شىمكەنت قالاسىنداعى 28 مەديتسينا ۇيىمى «اقىلدى ەمحانا» جۇيەسىنە كوشىپ جاتىر. بۇل تۋرالى قالالىق دەنساۋلىق ساقتاۋ باسقارماسىنىڭ باسشىسى ب.پازيلوۆ قالا اكىمى الدىنداعى ەسەپتى جيىندا ايتتى.
وسى جىلدىڭ ءبىرىنشى توقسانىندا اتقارىلعان ءىس-شارالار جايىن بايانداعان باسقارما باسشىسى قالاداعى مەديتسينا سالاسىن تسيفرلىق تەحنولوگياعا كوشىرۋ جۇمىستارى قارقىن العانىن اتاپ ءوتتى.
ماسەلەن، جوعارىدا اتالعان ەمحانالارعا QR كود جۇيەسى ورناتىلىپ جۇمىس جۇرگىزىلۋدە. QR كود قوسىمشاسى ارقىلى ناۋقاستار دارىگەردىڭ قابىلداۋىنا جازىلىپ، مەديتسينا مامانىن ۇيىنە شاقىرۋىنا بولادى. ەڭ ماڭىزدىسى – ۇسىنىستار، ارىز-شاعىم مەن تالاپتار قالدىرۋعا دا جاعداي جاسالعان.
سونىمەن قاتار، ەمحانالار «دامۋمەد» مەديتسينالىق اقپاراتتىق جۇيەسىمەن جۇمىس جۇرگىزۋدە. شاھاردا موبيلدىك قوسىمشانى پايدالانۋشىلار – 201 780 ادام. ەلەكتروندىق دەنساۋلىق پاسپورتتارى 1052849 پاتسيەنتكە تولتىرىلعان. بۇل – قالا حالقىنىڭ 97,8 %-ى.
شىمكەنت قالاسى اكىمدىگىنىڭ ءباسپاسوز قىزمەتى
