شىمكەنت قالاسىنا جىل باسىنان بەرى كوشىپ كەلگەن 340 وتباسىنداعى 464 ازاماتقا قانداس مارتەبەسى بەرىلدى. ەلگە ورالعانداردىڭ باسىم كوپشىلىگى، ياعني 448 ادام كورشى وزبەكستان رەسپۋبليكاسىنان قونىس اۋدارعان. سونداي-اق، اتاجۇرتقا اۋعانستان، قىتاي جانە رەسەي ەلىنەن دە قانداستارىمىز كوشىپ كەلىپ، قالانىڭ ءار اۋدانىنا قونىستانىپ وتىر.
الىس-جاقىن شەتەلدەن كوشىپ كەلگەن قانداستاردى قولداۋ ماقساتىندا قالادا 11 جىلدان بەرى جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «قانداستاردى بەيىمدەۋ جانە ىقپالداستىرۋ ورتالىعى» قىزمەت كورسەتۋدە. ورتالىق ماماندارى قر زاڭناماسىنا سايكەس، ەلگە ورالعان ازاماتتارعا 6 اي مەرزىمدە بەيىمدەۋ جانە ىقپالداستىرۋ قىزمەتتەرىن ۇسىنادى.
قازىرگى تاڭدا مۇندا 14 وتباسى قۇرامىنداعى 29 ادام ەلگە بەيىمدەلۋدە. ءتىپتى ءتۇرلى ماماندىقتار بويىنشا تەگىن وقۋ كۋرستارى قاراستىرىلعان. قانداستارعا بارلىق سۇراقتارى بويىنشا اقپاراتتىق باعىتتا ءتۇسىندىرۋ جۇمىستارى جۇرگىزىلۋدە.
شىمكەنت قالاسى اكىمدىگىنىڭ ءباسپاسوز قىزمەتى
