Şymkent qalasy äkımı M.Äitenov qala aumaǧyndaǧy sanitarlyq tazalau, kögaldandyru jäne abattandyru jūmystary boiynşa Abai, Äl-Farabi, Eŋbekşı, Qaratau audan äkımderınıŋ esebın tyŋdady.
Köktem şyǧa qala üiılgen qoqys pen oidym joldyŋ ortasynda qalatynyn aitqan qala äkımı bügınde şahar şaŋy būrqyrap tūrǧanyn aityp, tört audan äkımıne syn-eskertpe aityp, qala tazalyǧyn retke keltırmese audan äkımderınıŋ jauapkerşılıgı qaralatynyn jetkızdı.
«Biylǧy jyldan bastap qalanyŋ sanitarlyq tazalyǧyn qamtamasyz etu jūmystary qalalyq energetika jäne kommunaldyq şaruaşylyq basqarmasynan tört audan äkımderıne jükteldı. Būl şeşımnıŋ basty maqsaty – jūmysty oŋtailandyryp, audan äkımderınıŋ qūzyryn küşeitıp, audan äkımı men tūrǧyndar arasyndaǧy kerı bailanysty nyǧaitu bolatyn. Bıraq maǧan aldyn ala berılgen aqparatqa säikes, qala tazalyǧy tiıstı därejede dep aituǧa qiyn»,-dedı qala basşysy.
Äkım Abai audanyndaǧy «Jaŋatalap», tūrǧyn alabyndaǧy Badam özenınıŋ boiyndaǧy qoqystar, «Aqjar», «Qyzyljar», «Aqtas», «Qazyǧūrt» şaǧyn audandary men tūrǧyn alaptarynyŋ körınısı syn kötermeitının aityp, audan aumaǧynda tūrmystyq jäne qūrylys qaldyqtary jinalmaitynyn jäne özen arnalarynda plastik zattar men ölı mal köptep kezdesetının atap öttı.
Däl osyndai jaǧdai Äl-Farabi audanyndaǧy «Säule» şaǧyn audany men Tereşkova, Hlopzavod köşelerınde, Eŋbekşı audanynyŋ «Badam-2», «Tūrdyabad», «Jylanbūzǧan» tūrǧyn alaptary jäne №12, №15 şaǧyn audandarynda, äsırese Qaratau audanynyŋ «Bozaryq», «Tūran», «Qainar-būlaq», «Şapyraşty», «Asar-2», «Dostyq» şaǧyn audandarynda jäne «Äkımşılık-ıskerlık ortalyǧynda» da oryn alǧan dedı.
Äleumettık jelıde de qalanyŋ sanitarlyq tazalyǧy turaly syni materialdar köptep kezdesetının aitqan qala äkımı būl audan äkımı men onyŋ sanitarlyq tazalyqqa jauapty orynbasarynyŋ tiıstı deŋgeide jūmys atqarmaitynyn aŋǧartady dedı. Mäselen, äleumettık jelılerdegı paraqşalarda bır aptada Qaratauǧa qatysty – 18, Abai men Eŋbekşıge qatysty 11, Äl-Farabige qatysty – 6 syni material jaryq körgen.
Sonymen qatar, M.Äitenov tazalyqqa tıkelei äser etetın retsız sauda oryndary mäselesıne de toqtalyp öttı. Būl mäselenıŋ jyldar boiy şeşılmeuı tek audan äkımderı ǧana emes, Jergılıktı Polisiia Qyzmetınıŋ öz mındetterıne nemqūrailyqpen qarau saldarynan dedı.
Söz soŋynda äkım respublikalyq qala märtebesıne laiyqty taza qala boluy üşın, tūrǧyndardyŋ mädenietın köterıp, biudjetten bölıngen qarjyny tiımdı jūmsau qajet ekenın jäne jūmysty bır-bırlerıŋızge sıltemei bır ūjym retınde jūmys jürgızuge şaqyrdy.
Şymkent qalasy äkımdıgınıŋ baspasöz qyzmetı
