasy ákimi M.Áıtenov qala aýmaǵyndaǵy sanıtarlyq tazalaý, kógaldandyrý jáne abattandyrý jumystary boıynsha Abaı, Ál-Farabı, Eńbekshi, Qarataý aýdan ákimderiniń esebin tyńdady.
Kóktem shyǵa qala úıilgen qoqys pen oıdym joldyń ortasynda qalatynyn aıtqan qala ákimi búginde shahar shańy burqyrap turǵanyn aıtyp, tórt aýdan ákimine syn-eskertpe aıtyp, qala tazalyǵyn retke keltirmese aýdan ákimderiniń jaýapkershiligi qaralatynyn jetkizdi.
«Bıylǵy jyldan bastap qalanyń sanıtarlyq tazalyǵyn qamtamasyz etý jumystary qalalyq energetıka jáne kommýnaldyq sharýashylyq basqarmasynan tórt aýdan ákimderine júkteldi. Bul sheshimniń basty maqsaty – jumysty ońtaılandyryp, aýdan ákimderiniń quzyryn kúsheıtip, aýdan ákimi men turǵyndar arasyndaǵy keri baılanysty nyǵaıtý bolatyn. Biraq maǵan aldyn ala berilgen aqparatqa sáıkes, qala tazalyǵy tıisti dárejede dep aıtýǵa qıyn»,-dedi qala basshysy.
Ákim Abaı aýdanyndaǵy «Jańatalap», turǵyn alabyndaǵy Badam ózeniniń boıyndaǵy qoqystar, «Aqjar», «Qyzyljar», «Aqtas», «Qazyǵurt» shaǵyn aýdandary men turǵyn alaptarynyń kórinisi syn kótermeıtinin aıtyp, aýdan aýmaǵynda turmystyq jáne qurylys qaldyqtary jınalmaıtynyn jáne ózen arnalarynda plastık zattar men óli mal kóptep kezdesetinin atap ótti.
Dál osyndaı jaǵdaı Ál-Farabı aýdanyndaǵy «Sáýle» shaǵyn aýdany men Tereshkova, Hlopzavod kóshelerinde, Eńbekshi aýdanynyń «Badam-2», «Turdyabad», «Jylanbuzǵan» turǵyn alaptary jáne №12, №15 shaǵyn aýdandarynda, ásirese Qarataý aýdanynyń «Bozaryq», «Turan», «Qaınar-bulaq», «Shapyrashty», «Asar-2», «Dostyq» shaǵyn aýdandarynda jáne «Ákimshilik-iskerlik ortalyǵynda» da oryn alǵan dedi.
Áleýmettik jelide de qalanyń sanıtarlyq tazalyǵy týraly synı materıaldar kóptep kezdesetinin aıtqan qala ákimi bul aýdan ákimi men onyń sanıtarlyq tazalyqqa jaýapty orynbasarynyń tıisti deńgeıde jumys atqarmaıtynyn ańǵartady dedi. Máselen, áleýmettik jelilerdegi paraqshalarda bir aptada Qarataýǵa qatysty – 18, Abaı men Eńbekshige qatysty 11, Ál-Farabıge qatysty – 6 synı materıal jaryq kórgen.
Sonymen qatar, M.Áıtenov tazalyqqa tikeleı áser etetin retsiz saýda oryndary máselesine de toqtalyp ótti. Bul máseleniń jyldar boıy sheshilmeýi tek aýdan ákimderi ǵana emes, Jergilikti Polıııa Qyzmetiniń óz mindetterine nemquraılyqpen qaraý saldarynan dedi.
Sóz sońynda ákim respýblıkalyq qala mártebesine laıyqty taza qala bolýy úshin, turǵyndardyń mádenıetin kóterip, bıýdjetten bólingen qarjyny tıimdi jumsaý qajet ekenin jáne jumysty bir-birlerińizge siltemeı bir ujym retinde jumys júrgizýge shaqyrdy.
Shymkent qalasy ákimdiginiń baspasóz qyzmeti
