شىمكەنت قالالىق سانيتارلىق-ەپيدەميولوگيالىق باقىلاۋ دەپارتامەنتىنىڭ باسشىسى ءابدىماناپ تولەباەۆ قالاداعى ەپيدەميولوگيالىق احۋال بويىنشا ءباسپاسوز بريفينگىن وتكىزدى.
دەپارتامەنت باسشىسىنىڭ ايتۋىنشا، COVID-19 جۇقتىرۋ جاعدايلارىنىڭ تىركەلۋى بويىنشا 26 ساۋىردەن باستاپ شىمكەنت قالاسى «سارى ايماققا» كىردى. ەپيدەميولوگيالىق جاعدايدى باعالاۋ ماتريتساسىنا سايكەس، 15 ساۋىردەن باستاپ بۇگىنگە دەيىن «قىزىل ايماقتا» بولعان ەدى.
– شىمكەنت قالاسىندا ءساۋىر ايىنىڭ 25 كۇنىندە 2131 جاعداي تىركەلىپ، اۋىرعانداردىڭ سانى 4,5 ەسەگە ءوستى. ناۋرىز ايىندا ەسەپتى كەزەڭدە 473 جاعداي تىركەلگەن ەدى. ەپيدەميولوگيالىق زەردەلەۋ بارىسىندا ناۋقاستانعانداردىڭ 29,3 پايىزى اۋىرعان اداممەن قارىم-قاتىناستاعىلاردان انىقتالدى. قالعاندارى كارانتيندىك ساقتىق شارالارىن ساقتاماعاندىقتان ىندەتكە شالدىققان. جىل باسىنان بەرى انىقتالعان 3475 ناۋقاستىڭ 32,4 پايىزى ۇلكەن ساۋدا ۇيلەرگە، دۇكەندەرگە، 20,1 پايىزى بازارلارعا، 18,2 پايىزى قوعامدىق كولىكتەردە جانە ءتۇرلى جيىندارعا بارعاندا جۇقتىرعان، – دەدى دەپارتامەنت باسشىسى.
سونداي-اق، دەپارتامەنت باسشىسىنىڭ مالىمەتىنشە، سانيتارلىق-ەپيدەمياعا قارسى ءىس-شارالاردىڭ ورىندالۋى بويىنشا تۇراقتى نەگىزدە سانيتارلىق-اعارتۋ جۇمىستارى جۇرگىزىلۋدە. 2021 جىلدىڭ 1-قاڭتارىنان باستاپ، 25-ساۋىرگە دەيىن 451 سانيتارلىق-اعارتۋ جۇمىستارى اتقارىلىپ، 12338 نىسان ءتۇسىندىرۋ جۇمىستارىمەن قامتىلدى.
شىمكەنت قالاسى اكىمدىگىنىڭ ءباسپاسوز قىزمەتى
➖➖➖➖➖➖➖➖➖➖➖➖➖➖➖➖
